ବଅଁରପାଳ, ୪ା୯(ଡି.ଏନ.ଏ.)
ଚଳିତ ବର୍ଷ ଝଲସିବନି ଆଲୁମିନିୟମ ନଗରୀ। କରୋନା ଯୋଗୁ ବନ୍ଦ ହେବାକୁ ଯାଉଛି ୩୦ ବର୍ଷର ପରମ୍ପରା। ଏଥର ମୂର୍ତ୍ତି ବଦଳରେ ନାଲ୍କୋରେ ଫଟୋରେ ଦେବଶିଳ୍ପୀ ପୂଜା ପାଇବେ ବୋଲି ପ୍ରଶାସନ ପକ୍ଷରୁ ନିଷ୍ପତ୍ତି ହୋଇଛି। ଏ ନେଇ ନାଲ୍କୋ ମାନବ ସମ୍ବଳ ମହାପ୍ରବନ୍ଧକ ଏସ୍. ଏନ୍. ସାହୁଙ୍କ ଅଧ୍ୟକ୍ଷତାରେ ମଙ୍ଗଳବାର ନାଲ୍କୋ ଟ୍ରେନିଂ ସେଣ୍ଟରଠାରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ସମ୍ପୂର୍ଣ୍ଣ ନାଲ୍କୋନଗରୀରେ ପୂଜା ପାଳନ କରିବାକୁ ବାରଣ କରାଯାଇଛି। କେବଳ ପ୍ଲାଣ୍ଟ ପରିସରରେ ବିଶ୍ୱ ନିର୍ମାତାଙ୍କ ଫଟୋ ରଖି ବିଧି ପାଳନ କରାଯିବ ବୋଲି ସ୍ଥିର ହୋଇଛି। ବୈଠକରେ ସିପିପି ମହାପ୍ରବନ୍ଧକ ଅମ୍ବିକା ପ୍ରସାଦ ପାଣ୍ଡବ, ଏଜିଏମ୍ ଚନ୍ଦ୍ର ମୋହନ ମହନ୍ତ, ଇଷ୍ଟେଟ ଅଧିକାରୀ ମଣି ରଞ୍ଜନ ପଟ୍ଟନାୟକ, ଶ୍ରମିକ ନେତା ମୁରଲୀଧର ପଣ୍ଡା, ସୁଜିତ ସେଠ, କିଶୋର ବେହେରା, ବିଭୂତି ଶତପଥୀଙ୍କ ସମେତ ବିଭିନ୍ନ ପୂଜା କମିଟି କର୍ମକର୍ତ୍ତା ଯୋଗ ଦେଇଥିଲେ। ପ୍ରତ୍ୟେକ ବର୍ଷ ନାଲ୍କୋ କଲୋନୀ ପରିସରରେ ପ୍ରାୟ ୨୩ ମଣ୍ଡପରେ ଦେବଶିଳ୍ପୀ ପୂଜା ପାଇଥାନ୍ତି। ପଟ୍ଲାଇନ, କାଷ୍ଟ ହାଉସ, ରୋଡିଂ ଶପ, ମେକାନିକାଲ ବିଭାଗ, ସିପିପି ମେକାନିକାଲ, ଅପରେଶନ ବିଭାଗ, ଠିକାଦାର ସଂଘ, ଆର୍ପିୟୁ ସିଭିଲି ଉଦ୍ୟାନ, କାର୍ବନ ଏରିଆ, ଇଲେକ୍ଟ୍ରିକାଲ ବିଭାଗ ସମେତ ୨୩ରୁ ଊର୍ଦ୍ଧ୍ୱ ମଣ୍ଡପରେ ୭ ଦିନ ଧରି ପୂଜା ପାଳନ କରାଯାଏ। ସୁସଜ୍ଜିତ ଆଲୋକତୋରଣ ସହ ପ୍ରତି ମଣ୍ଡପରେ ପ୍ରତିଯୋଗିତା ମୂଳକ ଭାବେ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯାଏ। ହେଲେ ଏ ବର୍ଷ କରୋନା ଯୋଗୁ ପୂଜା ପାଳନ କରାଯିବ ନାହିଁ ବୋଲି ଜଣାପଡିବା ପରେ ସମସ୍ତଙ୍କ ମନରେ ନିରାଶା ଦେଖାଯାଇଛି।
କେବଳ ଫଟୋ ପୂଜା
କରୋନା ଯୋଗୁ ସରକାରଙ୍କ ନିୟମ ଅନୁଯାୟୀ ଚଳିତ ବର୍ଷ ନାଲ୍କୋରେ ବିଶ୍ୱକର୍ମା ପୂଜା ପାଳନ ହେବନି। କେବଳ ବିଧି ରକ୍ଷା ପାଇଁ ବିଭିନ୍ନ ବିଭାଗ ପକ୍ଷରୁ ଫଟୋ ରଖି ପୂଜାର୍ଚ୍ଚନା କରାଯିବ।
-ମଣିରଞ୍ଜନ ପଟ୍ଟନାୟକ, ନାଲ୍କୋ ଇଷ୍ଟେଟ ଅଧିକାରୀ
ପରମ୍ପରା ଭାଙ୍ଗିବ
କରୋନା ଯୋଗୁ ଦୀର୍ଘ ୩୦ ବର୍ଷର ପରମ୍ପରା ଭାଙ୍ଗିବ। ସମଗ୍ର ରାଜ୍ୟରେ ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ନାଲ୍କୋ ବିଶ୍ୱକର୍ମା ପୂଜା ଏ ବର୍ଷ ପାଳନ ହେବନାହିଁ। ଫଳରେ ଦର୍ଶକଙ୍କ ଆଗମନ ହେବନାହିଁ। ଏଥିଯୋଗୁ ବହୁ ବ୍ୟବସାୟୀ କ୍ଷତି ସହିବେ।
-ବିଭବ ଜେନା, ଶ୍ରମିକ ନେତା
ନିଷ୍ପତ୍ତି ସ୍ବାଗତଯୋଗ୍ୟ
ବିଶ୍ୱକର୍ମା ପୂଜା ଆସିଲେ ସମଗ୍ର ନାଲ୍କୋ ନଗରୀ ଚଳଚଞ୍ଚଳ ହୋଇଉଠେ। ସମ୍ପ୍ରତି ପରିସ୍ଥିତିରେ ନାଲ୍କୋର ନିଷ୍ପତ୍ତି ସ୍ବାଗତଯୋଗ୍ୟ। ଆଗାମୀ ବର୍ଷ ପୂଜା ପାଳନ ପାଇଁ ଉଦ୍ୟମ କରାଯିବ।
-ନିର୍ମଳ ସାମଲ, ନେସ୍ ସାଧାରଣ ସମ୍ପାଦକ
ଆକ୍ରାନ୍ତଙ୍କ ସଂଖ୍ୟା ବଢ଼ିଥାନ୍ତା
ପୂଜା ନ ହେବା ଜାଣି ଦୁଃଖ ଲାଗୁଛି। କିନ୍ତୁ କରୋନା ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଥିବାରୁ ପୂଜା ହେଲେ ଗହଳି ବଢିବ। ତେଣୁ ନାଲ୍କୋ ପକ୍ଷରୁ ନିଆଯାଇଥିବା ନିଷ୍ପତ୍ତିକୁ ସମସ୍ତେ ସମର୍ଥନ କରିବା ଉଚିତ।
-ମାଙ୍ଗିଲାଲ ସାମଲ, କାର୍ଯ୍ୟକାରୀ ସଭାପତି, ନେପୁ
ଖଁା ଖଁା ଲାଗିବ
ପୂଜା ନ ହେଲେ ନାଲ୍କୋନଗରୀ ଖାଁ ଖାଁ ଲାଗିବ। ମଣ୍ଡପ ହେବନି କି ପ୍ରଭୁ ବିରାଜିବେନି। କିନ୍ତୁ ପରିସ୍ଥିତି ଏପରି କରିବାକୁ ବାଧ୍ୟ କରିଛି। ଏବର୍ଷ ପୂଜା ବାଧାପ୍ରାପ୍ତ ହେଲେ ବି ଆସନ୍ତା ବର୍ଷ ଧୁମ୍ଧାମରେ ପାଳନ କରାଯିବ। -ପ୍ରକାଶ ବେହେରା, ନାଲ୍କୋ କର୍ମଚାରୀ
