ବୋଲଗଡ଼,୧୬ା୯(ଡି.ଏନ୍.ଏ.): ପୂର୍ବତଟ ରେଳପଥ ଅଧୀନ ବୋଲଗଡ଼ ରେଲଓ୍ବେ ଷ୍ଟେଶନରେ ପାନୀୟଜଳ ଏବଂ ଆଲୋକୀକରଣ ବ୍ୟବସ୍ଥା ନ ଥିବାରୁ ଯାତ୍ରୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏହି ଷ୍ଟେଶନ ପୂର୍ବରୁ ବୋଲଗଡ଼ ଟାଉନ ପାସେଞ୍ଜର୍ ହଲ୍ଟ ଥିବା ବେଳେ ଗତ ଜୁନ ୩୦ରେ କେନ୍ଦ୍ର ରେଳମନ୍ତ୍ରୀ ଅଶ୍ବିନୀ ବୈଷ୍ଣବ ସ୍ଥାନୀୟ ଜନସାଧାରଣଙ୍କ ଦାବିକୁ ଗ୍ରହଣ କରି ଏଠାରେ ପହଞ୍ଚି ବୋଲଗଡ଼ ଷ୍ଟେଶନର ମାନ୍ୟତା ପ୍ରଦାନ କରିଥିଲେ। ସେବେଠାରୁ ଏହି ଷ୍ଟେଶନରେ ଏକ୍ସପ୍ରେସ୍ ଟ୍ରେନ ରହଣି ଆରମ୍ଭ ହୋଇଥିଲା। ତେବେ ଷ୍ଟେଶନରେ ଅବ୍ୟବସ୍ଥା ଯୋଗୁ ଯାତ୍ରୀ ଓ ରେଲଓ୍ବେ କର୍ମଚାରୀ ହଇରାଣ ହେଉଛନ୍ତି। ଏଠାରେ ଥିବା ଏକ ନଳକୂପ ଖରାପ ହୋଇ ବନ୍ଦ ପଡିଛି। ଫଳରେ ପିଇବା ପାଣି ପାଇଁ ଯାତ୍ରୀ ଓ ରେଲଓ୍ବେ କର୍ମଚାରୀ ନିକଟ ବ୍ଲକ କାର୍ଯ୍ୟାଳୟରୁ ଆଣୁଛନ୍ତି। ଭୁବନେଶ୍ବର-ନୟାଗଡ ସେବା ଏକ୍ସପ୍ରେସ୍ ଏବଂ ପୁରୀ ନୁଆଗାଁ ପାସେଞ୍ଜର୍ ସ୍ପେଶାଲ ଟ୍ରେନ ପ୍ରତ୍ୟହ ପୂର୍ବାହ୍ନ ୧୦ଟା ମଧ୍ୟରେ ଏଠାରେ ପହଞ୍ଚୁଥିବା ବେଳେ ରାତି ୮ଟାରୁ ୮ଟା ୩୦ ମଧ୍ୟରେ ପୁଣି ଏଠାରେ ପହଞ୍ଚିଥାଏ। ଶତାଧିକ ଯାତ୍ରୀ ଏଠାରୁ ଦୈନନ୍ଦିନ ପୁରୀ ଓ ଭୁବନେଶ୍ବର ଯାଇଥାନ୍ତି। ଷ୍ଟେଶନରେ ଆଲୋକୀକରଣ ସୁବିଧା ନ ଥିବାରୁ ରାତିରେ ଫେରୁଥିବା ଯାତ୍ରୀମାନେ ଅସୁବିଧାର ସମ୍ମୁଖୀନ ହୋଇଥାନ୍ତି। ଷ୍ଟେଶନରେ ଥିବା କାର୍ଯ୍ୟାଳୟ ଅଞ୍ଚଳଟି ଆଲୋକିତ ହେଉଥିବା ବେଳେ ପ୍ରବେଶ ପଥ ଓ ସର୍କୁଲେଟିଙ୍ଗ ଅଞ୍ଚଳ ସମ୍ପୂର୍ଣ୍ଣ ଅନ୍ଧାକାର ରହୁଛି। ଯାତ୍ରୀ ଲିଟୁ ପଟ୍ଟନାୟକ କୁହନ୍ତି, ପାନୀୟଜଳର ସୁବିଧା ନ ଥିବାରୁ ଯାତ୍ରୀ ପିଇବା ପାଣି ପାଇଁ ହନ୍ତସନ୍ତ ହୋଇଥାନ୍ତି। ପ୍ଲାଟଫର୍ମ ଓ ପ୍ରବେଶ ପଥରେ ଆଲୋକୀକରଣ ନ ଥିବାରୁ ରାତିରେ ପୁରୀ ଓ ଭୁବନେଶ୍ବରରୁ ଫେରୁଥିବା ଯାତ୍ରୀ ହଇରାଣ ହେବା ସହ ନିରାପଦ ମଣନାହାନ୍ତି। ଅନ୍ୟପକ୍ଷରେ ଷ୍ଟେଶନ ପରିଚାଳନା ଦାୟିତ୍ୱରେ ଥିବା ଷ୍ଟେଶନ ଟିକେଟ ବୁକିଙ୍ଗ ଅଥରିଟି (ଏସ୍୍ଟିବିଏ) ଏଜେଣ୍ଟ ଉମାକାନ୍ତ ବେବର୍ତ୍ତା ପଟ୍ଟନାୟକ କହିଛନ୍ତି, ଏ ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଇଛି। ଖୁବ୍ଶୀଘ୍ର ଉକ୍ତ ସମସ୍ୟାର ସମାଧାନ କରାଯିବ ବୋଲି ବିଭାଗ ପକ୍ଷରୁ ମେସେଜ ଆସିଥିବା ସେ କହିଛନ୍ତି।
