କେନ୍ଦ୍ରାପଡ଼ା ଅଫିସ, ୧୨ା୮: କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକ ବଡମୋହନପୁର ପଞ୍ଚାୟତ ଦେଉଳି ଗ୍ରାମ ଓ ମହାକାଳପଡ଼ା ବ୍ଲକ ବଳିପାଳ ପଞ୍ଚାୟତ କଳପଡା ଗ୍ରାମ ମଝିରେ ନୀଳକଣ୍ଠେଶ୍ୱର (ବିଲ ମହାଦେବ) ମନ୍ଦିର। ମନ୍ଦିର ପାଖକୁ ଲାଗି ୨୦୨୦ ମସିହାରେ ଗ୍ରାମୀଣ ପାର୍କ ନିର୍ମାଣ ହୋଇଥିଲା। ତେବେ ଏହି ପାର୍କ ଏବେ ବଣରେ ପରିଣତ ହୋଇଥିବା ବେଳେ ପ୍ରକଳ୍ପ ଅର୍ଥ ୯,୨୫,୦୧୩ ଟଙ୍କା ବ୍ୟର୍ଥ ହୋଇଛି। ସେହିପରି ମନ୍ଦିର ନିକଟରେ ଶ୍ରଦ୍ଧାଳୁଙ୍କ ପାଇଁ ଆଶାନୁରୂପକ ସୁବିଧା ମିଳୁନାହିଁ। ଏପରି ଅଭିଯୋଗ ଉତ୍କଳମଣି ଯୁବକ ସଂଘ ଓ ସାମାଜିକ କର୍ମୀ ସୁନୀଲ କୁମାର ଗନ୍ତାୟତ ଆଣି କେନ୍ଦ୍ରାପଡ଼ା ଜିଲାପାଳ ଓ ରାଜ୍ୟ ସଂସ୍କୃତି ବିଭାଗ ନିରୀକ୍ଷକଙ୍କୁ ସମାଧାନ ପାଇଁ ନିବେଦନ କରିଛନ୍ତି। ଏ ସମ୍ପର୍କରେ ସଂଘ ସଭାପତି ଗୌତମ ଚରଣ ବେହେରା ଓ ସାମାଜିକ କର୍ମୀ ଗନ୍ତାୟତ କହିଛନ୍ତି, କେନ୍ଦ୍ରାପଡ଼ା ସହରଠାରୁ ୨୫ କିମି ଦୂରରେ ଥିବା ଏହି ମନ୍ଦିରରେ ପ୍ରତ୍ୟେକ ଦିନ ୫୦୦ରୁ ଅଧିକ ଶ୍ରଦ୍ଧାଳୁ ବିଲ ମହାଦେବଙ୍କୁ ପୂଜାର୍ଚ୍ଚନା କରିଥା’ନ୍ତି। ସୋମବାର ଓ ସଂକ୍ରାନ୍ତିରେ ଭିଡ଼ ଅଧିକ ହୋଇଥାଏ। ତେବେ ଏହି ମନ୍ଦିରରେ ଶ୍ରଦ୍ଧାଳୁଙ୍କ ବିଶ୍ରାମ ପାଇଁ କୌଣସି ବ୍ୟବସ୍ଥା ନାହିଁ। ପ୍ରତିବର୍ଷ ଏଠାରେ ଦୁଇ ହଜାରରୁ ଅଧିକ ବିବାହ ହେଉଥିଲେ ମଧ୍ୟ ରୋଷଘର ଓ ଅନ୍ୟ ସୁବିଧା ନାହିଁ। ସେହିପରି ୨୦୧୯- ୨୦ ଆର୍ଥିକ ବର୍ଷରେ ୯,୨୫,୦୧୩ ଟଙ୍କାର ଗ୍ରାମୀଣ ପାର୍କ ଏଠାରେ ନିର୍ମାଣ ହୋଇଛି। ତେବେ ଏହି ପାର୍କ ଏବେ ବଣବୁଦାରେ ପରିପୂର୍ଣ୍ଣ ହୋଇଛି। ଏହାର ଉନ୍ନତୀକରଣ ପାଇଁ ଦୃଷ୍ଟି ଦେବାକୁ ସେମାନେ ଦାବି କରିଛନ୍ତି।
