ବ୍ରହ୍ମପୁର ଅଫିସ,୧୪।୬(ନରସିଂହ ସାହୁ): ଗଞ୍ଜାମ ଜିଲା ରାଜନୀତିରେ ଗୋପାଳପୁର ଚର୍ଚ୍ଚାରେ ରହିଛି। ୨୦୨୪ ସାଧାରଣ ନିର୍ବାଚନ ପାଖେଇ ଆସୁଥିବାରୁ ଏହି ବିଧାନସଭା କ୍ଷେତ୍ରରୁ କିଏ ବିଜେଡି ପ୍ରାର୍ଥୀ ହେବ ସେ ନେଇ ଆଲୋଚନା ଜୋର ଧରିଛି। ୨୦୧୯ ନିର୍ବାଚନରେ ଜିତିଥିବା ପ୍ରଦୀପ ପାଣିଗ୍ରାହୀ ଦୁଇ ବର୍ଷ ତଳୁ ବିଜେଡିରୁ ବହିଷ୍କୃତ ହୋଇଥିବାରୁ ସେ ଏବେ ସ୍ବାଧୀନ ଭାବେ ଗଣନା ହୋଇଛନ୍ତି। ତେଣୁ ଆଗାମୀ ନିର୍ବାଚନରେ ବିଜେଡିରୁ ନୂଆ ଚେହେରା ପ୍ରାର୍ଥୀ ହେବା ସ୍ପଷ୍ଟ ହୋଇଥିବା ଅଞ୍ଚଳବାସୀ ଆଲୋଚନା କରୁଛନ୍ତି।
ସ୍ବାଧୀନତା ପରବର୍ତ୍ତୀ ୧୯୫୧-୫୨ ଓ ୧୯୫୭ ନିର୍ବାଚନ ପର୍ଯ୍ୟନ୍ତ ଗୋପାଳପୁର ନିର୍ବାଚନ ମଣ୍ଡଳୀର ନାଁ ନ ଥିଲା।୧୯୬୧ ନିର୍ବାଚନ ବେଳେ ରଙ୍ଗେଇଲୁଣ୍ଡା ବ୍ଲକ ଓ ଗୋପାଳପୁର ସହରାଞ୍ଚଳକୁ ନେଇ ଡ଼ୁରା ନିର୍ବାଚନ ମଣ୍ଡଳୀ ହୋଇଥିଲା। ୧୯୭୧ ନିର୍ବାଚନ ବେଳେ ଏହା ଗୋପାଳପୁର ନିର୍ବାଚନ ମଣ୍ଡଳୀ ହୋଇଥିଲା। ଗୋପାଳପୁର ବିଧାନସଭା କ୍ଷେତ୍ର ଅତୀତରେ କଂଗ୍ରେସ ଗଡ଼ ଥିଲା। ଜରୁରୀକାଳୀନ ପରିସ୍ଥିତି ପରେ ହୋଇଥିବା ୧୯୭୭ ନିର୍ବାଚନରେ ଦେଶବ୍ୟାପୀ ତତ୍କାଳୀନ ଜନତା ପାର୍ଟି ହାୱା ଥିବା ବେଳେ ଗୋପାଳପୁରରୁ କଂଗ୍ରେସ ପ୍ରାର୍ଥୀ ଘନଶ୍ୟାମ ବେହେରା ବିଧାୟକ ହୋଇଥିଲେ। ପରବର୍ତ୍ତି ୧୯୮୦ ଓ ୧୯୮୫ ନିର୍ବାଚନରେ ମଧ୍ୟ ସେ କଂଗ୍ରେସରୁ ଜିତି ହାଟ୍ରିକ ଅର୍ଜନ କରିଥିଲେ। ୧୯୯୦ ଓ ୧୯୯୫ ନିର୍ବାଚନରେ ଜନତା ଦଳରୁ ଏବଂ ୨୦୦୦ ନିର୍ବାଚନରେ ବିଜେଡିରୁ ଜିତିଥିବା ରାମଚନ୍ଦ୍ର ସେଠୀ ଲଗାତର ୩ ଥର ଜିତି ସେ ମଧ୍ୟ ହାଟ୍ରିକ କଲେ।୨୦୦୪ ନିର୍ବାଚନରେ କଂଗ୍ରେସରୁ ତ୍ରିନାଥ ବେହେରା ବିଧାୟକ ନିର୍ବାଚିତ ହେଲେ। ୨୦୦୯ ନିର୍ବାଚନ ବେଳେ ସେହି ବିଧାନସଭା କ୍ଷେତ୍ର ଅନୁସୂଚିତ ଜାତି ପାଇଁ ଥିବା ସଂରକ୍ଷିତ ହଟିଥିଲା ଏବଂ ସାଧାରଣ ବର୍ଗ ପାଇଁ ଉଦ୍ଧିଷ୍ଟ ହେଲା।
୨୦୦୯ ରୁ ୧୯ ମଧ୍ୟରେ ହୋଇଥିବା ୩ ନିର୍ବାଚନରେ ବିଜେଡିରୁ ପ୍ରଦୀପ କୁମାର ପାଣିଗ୍ରାହି ଲଗାତର ନିର୍ବାଚିତ ହୋଇ ହାଟ୍ରିକ ହୋଇଥିଲେ। ସେ ମୁଖ୍ୟମନ୍ତ୍ରୀ ତଥା ଦଳ ସଭାପତିଙ୍କ ଅତି ନିକଟତର ହୋଇପାରିଥିଲେ। ପ୍ରଦୀପ ୩ ଥର ଜିତି ହାଟ୍ରିକ ହୋଇଥିବା ବେଳେ ତାଙ୍କ ନିକଟତମ ଭାଜପା ପ୍ରତିଦ୍ୱନ୍ଦ୍ୱି ବିଭୂତି ଜେନା ୨୦୦୯ ରୁ ୧୯ ମଧ୍ୟରେ ୩ ଥର ହାରି ପରାଜିତରେ ହାଟ୍ରିକ ହୋଇଥିଲେ। ୨୦୨୦ ଡିସେମ୍ବର ଶେଷ ବେଳକୁ ପ୍ରଦୀପଙ୍କୁ ଜନ ବିରୋଧୀ ଅଭିଯୋଗରେ ବିଜେଡିରୁ ବହିଷ୍କାର କରାଯାଇଛି। ତେଣୁ ଆଗାମୀ ନିର୍ବାଚନରେ ବିଜେଡି ନୂଆ ଚେହେରାଙ୍କୁ ପ୍ରାର୍ଥୀ କରିବାର ସ୍ପଷ୍ଟ ହୋଇଛି। ଯାହାକୁ ବିଜେଡି ଟିକେଟ ମିଳିବ ସେ କଡ଼ା ମୁକାବିଲାର ସାମ୍ନା କରିବାକୁ ପଡ଼ିବ। ଗୋପାଳପୁରରେ ପ୍ରଦୀପଙ୍କ ନିଜସ୍ବ ସଂଗଠନ ଅଛି। ଅନ୍ୟପକ୍ଷରେ ସେଠାରେ ୧୯ ନିର୍ବାଚନରେ ଭାଜପାର ଭୋଟ ହାର ଯଥେଷ୍ଟ ବଢ଼ିଛି। ୨୦୧୪ ନିର୍ବାଚନରେ ବିଜେଡି ପ୍ରାର୍ଥୀ ପାଣିଗ୍ରାହି ୨୦ ହଜାରରୁ ଅଧିକ ଭୋଟରେ ଭାଜପାର ଜେନାଙ୍କୁ ପରାସ୍ତ କରିଥିବା ବେଳେ ୨୦୧୯ ନିର୍ବାଚନରେ ମାତ୍ର ୨୬୭୩ ଭୋଟ ଅଧିକ ପାଇ ବିଜେଡିରୁ ଜିତିଥିଲେ ପ୍ରଦୀପ। ଇତିମଧ୍ୟରେ ପଦ୍ମ ଦଳର ସଂଗଠନ ବିସ୍ତାର କରାଯାଇଛି। ପାଣିଗ୍ରାହିଙ୍କ ସମର୍ଥକମାନେ ବିଜେଡିକୁ ଚ୍ୟାଲେଞ୍ଜ କରି ପ୍ରଦୀପ ସେନା ଗଠନ କରିଛନ୍ତି। ଏଭଳି ସ୍ଥିତିରେ ଆଗାମୀ ନିର୍ବାଚନରେ ବିଜେଡି ପ୍ରାର୍ଥୀ ଷଣ୍ଢୁଆସି ଆକ୍ରମଣର ସମ୍ମୁଖୀନ ହେବା ରାଜନୀତି ବିଶ୍ଲେଷକ ଆଗୁଆ ଅନୁମାନ କରୁଛନ୍ତି। ତେଣୁ ଗୋପାଳପୁରେ ମିଶନ ୨୪ ନିର୍ବାଚନ ୩ ପ୍ରମୁଖ ଦଳ ବିଜେଡି, ଭାଜପା ଓ କଂଗ୍ରେସ ପାଇଁ ଚ୍ୟାଲେଞ୍ଜ ହେବା ଚର୍ଚ୍ଚା ହେଉଛି।
