ଇଞ୍ଜିନ ହେଉଛି ଗାଡିର ମୁଖ୍ୟ ଅଂଶ। ଏହା ଯେତେ ପାଓ୍ବାରଫୁଲ, ଗାଡ଼ି ସେତେ ଭଲ ଚାଲେ ଓ ତା’ର ଚାହିଦା ସେତେ ଅଧିକ ରହେ। ଇଞ୍ଜିନର ପାଓ୍ବାରକୁ ସାଧାରଣତଃ ହର୍ଷପାଓ୍ବାରରେ ମପାଯାଇଥାଏ। ତେଣୁ ଗାଡ଼ି କିଣିବାବେଳେ ଗ୍ରାହକ ସବୁବେଳେ ଇଞ୍ଜିନ କେତେ ହର୍ଷପାଓ୍ବାରର ବୁଝିଥାଏ। ତେବେ ‘ନେଚର୍ମୋବିଲ’ ନାମକ ଏକ ଗାଡ଼ିକୁ ଦେଖିଲେ ଲାଗେ ସତରେ ତାହା ଏକ ପ୍ରକୃତ ହର୍ଷ ପାଓ୍ବାର ଗାଡ଼ି। କାରଣ ଗାଡ଼ି ପଛଭାଗର ଟ୍ରାନ୍ସପରେଣ୍ଟ ଅଂଶକୁ ଦେଖିଲେ ତା’ ମଧ୍ୟରେ ଏକ ଘୋଡ଼ା ଠିଆ ହୋଇଥିବା ଦେଖିପାରିବେ। ଆଉ ଘୋଡ଼ାଟି ଏଥିରେ ଥିବା ଏକପ୍ରକାର ଟ୍ରେଡମିଲ୍ ଉପରେ ଠିଆ ହୋଇଥାଏ। ଘୋଡ଼ାଟି ଦୌଡ଼ିବା ସହ ଗାଡ଼ିଟି ଗତିଶୀଳ ହୁଏ। ଆଗରେ ବସିଥିବା ଚାଳକ ଗାଡ଼ିର ଷ୍ଟିୟରିଂ ସମ୍ଭାଳନ୍ତି। ଘୋଡ଼ା ଯେତେ ବେଗରେ ଦୌଡ଼େ ଗାଡ଼ିର ବେଗ ସେତେ ବଢ଼ିଥାଏ। ଲମ୍ବା ସିଧା ରାସ୍ତାରେ ତ ଗାଡ଼ି ୭୦-୮୦ କି.ମି. ବେଗରେ ଗତି କରେ। ଏଥିରେ ଏକ ସେନ୍ସର ଲାଗିଥାଏ, ଯାହା କି ଘୋଡ଼ା ଶରୀରର ତାପମାତ୍ରା ବଢ଼ିଲେ ଅବା ଘୋଡ଼ା କ୍ଲାନ୍ତ ହୋଇଗଲେ ଜଣାଇଦିଏ। ଏହାପରେ ଘୋଡ଼ାକୁ ବିଶ୍ରାମ ଦେଇ ଗାଡ଼ିରେ ଲାଗିଥିବା ଡିସି ମୋଟରକୁ ଚାଲୁ କରାଯାଏ। ଆଉ ଗାଡ଼ି ଏକ ନିର୍ଦ୍ଦିଷ୍ଟ ଗତିରେ ଚାଲିବାକୁ ଆରମ୍ଭ କରେ। ଗାଡ଼ି ଭିତରେ ଘୋଡ଼ାର ଖାଇବା ବ୍ୟବସ୍ଥା ସହ ମଳତ୍ୟାଗ କଲେ ତାକୁ ଡିସପୋଜ୍ କରିବା ବ୍ୟବସ୍ଥା ବି କରାଯାଇଛି। ତେଣୁ ଘୋଡ଼ାର କୌଣସି ସମସ୍ୟା ଗାଡ଼ିରେ ହୋଇ ନ ଥାଏ। ଆଉ ଗାଡ଼ିଟି ସମ୍ପୂର୍ଣ୍ଣ ପରିବେଶ ଉପଯୋଗୀ।
