ନ୍ୟୁୟର୍କ, ୨୮ା୮(ଏପି): କୋଭିଡ୍-୧୯ ଟେଷ୍ଟରେ ଦୁଇଥର ପଜିଟିଭ ପରେ ନେଗେଟିଭ୍ ଆସିଥିଲେ ହେଁ ୟୁ.ଏସ. ଓପ୍ନ୍ ୨୦୧୪ ରନର୍ସ ଅପ୍ କେଇ ନିଶିକୋରୀ ଆସନ୍ତା ସପ୍ତାହରେ ଆରମ୍ଭ ହେବାକୁଥିବା ଏହି ଗ୍ରାଣ୍ଡସ୍ଲାମ ପ୍ରତିଯୋଗିତାରେ ଅଂଶଗ୍ରହଣ କରିବେ ନାହିଁ। ନିଶିକୋରୀ କହିଛନ୍ତି, ସେ ଧିରେ ଧିରେ ଅଭ୍ୟାସକୁ ଫେରିବା ଲାଗି ବିଚାର କରୁଛନ୍ତି। ବହୁଦିନ ଛୁଟିରେ ରହିବା ପରେ ୫ ସେଟ୍ ବିଶିଷ୍ଟ ପ୍ରତିଯୋଗିତାରେ ଭାଗ ନେବା ବର୍ତ୍ତମାନ ତାଙ୍କ ପକ୍ଷେ ସମ୍ଭବପର ନୁହେଁ ସେ ମୋବାଇଲ୍ ଆପ୍ରେ ଉଲ୍ଲଖ କରିଛନ୍ତି। ୟୁ.ଏସ୍. ଓପନ୍କୁ ସେ ଭଲ ପାଆନ୍ତି କାରଣ ଏହି ଟୁର୍ନାମେଣ୍ଟରେ ତାଙ୍କର ଅନେକ ଅଭୁଲା ସ୍ମୃତି ରହିଛି। ସେ କ୍ଲେ କୋର୍ଟରେ ପ୍ରଥମେ ଖେଳ ଆରମ୍ଭ କରିବାକୁ ସ୍ଥିର କରିଛନ୍ତି। ବୁଧବାର ୟୁ.ଏସ୍. ଓପନରୁ ଓହରିଯାଇଥିବା ଅନ୍ୟ ଜଣେ ଖେଳାଳି ହେଲେ ପୋଲୋନା ହରକଗ୍। ଏହା ଫଳରେ ୨୦୦୯ ସେମିଫାଇନାଲିଷ୍ଟ ୟାନ୍ନା ଓ୍ବିକ୍ମେୟର ମୁଖ୍ୟ ଡ୍ର’ରେ ସ୍ଥାନ ପାଇ ପାରିଛନ୍ତି। ଫ୍ଲିସିଂ ମିଡୋଜ୍ ହାର୍ଡକୋର୍ଟରେ ସେପ୍ଟେମ୍ବର ୧୩ରେ ୟୁ.ଏସ୍. ଓପନ୍ ଶେଷ ହେବା ପରେ ଟେନିସ ଟୁର୍ ୟୁରୋପର ରେଡ୍ କ୍ଲେକୁ ଉଠିଯିବ। ସେପ୍ଟେମ୍ବର ୨୭ରେ ଆମ୍ଭ ହେବାକୁଥିବା ଫ୍ରେଞ୍ଚ ଓପନ୍ରେ ଖେଳିବାକୁ ନିଶିକୋରୀ ନଜର ରଖିଛନ୍ତି। ଏକଦା ୪ ନମ୍ବର ର଼୍ୟାଙ୍କିଙ୍ଗକୁ ଉନ୍ନୀତ ହୋଇଥିବା ଜାପାନର ଏହି ୩୦ବର୍ଷୀୟ ଖେଳାଳି ବର୍ତ୍ତମାନ ୩୧ ନମ୍ବର ସ୍ଥାନରେ ରହିଛନ୍ତି। ନିଶିକୋରୀ ୨୦୧୪ ଫ୍ଲଶିଂ ମିଡୋଜ୍ ଫାଇନାଲରେ ମାରିନ୍ ସିଲିକ୍କଠାରୁ ହାରିଯାଇଥିଲେ। ୨୦୧୬ ଏବଂ ୨୦୧୮ରେ ସେ ନ୍ୟୁୟର୍କରେ ଜଣେ ସେମିଫାଇନାଲିଷ୍ଟ ମଧ୍ୟ ଥିଲେ।
