ବାରଙ୍ଗ,୧୪।୮(ଲିଙ୍ଗରାଜ ରାଉତ): ପ୍ରାଣୀ ଉଦ୍ୟାନ ନନ୍ଦନକାନନକୁ ଆସିବେ ନୂଆ ଅତିଥି। ଏଥିପାଇଁ ନନ୍ଦନକାନନ ପକ୍ଷରୁ ପ୍ରସ୍ତୁତି ପର୍ବ ଆରମ୍ଭ ହୋଇଯାଇଛି। ପ୍ରତିଷ୍ଠା ଦିବସ ପୂର୍ବରୁ ନୂଆ ପ୍ରାଣୀମାନନ୍ତୁ ଆଣି ପର୍ଯ୍ୟଟକଙ୍କୁ ନୂଆବର୍ଷର ଭେଟି ଦେବାକୁ ନନ୍ଦନକାନନ ଯୋଜନା କରିଛି। ନୂତନ ଜ୍ଞାନକୌଶଳ ସାଙ୍ଗକୁ ପ୍ରାକୃତିକ ପରିବେଶର ଛାପ ଦିଆଯାଇ ନୂଆ ରୂପରେଖରେ ଶୋଭା ପାଇବାକୁ ଯାଉଛି ପ୍ରାଣୀ ଉଦ୍ୟାନର ବିଭିନ୍ନ ଖୁଆଡ଼।
ନନ୍ଦନକାନନ ପ୍ରତିଷ୍ଠା ଦିବସ ଡିସେମ୍ବର ୨୯ ତାରିଖରେ ପାଳନ କରାଯିବ। ଏହାକୁ ଦୃଷ୍ଟିରେ ରଖି ନୂଆ ନୂଆ ଜୀବଜନ୍ତୁ ଆଣିବା ପାଇଁ ନନ୍ଦନକାନନ ଯୋଜନା କରିଛି। ଏହି ଯୋଜନା ଆଧାରରେ ସ୍ବୀକୃତିପ୍ରାପ୍ତ ପ୍ରାଣୀ ଉଦ୍ୟାନଗୁଡ଼ିକରୁ ୪ଟି ନୀଳ ୱାଇଲ୍ଡବିଷ୍ଟ, ୪ଟି ଚିତା, ୪ଟି ଜେବ୍ରା, ୪ ନାଲି କଙ୍ଗାରୁଙ୍କୁ ନନ୍ଦନକାନନ ଆଣିବା ପାଇଁ ଯୋଜନା କରାଯାଇଛି। ଏହାସହ ଏକ ସଂସ୍ଥା ଦ୍ୱାରା ୨ଟି ଅଣ୍ଡିରା ଓ ୨ଟି ମାଈଙ୍କୁ ମିଶାଇ ୪ଟି ଜେବ୍ରା ଆଣିବା ପାଇଁ ଆନୁଷ୍ଠାନିକ ଭାବେ କାର୍ଯ୍ୟାଦେଶ ଦିଆଯାଇଛି। ନନ୍ଦନକାନନକୁ ୨ଟି ଅଣ୍ଡିରା ଓ ୨ଟି ମାଈଙ୍କୁ ମିଶାଇ ମୋଟ ୪ଟି ଚିତାବାଘ ଆଣିବାକୁ ଯୋଜନା ରହିଛି। ବିରଳ ପ୍ରଜାତିର ଚିତାବାଘ ପାଇଁ ଖୋଲା, ସମତଳ ଏବଂ ଘାସଭରା ଅଞ୍ଚଳର ଆବଶ୍ୟକତା ରହିଛି। ଚିତାର ପ୍ରାକୃତିକ ସ୍ବଭାବ ଓ ପରିବେଶକୁ ଦୃଷ୍ଟିରେ ରଖି ନନ୍ଦନକାନନରେ ସେହି ଅନୁସାରେ ଆବାସସ୍ଥଳୀ ଓ ଅନ୍ୟାନ୍ୟ ସୁବିଧା ବିକଶିତ କରାଯାଇଛି ବୋଲି ନନ୍ଦନକାନନ ପ୍ରାଣୀ ଉଦ୍ୟାନ ଉପନିର୍ଦେଶକ ପ୍ରଦୀପ ମିରାସେ ସୂଚନା ଦେଇଛନ୍ତି। ଖାଲି ଚିତାବାଘ ନୁହେଁ, ଅଷ୍ଟ୍ରେଲିଆରୁ ୪ଟି ରେଡ୍ କଙ୍ଗାରୁଙ୍କୁ ମଧ୍ୟ ନନ୍ଦନକାନନ ଆଣିବାକୁ ଯୋଜନା ହୋଇଛି। ଏଥିପାଇଁ ନନ୍ଦନକାନନରେ ଅଷ୍ଟ୍ରେଲିଆ ଆଡ୍ଭେଞ୍ଜର ଓ ଆଫ୍ରିକୀୟ ସାଭାନା ନାମରେ ନୂଆ ଥିମାଟିକ୍ ଡିସ୍ପ୍ଲେ ଜୋନ୍ ବିକଶିତ କରିବାକୁ ଯାଉଛି। ଅଷ୍ଟ୍ରେଲିଆ ଆଡ୍ଭେଞ୍ଚରରେ ୪ଟି ଆଧୁନିକ ଖୁଆଡ଼ ରହିବ। ଅଷ୍ଟ୍ରେଲିଆର ଶୁଷ୍କ ଘାସଭୂମି ଓ ଜଙ୍ଗଲ ପରିବେଶକୁ ଅନୁକରଣ କରି ଏହି ଖୁଆଡ଼ଗୁଡ଼ିକୁ ତିଆରି କରାଯିବ। ଏହି ଜୋନ୍ରେ କଙ୍ଗାରୁ, କ୍ୟାସୋୱାରୀ ଏବଂ ୱାଲାବି ଭଳି ଅଷ୍ଟ୍ରେଲିଆର ପ୍ରସିଦ୍ଧ ବନ୍ୟପ୍ରାଣୀଙ୍କୁ ରଖାଯିବ। ଫଳରେ ପର୍ଯ୍ୟଟକମାନେ ନନ୍ଦନକାନନରେ ବସି ଅଷ୍ଟ୍ରେଲିଆର ବିଶିଷ୍ଟ ଜୈବ ବିବିଧତାର ଅନୁଭୂତି ପାଇପାରିବେ। ଆଫ୍ରିକୀୟ ସାଭାନାରେ ଆଫ୍ରିକାର ଅନ୍ୟତମ ପ୍ରମୁଖ ତୃଣଭୂମି ପ୍ରଜାତିକୁ ପ୍ରଦର୍ଶନ କରି ସଂରକ୍ଷଣ ସମ୍ବନ୍ଧୀୟ ଶିକ୍ଷା ଦେବାରେ ସହାୟକ ସାଜିବ ବୋଲି ଉପନିର୍ଦ୍ଦେଶକ ମିରାସେ କହିଛନ୍ତି।
Dharitri – Odisha’s No.1 Odia Daily
