କଟକ ଅଫିସ,୧୭।୭: କରୋନା ଆକ୍ରାନ୍ତଙ୍କ ନାମ ପ୍ରଘଟ ଉପରେ କଟକଣା ଜାରି କରିବା ପାଇଁ ରୁଜୁ ହୋଇଥିବା ମାମଲାରେ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ। ପରିବାର ବର୍ଗଙ୍କଠାରୁ ଅନୁମତି ନେଇ ଆକ୍ରାନ୍ତଙ୍କ ନାମ ସାର୍ବଜନୀନ କରାଯାଇପାରିବ ବୋଲି କୋର୍ଟ କହିଛନ୍ତି। ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ୍ ମହମ୍ମଦ ରଫିକ୍ ଏବଂ ବିଚାରପତି ଜଷ୍ଟିସ୍ ଶତ୍ରୁଘ୍ନ ପୂଜାହାରୀଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇ ମାମଲାର ଅନ୍ତ ଘଟାଇଛନ୍ତି।
ମାମଲା ଅନୁଯାୟୀ, କେନ୍ଦ୍ରାପଡ଼ା ଜିଲାର ୧୩ ଜଣ କରୋନା ଆକ୍ରାନ୍ତଙ୍କ ପରିଚୟ ପ୍ରଘଟ ହେବା ସହ ସୋସିଆଲ୍ ମିଡିଆରେ ଭାଇରାଲ୍ ହୋଇଥିଲା। ଏନେଇ ଅନଙ୍ଗ ଓତା ହାଇକୋର୍ଟରେ ଏକ ମାମଲା ରୁଜୁ କରିଥିଲେ। ଆଇସିଏମ୍ଆର୍ଙ୍କ ନିର୍ଦ୍ଦେଶାବଳୀ ଅନୁଯାୟୀ କରୋନା ସଂକ୍ରମିତଙ୍କ ପରିଚୟ ଗୋପନ ରହିବ। ତାଙ୍କ ନାମ, ଠିକଣା କିମ୍ବା ବୟସ ସହ ଅନ୍ୟ କୌଣସି ତଥ୍ୟ ପ୍ରଘଟ ହେବନାହିଁ। ଥରେ ଆକ୍ରାନ୍ତଙ୍କ ନାମ ପ୍ରଘଟ ହେଲେ ସାମାଜିକ ବାସନ୍ଦ ହେବାର ଆଶଙ୍କା ରହୁଛି। ତେଣୁ କେନ୍ଦ୍ରାପଡ଼ା ଜିଲାରେ ଯେଉଁମାନେ କରୋନା ଆକ୍ରାନ୍ତଙ୍କ ନାମ ପ୍ରଘଟ କରିଛନ୍ତି, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବାକୁ ନିବେଦନ କରିଥିଲେ ଆବେଦନକାରୀ। ହାଇକୋର୍ଟ ମାମଲାର ଶୁଣାଣି କରି ଜବାବ ଦାଖଲ ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବା ପରେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ରାଜ୍ୟ ସରକାର କହିଥିଲେ। ଅନ୍ୟପକ୍ଷରେ କେହି କରୋନା ଆକ୍ରାନ୍ତ ହେଲେ କିମ୍ବା ସେଥିରେ ତାଙ୍କର ମୃତ୍ୟୁ ହେଲେ, ପରିବାରର ଅନୁମତି ନେଇ ନାମ ପ୍ରଘଟ କରାଯାଇପାରିବ। ଏଦିଗରେ ଗଣମାଧ୍ୟମ ସଂସ୍ଥା ସୂଚାରୁ ରୂପେ ଦାୟିତ୍ୱ ତୁଲାଇବାକୁ କୁହାଯାଇଛି। ଜନସାଧାରଣ ମଧ୍ୟ ଆକ୍ରାନ୍ତଙ୍କ ପ୍ରତି ସକାରାତ୍ମକ ମନୋଭାବ ଦେଖାଇବା ଆବଶ୍ୟକ ବୋଲି କୋର୍ଟ କହିଛନ୍ତି।
