କେନ୍ଦ୍ରାପଡ଼ା/ମହାକାଳପଡ଼ା,୨୮ା୭ (ଜଗନ୍ନାଥ ଧଳ/ପ୍ରତାପ ଚନ୍ଦ୍ର ସ୍ବାଇଁ):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ୍ ତିଖିରୀ ସରପଞ୍ଚ ଚାମେଲୀ ଓଝାଙ୍କ ବିରୋଧରେ ଆସନ୍ତା ଅଗଷ୍ଟ ୧୩ରେ ଅନାସ୍ଥା ପ୍ରସ୍ତାବ ଆସିବ। ଗତ ୨୩ ତାରିଖରେ ପଞ୍ଚାୟତର ୨୨ ୱାର୍ଡସଭ୍ୟଙ୍କ ମଧ୍ୟରୁ ୨୧ ସଭ୍ୟାସଭ୍ୟ ସରପଞ୍ଚ ଓଝାଙ୍କ ବିରୋଧରେ ଅନାସ୍ଥା ପ୍ରସ୍ତାବ ସମ୍ପର୍କରେ ଉପଜିଲାପାଳଙ୍କୁ ପତ୍ର ମାଧ୍ୟମରେ ଅବଗତ କରିଥିଲେ। ଉପଜିଲାପାଳ ଅରୁଣ କୁମାର ନାୟକଙ୍କ ନିର୍ଦ୍ଦେଶନାମା ଅନୁଯାୟୀ ସୋମବାର ଅପରାହ୍ନ ୩ଟା ୩୦ରେ ପଞ୍ଚାୟତ ୱାର୍ଡ ସଭ୍ୟାସଭ୍ୟଙ୍କ ଦସ୍ତଖତ ଓ ପରିଚୟ ପତ୍ର ଯାଞ୍ଚ କରାଯାଇଥିଲା। ଆବେଦନକାରୀ ୨୧ ସଭ୍ୟାସଭ୍ୟଙ୍କ ମଧ୍ୟରୁ ୧୬ ନଂ. ୱାର୍ଡ ସଭ୍ୟା ସାବିତ୍ରୀ ମଲ୍ଲିକ ଶାରୀରିକ ଅସୁସ୍ଥତା କାରଣରୁ ଉପଜିଲାପାଳଙ୍କ କାର୍ଯ୍ୟାଳୟରେ ଉପସ୍ଥିତ ହୋଇପାରି ନ ଥିଲେ।
ଏ ସମ୍ପର୍କରେ ନାଏବ ସରପଞ୍ଚ ଶରତ ଚନ୍ଦ୍ର ଦ୍ୱିବେଦୀ, ୱାର୍ଡ ସଭ୍ୟ ରାକେଶ ସୂତାର ଓ ସଭ୍ୟା ରାଜଶ୍ରୀ ରାଜସ୍ମିତା ସାହୁ କହିଛନ୍ତି, ସରପଞ୍ଚ ଓଝାଙ୍କ କାର୍ଯ୍ୟକାଳ ମଧ୍ୟରେ ପଞ୍ଚାୟତର ଉନ୍ନୟନ କାର୍ଯ୍ୟ ହୋଇପାରିନାହିଁ। ସାଧାରଣ ଜନତାଙ୍କ ଗୁହାରି ମଧ୍ୟ ବିଭିନ୍ନ ସମୟରେ ସେ ଶୁଣୁ ନ ଥିବା ବହୁବାର ଅଭିଯୋଗ ହୋଇଛି। ପଞ୍ଚାୟତବାସୀ ସରପଞ୍ଚଙ୍କ ଏପରି କାର୍ଯ୍ୟକୁ ବରଦାସ୍ତ କରୁ ନ ଥିବାରୁ ପୂର୍ବରୁ ଥରେ ମଧ୍ୟ ଅନାସ୍ଥା ପ୍ରସ୍ତାବ ଆଗତ ପାଇଁ ପ୍ରସ୍ତୁତି ସରିଥିଲା। ଗତ ଜୁନ୍ରେ ସରପଞ୍ଚ ଓଝାଙ୍କ ପ୍ରତି ଆକ୍ରମଣ ଓ ତାଙ୍କର ପ୍ରତିବାଦକୁ ନେଇ ଏହି ଅନାସ୍ଥା ପ୍ରସ୍ତାବ ଆଗତ ହୋଇ ନ ଥିବା ସେମାନେ ମତ ରଖିଛନ୍ତି। ଉପଜିଲାପାଳ ନାୟକ କହିଛନ୍ତି, ଯାଞ୍ଚ ପ୍ରକ୍ରିୟା ଶେଷ ହୋଇଛି। ଉପସ୍ଥିତ ସଭ୍ୟାସଭ୍ୟଙ୍କ ଦସ୍ତଖତ ଓ ପରିଚୟ ମେଳ ଖାଇଛି। ଆସନ୍ତା ୧୩ ତାରିଖରେ ତିଖିରୀ ପଞ୍ଚାୟତ କାର୍ଯ୍ୟାଳୟରେ ଅନାସ୍ଥା ସମ୍ପର୍କରେ ବୈଠକ ହେବ। ଏହି ବୈଠକ ପରିଚଳନା ଓ ପ୍ରିଜାଇଡିଂ ଅଫିସର ପାଇଁ ଅନ୍ୟ ତହସିଲରୁ ପଦାଧିକାରୀଙ୍କୁ ନିଆଯିବ।
Dharitri – Odisha’s No.1 Odia Daily
