ଯାଜପୁର ଅଫିସ/ପ୍ରୀତିପୁର (ଡି.ଏନ୍.ଏ.),୧୮ା୧୨: ବର୍ଷା ଓ ବନ୍ୟା ଜଳ ନିଷ୍କାସନ ହୋଇ ନ ପାରିବାରୁ ଯାଜପୁର ଜିଲା ବିଞ୍ଝାରପୁର ଓ ଦଶରଥପୁର ଅଞ୍ଚଳ ଚାଷୀ ଧାନ ଅମଳ କରି ନ ପାରି ମୁଣ୍ଡରେ ହାତ ଦେଇ ବସିଛନ୍ତି। ଏହି ଦୁଇ ବ୍ଲକର ୨୦ ପଞ୍ଚାୟତର ୧୦ ହଜାରରୁ ଊର୍ଦ୍ଧ୍ୱ ହେକ୍ଟର ଜମିରେ ଚାଷ କାମ ବାଧାପ୍ରାପ୍ତ ହୋଇଛି। ଚାଷଜମିରୁ ଜଳ ନିଷ୍କାସନର ବ୍ୟବସ୍ଥା ନଥିବା ଯୋଗୁଁ ଚଳିତ ବର୍ଷ ଶତାଧିକ କୃଷକ ଶାରଦ ଧାନ ଚାଷ କରିବାରୁ ବଞ୍ଚତ୍ତ ହୋଇଛନ୍ତି। ଏ ସମ୍ପର୍କରେ ଚାଷୀମାନେ ବାରମ୍ବାର ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ସୁଦ୍ଧା କୌଣସି ପ୍ରତିକାର ବ୍ୟବସ୍ଥା ଗ୍ରହଣ କରାଯାଉନାହିଁ। ବିଞ୍ଝାରପୁର ବ୍ଲକ ଅଧୀନ କପିଳା, ମାନ୍ଦାତାପାଟଣା, କରପଦା, ତାଲୁକପଡା, ରାହାସ ଗୁହାଳୀ, ଟିଣା ଆଦି ଗ୍ରାମ ସମେତ ଦଶରଥପୁର ବ୍ଲକର ବିରିପଟା, ପାଲଟପୁର, ଥାଲକୁଡି, ଖାନନଗର, କୟାଁ, କମାରଡିହି, ନିଜାମପୁର ଆଦି ପଞ୍ଚାୟତରେ ମଧ୍ୟ ସମାନ ସମସ୍ୟା ଦେଖାଯାଇଛି। ଚାଷଜମିରୁ ଜଳ ନିଷ୍କାସନର ବ୍ୟବସ୍ଥା ନ ଥିବାରୁ ପ୍ରତି ବର୍ଷ ଚାଷୀମାନେ ବ୍ୟାପକ କ୍ଷତି ସହୁଥିବାରୁ ଚଳିତ ବର୍ଷ ଅଧିକାଂଶ ଚାଷୀ ଚାଷ କରିନାହାନ୍ତି। ଜୁଣେଇ, କୁଶେଇ, ବେଙ୍ଗା ଓ ଭାଟିଆ ନାଳରେ ପ୍ରବାହିତ ଜଳ ନିଷ୍କାସିତ ହୋଇ ନ ପାରିବା ଯୋଗୁ ଏପରି ସମସ୍ୟା ଉପୁଜୁଛି। ଏହି ଚାଷ ଜମିରୁ ଜଳ ନିଷ୍କାସନର ଏକମାତ୍ର ପଥ ଥିବା ବିଭିନ୍ନ ନଦୀ ଓ ନାଳରୁ ମାଛ ଧରିବା ପାଇଁ କେତେଜଣ ବ୍ୟକ୍ତି ନାଳରେ ବହ୍ଲା ଓ ବାଉଁଶ ଖୁଣ୍ଟ ଦ୍ୱାରା ସ୍ଥାୟୀ ଅବରୋଧ କରିବା ଯୋଗୁ ଏପରି ସମସ୍ୟା ସୃଷ୍ଟି ହୋଇଥିବା ଚାଷୀମାନେ କହିଛନ୍ତି। ତେଣୁ ପ୍ରଶାସନ ପ୍ରାକୃତିକ ଜଳ ନିଷ୍କାସନ ପଥକୁ ଅବରୋଧ ମୁକ୍ତ କରିବା ସହିତ ସେଗୁଡିକୁ ସଫେଇ ଓ ସମ୍ପ୍ରସାରଣର କରି ସ୍ଥାୟୀ ପ୍ରତିକାର କରିବାକୁ ବିଞ୍ଝାରପୁର ବ୍ଲକର ୩୦ରୁ ଊର୍ଦ୍ଧ୍ୱ ଚାଷୀ ଓ ସାମାଜିକ କର୍ମୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ରବିନାରାୟଣ ସାମଲ, ରବିନ୍ଦ୍ର କୁମାର ଦାସ, କୈଳାସ ଚନ୍ଦ୍ର ଜେନା, ସଚ୍ଚିଦାନନ୍ଦ ଗୁରୁ, ଅମୂଲ୍ୟ କୁମାର ସାମଲ, ନୃସିଂହଚରଣ ପଣ୍ଡା, ବାଙ୍କବିହାରୀ ଜେନା, ଅରୁଣ କୁମାର ଦାସ, ଘନଶ୍ୟାମ ପାତ୍ର, ପ୍ରେମାନନ୍ଦ ସାହାଣୀ, ଶାନ୍ତନୁ କୁମାର ଦାସ, ବିରଞ୍ଚତ୍ ନାରାୟଣ ବେହେରା ପ୍ରମୁଖ ହାଇକୋର୍ଟରେ ମାମଲା ରୁଜୁ କରିଛନ୍ତି। ଏନେଇ ହାଇକୋର୍ଟରେ ୩୩୧୫୩/୨୦୨୨ନମ୍ବରରେ ଏକ ଜନସ୍ବାର୍ଥ ମାମଲା ରୁଜୁ ହୋଇଥିବାବେଳେ ଶକ୍ତିଧର ଦାସ, ହରିପଦ ମହାନ୍ତି, ଏମ୍.ଏମ୍ ସ୍ବାଇଁ, କର୍ଣ୍ଣାନ ସତ୍ତାର, ଏମ୍. ଫାରାଦିଶ୍ ମାମଲା ପରିଚାଳନା କରୁଛନ୍ତି।
