ଭୁବନେଶ୍ୱର,୧୩।୪(ବ୍ୟୁରୋ): ଚିନ୍ତା ଓ ଚେତନା ପକ୍ଷରୁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଚଳିତ ବର୍ଷର ‘ନୀଳଚକ୍ର ସମ୍ମାନ’ ପ୍ରଦାନ କରାଯାଇଛି। ରାଷ୍ଟ୍ରପତି ଭବନରେ ଆୟୋଜିତ କାର୍ଯ୍ୟକ୍ରମରେ ଅନୁଷ୍ଠାନ ସଦସ୍ୟ ବାବା ରାମନାରାୟଣ ଦାସ ମହାରାଜଙ୍କଠାରୁ ରାଷ୍ଟ୍ରପତି ଏହି ସମ୍ମାନ ଗ୍ରହଣ କରିଥିଲେ। ସମ୍ମାନ ଫଳକ ସହ ନାଗୀ ଖଣ୍ଡୁଆ ପାଟ, ଆଜ୍ଞାମାଳ, ପତାକା, ମହାପ୍ରସାଦ ଆଦି ପ୍ରଦାନ କରାଯାଇଥିଲା। ସମ୍ମାନ ଗ୍ରହଣ ଅବସରରେ ରାଷ୍ଟ୍ରପତି ମୁର୍ମୁ କହିଲେ, ମାନବ ସମାଜକୁ ସତ୍ମାର୍ଗ ଓ ପ୍ରକୃତି ଅଭିମୁଖୀ କରାଇବା ବର୍ତ୍ତମାନର ଶ୍ରେଷ୍ଠ ଆହ୍ବାନ। ଧରିତ୍ରୀ ମା’ ପାଇଁ ସମସ୍ତେ ସଜାଗ ହୋଇ କାମ କରିବା ଉଚିତ। ଧରିତ୍ରୀ ବଞ୍ଚତ୍ଲେ ଆମେ ବଞ୍ଚତ୍ବା। ମଣିଷ ଭିତରେ ଦିବ୍ୟତ୍ୱର ବିକାଶ ଓ ପରିପ୍ରକାଶ ହେବା ଦରକାର ବୋଲି ରାଷ୍ଟ୍ରପତି କହିଛନ୍ତି।
ଅଧ୍ୟକ୍ଷ ଶଶିଭୂଷଣ ବେହେରା ଓଡ଼ିଶାର ୩ ବରପୁତ୍ର ହରେକୃଷ୍ଣ ମହତାବ, ବିଜୁ ପଟ୍ଟନାୟକ ଓ ନନ୍ଦିନୀ ଶତପଥୀଙ୍କ ଅଧ୍ୟକ୍ଷତାରେ ଅନୁଷ୍ଠାନ ୪୫ ବର୍ଷରେ ପଦାର୍ପଣ କରିଥିବା କହିଥିଲେ। ମହାସଚିବ ସୁରେନ୍ଦ୍ର ଦାସ କହିଲେ, ନୀଳଚକ୍ର ସମ୍ମାନ ଅଷ୍ଟଧାତୁରେ ପୂଜିତ। ଆଧ୍ୟାତ୍ମଶକ୍ତି ନୀଳଚକ୍ର ବିଶ୍ୱର ଶ୍ରେଷ୍ଠ ବ୍ୟକ୍ତିତ୍ୱଙ୍କୁ ପ୍ରଦାନ କରାଯାଇଥାଏ। ସମସ୍ତଙ୍କ ପ୍ରିୟ ତଥା ଓଡ଼ିଶାର ଗର୍ବ ରାଷ୍ଟ୍ରପତିଙ୍କୁ ଏହି ସମ୍ମାନ ପ୍ରଦାନ କରିବା ସହିତ ଅନୁଷ୍ଠାନ ତାଙ୍କ ଆଶୀର୍ବାଦ ଲୋଡ଼ୁଛି ବୋଲି ପ୍ରକାଶ କରିଥିଲେ। ଅନୁଷ୍ଠାନର ରାଜ୍ୟ ସଭାପତି ସହଦେବ ସାହୁ, କାଦମ୍ବିନୀ ପତ୍ରିକାର ସମ୍ପାଦିକା ଡ. ଇତି ସାମନ୍ତ, ସାଂସ୍କୃତିକ ପରାମର୍ଶଦାତ୍ରୀ ପଦ୍ମଶ୍ରୀ କୁମ୍କୁମ୍ ମହାନ୍ତି, ସୁବ୍ରତ ପଟ୍ଟନାୟକ, ସତ୍ୟବ୍ରତ ମହାନ୍ତି, ସୂର୍ଯ୍ୟ ନାରାୟଣ ଦାସ ପ୍ରମୁଖ ଉପସ୍ଥିତ ଥିଲେ। କାର୍ଯ୍ୟକ୍ରମ ପରେ ଡ. ବିଜୟ କୁମାର ନାୟକଙ୍କ ଦ୍ୱାରା ମହାପ୍ରସାଦ ସେବନ କରାଯାଇଥିଲା।
