ପୋର୍ଟ ଅଫ୍ ସ୍ପେନ୍,୨୮।୮(ପି.ଟି.): ଏଠାରେ ଚାଲିଥିବା ହିରୋ କ୍ୟାରିବିୟାନ ପ୍ରିମିୟର ଲିଗ୍ (ସିପିଏଲ୍)ରେ ଅଲ ରାଉଣ୍ଡର ଡ୍ବେନ ବ୍ରାଭୋ ଇତିହାସ ସୃଷ୍ଟି କରିଛନ୍ତି। ସେହିପରି ପ୍ରବୀଣ ତାମ୍ବେ ପ୍ରଥମ ଭାରତୀୟ କ୍ରିକେଟର ଭାବେ ସିପିଏଲ୍ରେ ପଦାର୍ପଣ କରିଛନ୍ତି। ଏହି ଲିଗ୍ରେ ଟ୍ରିନ୍ବାଗୋ ନାଇଟ୍ ରାଇଡର୍ସ ବର୍ଷା ବାଧାପ୍ରାପ୍ତ ମ୍ୟାଚ୍ରେ ସେଣ୍ଟ ଲୁସିଆ ଜୌକ୍ସକୁ ଡକ୍ଓ୍ବର୍ଥ/ଲୁଇସ୍ ନିୟମରେ ୬ ଉଇକେଟରେ ପରାସ୍ତ କରିଛି। ଏଥି ସହିତ ଟ୍ରିନ୍ବାଗୋ ନାଇଟ୍ ରାଇଡର୍ସ କ୍ରମାଗତ ଚତୁର୍ଥ ବିଜୟ ହାସଲ କରିଛି। ଏହି ବିଜୟରେ ଡ୍ବେନ ଓ ତାଙ୍କ ଭାଇ ଡାରେନ୍ ବ୍ରାଭୋ ପ୍ରମୁଖ ଭୂମିକା ଗ୍ରହଣ କରିଥିଲେ।
ପରିବର୍ତ୍ତିତ ବିଜୟ ଲକ୍ଷ୍ୟ ୭୨ ରନକୁ ନାଇଟ୍ ରାଇଡର୍ସ ଅତି ସହଜରେ ହାସଲ କରିଥିଲା। ଡ୍ବେନ ପ୍ରଥମ ବୋଲର ଭାବେ ୫୦୦ ଟି୨୦ ଓ ସିପିଏଲ୍ରେ ୧୦୦ତମ ଉଇକେଟ ହାସଲ କରିଛନ୍ତି। ସେହିପରି ଡାରେନ୍ ୨ଟି ଛକା ସହାୟତାରେ ୧୩ ବଲରୁ ୨୩ ରନ ସଂଗ୍ରହ କରିଥିଲେ। ଫଳରେ ନାଇଟ୍ ରାଇଡର୍ସ ଗୋଟିଏ ଓଭର ବାକି ରଖି ୯ ଓଭରରେ ବିଜୟ ହାସଲ କରିନେଇଥିଲା। ଏଥିସହିତ ଡାରେନ୍ ପ୍ରଥମ ଖେଳାଳି ଭାବେ ସିପିଏଲ୍ରେ ୧୦୦ଟି ଛକା ମାରିବାର ରେକର୍ଡ ହାସଲ କରିଛନ୍ତି। ବୁଧବାର ସିପିଏଲ୍ରେ ଆଉ ଏକ ମାଇଲଖୁଣ୍ଟ ମଧ୍ୟ ସ୍ଥାପନ ହୋଇଛି। ୪୮ ବର୍ଷୀୟ ତାମ୍ବେ ପ୍ରଥମ ଭାରତୀୟ କ୍ରିକେଟର ଭାବେ ସିପିଏଲ୍ରେ ପଦାର୍ପଣ କରିଛନ୍ତି। ସେ ନାଜିବୁଲ୍ଲା ଜର୍ଡାନଙ୍କୁ ଉଇକେଟ ହାସଲ କରିଥିଲେ।
ବର୍ଷା ବାଧାପ୍ରାପ୍ତ ମ୍ୟାଚ୍ରେ ଟସ୍ ଜିତି ନାଇଟ ରାଇଡର୍ସ ଫିଲ୍ଡିଂ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି ସେଣ୍ଟ ଲୁସିଆ ୧୭.୧ ଓଭରରେ ୬ ଉଇକେଟ ହରାଇ ୧୧୧ ରନ ସଂଗ୍ରହ କରିଥିଲା। ଦଳ ତରଫରୁ ମହମ୍ମଦ ନବୀ ସର୍ବାଧିକ ଅପରାଜିତ ୩୦ ରନ ସଂଗ୍ରହ କରିଥିଲେ। ଅନ୍ୟମାନଙ୍କ ମଧ୍ୟରେ ନାଜିବୁଲ୍ଲା ଜର୍ଡାନ ୨୧, ରାହଖିମ କର୍ନଓ୍ବାଲ ୧୮ ରନ ସଂଗ୍ରହ କରିଥିବା ବେଳେ ନାଇଟ୍ ରାଇଡର୍ସ ତରଫରୁ ଡ୍ବେନ ବ୍ରାଭୋ ୨ ଉଇକେଟ ନେଇଥିଲେ।
ଜବାବରେ ନାଇଟ୍ ରାଇଡର୍ସ ୮ ଓଭରରେ ୪ ଉଇକେଟ ହରାଇ ପରିବର୍ତ୍ତିତ ଟାର୍ଗେଟ୍ ୭୨ ରନ ସଂଗ୍ରହ କରି ନେଇଥିଲା। ଦଳ ତରଫରୁ ଡାରେନ୍ ୨୩, କଳିନ ମୁନରୋ ୧୭, ଉଇକେଟକିପର ବ୍ୟାଟ୍ସମ୍ୟାନ ଟିମ୍ ସେଇଫର୍ଟ ଅପରାଜିତ ୧୫ ରନ ସଂଗ୍ରହ କରିଥିଲେ। ବୋଲିଂରେ ସେଣ୍ଟ ଲୁସିଆ ତରଫରୁ କେସରିକ୍ ଓ୍ବିଲିୟମ୍ସ ୨ ଉଇକେଟ ଅକ୍ତିଆର କରିଥିଲେ।
