ରେଙ୍ଗାଲି,୩ା୯(ଡି.ଏନ.ଏ.): ପଶ୍ଚିମ ଓଡ଼ିଶାର ଗଣପର୍ବ ନୂଅଁାଖାଇ ଅବସରରେ ଏକ ନିଆରା ଉଦାହରଣ ସୃଷ୍ଟି କରିଛି ସମ୍ବଲପୁର ଜିଲା ରେଙ୍ଗାଲି ବ୍ଲକର ଗୋଲାମାଲ ଗ୍ରାମ। ଏହି ପର୍ବରେ ପଶ୍ଚିମ ଓଡ଼ିଶାର ଘରେ ଘରେ ପରିବାର ସହିତ ନୂଆଁ ଖାଇବାର ପରମ୍ପରା ରହିଛି। ହେଲେ ଗୋଲାମାଲ ଗାଁର ଗୋଟିଏ ଜାଗାରେ ସମସ୍ତେ ନୂଆଁଖାଇ ପାଳନ କରି ଗୋଟିଏ ପରିବାର ବୋଲି ପ୍ରମାଣିତ କରିଛନ୍ତି। ଜାତି, ବର୍ଣ୍ଣ, ଧର୍ମ ନିର୍ବିଶେଷରେ ସମସ୍ତେ ଏକ ହୋଇଛନ୍ତି। ସବୁ ମତଭେଦକୁ ଭୁଲି ଗୋଟିଏ ଜାଗାରେ ୧୮୦ ପରିବାରର ୮୦୦ ସଦସ୍ୟ ନବାନ୍ନ ଗ୍ରହଣ କରିଛନ୍ତି। ଗୁରୁବାର ମଧ୍ୟାହ୍ନରେ ଗାଁ ସମଲେଶ୍ବରୀ ମନ୍ଦିର ପ୍ରାଙ୍ଗଣରେ ସମସ୍ତେ ଏକାଠି ହୋଇ ନବାନ୍ନ ଗ୍ରହଣ କରିବାର ଦୃଶ୍ୟ ନିଆରା ଥିଲା। ଧାର୍ଯ୍ୟ ସମୟରେ ଘରେ ନିଜର ଇଷ୍ଟଦେବୀଙ୍କୁ ପୂଜା କରିସାରିବା ପରେ ସମଲେଶ୍ବରୀ ମନ୍ଦିରରେ ସମସ୍ତେ ନବାନ୍ନ ପୂଜା କରିବା ପରେ ଗାଁର ବୟୋଜ୍ୟେଷ୍ଠ ବ୍ୟକ୍ତିଙ୍କୁ ନବାନ୍ନ ଦେଇଥିଲେ। ନବାନ୍ନ ଖାଇ ଗ୍ରାମବାସୀ ପରସ୍ପରକୁ ନୂଆଁଖାଇ ଜୁହାର ଜଣାଇଥିଲେ। ଗାଁର ଝିଅବୋହୂ ଏକାଠି ହୋଇ ପିଠାପଣା ତିଆରି କରିବା ସହ ଭାତ, ଡାଲି, ତରକାରି, ଖିରି ରୋଷେଇ କରିଥିଲେ। ଏହି ଅବସରରେ ଗାଁର ବୟୋଜ୍ୟେଷ୍ଠ ଷୋକିଲାଲ ସାହୁ, ରଞ୍ଜିତ ସାହୁ, ସଚିତା ବିଶ୍ୱାଳ, ରୂପିନ୍ଦ୍ର ସାହୁ, ସନ୍ତୋଷ ବିଶ୍ୱାଳ, ଦୀନବନ୍ଧୁ ବାରିକଙ୍କୁ ଉପଢୌକନ ଓ ମାନପତ୍ର ଦିଆଯାଇ ସମ୍ବର୍ଦ୍ଧିତ କରାଯାଇଥିଲା।
