ମହାକାଳପଡ଼ା,୨୨।୧(ଡି.ଏନ.ଏ.): କେନ୍ଦ୍ରାପଡ଼ା ଜିଲାର ମହାକାଳପଡ଼ା ବ୍ଲକ ରାମନଗର ପଞ୍ଚାୟତର ରାମଚଣ୍ଡୀ ପଡା ୧ ନଂ. ଓ୍ବାର୍ଡର ସଂଖ୍ୟାଲଘୁ ସମ୍ପ୍ରଦାୟ ପରିବାରକୁ ମିଳୁନି ବିଦ୍ୟୁତ୍ ସେବା। ଫଳରେ ପିଲାମାନେ ପାଠ ପଢିବାକୁ ଡିବିରି ଆଲୁଅକୁ ଭରସା କରୁଛନ୍ତି। ବିଭାଗୀୟ ଅଧିକାରୀଙ୍କ ନିକଟରେ ସଂଖ୍ୟାଲଘୁ ପରିବାର ସଦସ୍ୟ ବର୍ଷ ବର୍ଷ ଧରି ନେହୁରା ହେଉଛନ୍ତି। ଖାଦ୍ୟ, ବାସଗୃହ, ପାନୀୟ ଜଳ, ବିଦ୍ୟୁତ୍, ଉଜ୍ୱଳା ଗ୍ୟାସ ଯୋଜନା ଆଦି ଅତ୍ୟାବଶ୍ୟକ ମୌଳିକ ସୁବିଧାରୁ ସଂଖ୍ୟାଲଘୁ ପରିବାର ବଞ୍ଚତ୍ତ। ଆମେ ସଂଖ୍ୟାଲଘୁ ପରିବାର ବୋଲି ମୌଳିକ ସୁବିଧା ମିଳୁପାରୁନାହିଁ ବୋଲି ଗୁଲୁଜାନ ବିବି କହିଛନ୍ତି। ବାସଗୃହ କରିବାକୁ ଇଞ୍ଚେ ନିଜସ୍ବ ଜମି ନାହିଁ । କେବଳ ସରକାରୀ ଜମିରେ ନୁଆଁଣିଆ ଚାଳଘରେ ଛୋଟ ପିଲାଙ୍କୁ ନେଇ ମୁଣ୍ଡ ଗୁଞ୍ଜିଛୁ। ଝଡ଼ବାତ୍ୟାରେ ଜୀବନ ଦୁର୍ବିଷହ ହୋଇପଡେ। ପିଲାଙ୍କୁ ପାଠ ପଢାଇବାକୁ ପାଖରେ ପଇସାଟିଏ ନାହିଁ । ପର ଘରେ ମଜୁରି ଲାଗି ଅତିକଷ୍ଟରେ ପିଲାଙ୍କ ମୁହଁରେ ଦାନା ମୁଠାଏ ଦେଇଥାଏ। ନିର୍ବାଚନ ବେଳେ ରାଜନେତାମାନେ ମଧୁର କଥା କହି ଭୋଟ ହାତେଇଥାନ୍ତି। ନିର୍ବାଚନ ପରେ ସମସ୍ତେ ସବୁ କିଛି ଭୁଲିଯାଆନ୍ତି। ସନ୍ଧ୍ୟା ହେଲେ ପିଲାମାନେ ଘରେ ବିଦ୍ୟୁତ୍ ନ ଥିବାରୁ ଡିବିରି ଆଲୁଅରେ ପାଠ ପଢିଥାନ୍ତି। କେବେ କିରୋସିନ ସରିଗଲେ ସଞ୍ଜବତୀ ହିଁ ସାହା ଭରସା। ସରକାର ଶିକ୍ଷା ପାଇଁ ବହୁ ଯୋଜନା କରୁଛନ୍ତି। ଏହା ଆମ ନିକଟରେ କେବେ ପହଞ୍ଚତ୍ବ ବୋଲି ସେ ପ୍ରଶ୍ନ କରିଛନ୍ତି। ସେହିପରି ଅଷ୍ଟମ ଶ୍ରେଣୀ ଛାତ୍ରୀ ନୁରୁଜାନ ଖାତୁନ, ପଞ୍ଚମ ଶ୍ରେଣୀ ଛାତ୍ର ଶେଖ ରାଜନ, ଚତୁର୍ଥ ଶ୍ରେଣୀ ଛାତ୍ର ଶେଖ ସଲିମ କହିଛନ୍ତି, ଆମ ସାଙ୍ଗ ବିଦ୍ୟୁତ୍ ଆଲୁଅରେ ପଢୁଛନ୍ତି। ଆମେ ଅଧିକ ସମୟ ପଢିବାକୁ ଇଚ୍ଛାଥିଲେ ମଧ୍ୟ ଡିବିରି ଆଲୁଅରେ ପାଠ ପଢିଲେ ଆଖି, ନାକ ଆଦି ଉପରେ ପ୍ରଭାବ ପଢୁଛି। ଏହି ପରିବାରକୁ ମୌଳିକ ସେବା ଯୋଗାଇ ଦେବାକୁ ପଡାର ପବିତ୍ର ବେହେରା, ପଇଡ ଭକ୍ତା, ସୁଦାମ ନାୟକ, ସୁବଳ ଭକ୍ତା, ସପନ ଭକ୍ତା ପ୍ରମୁଖ ଦାବି କରିଛନ୍ତି।
