ଭୁବନେଶ୍ୱର, ୧୯।୩(କ୍ରୀଡ଼ା ପ୍ରତିନିଧି)-ସ୍ଥାନୀୟ କଳିଙ୍ଗ ଷ୍ଟାଡିୟମରେ ଚାଲିଥିବା ସର୍ବପ୍ରଥମ ହକି ଇଣ୍ଡିଆ ଜାତୀୟ ଏକାଡେମୀ ମହିଳା ହକି ଟୁର୍ନାମେଣ୍ଟର ସବ୍ଜୁନିୟର ବିଭାଗରେ ଓଡ଼ିଶା ନାଭାଲ ଟାଟା ହକି ହାଇ ପରଫର୍ମାନ୍ସ ସେଣ୍ଟର (ଏନଟିଏଚ୍) ବିଜୟୀ ହୋଇଛି। ଗୁରୁବାର ଓଡ଼ିଶା ଦଳ ୮-୦ ଗୋଲରେ ଜୟ ଭାରତ ହକି ଏକାଡେମୀକୁ ପରାସ୍ତ କରିଛି। ବିଜୟୀ ଦଳ ପକ୍ଷରୁ ଟୁଟି ଇଲାନୀ ୨୨, ୩୭ ଓ ଅଧିନାୟିକା ମୁନମୁନି ଦାସ ୧୬ ଓ ୫୬ତମ ମିନିଟରେ ୨ଟି ଲେଖାଏ ଗୋଲ ଦେଇଥିବାବେଳେ ଅସିମା ରାଉତ ୨ୟ, ପ୍ରିୟା ଟପ୍ପୋ ୩୪, ସନ୍ଦମ ବାବିରାନି ୯ମ ଓ ସୁପ୍ରିୟା ଗୁଜୁର ୫୦ତମ ମିନିଟରେ ଗୋଟିଏ ଲେଖାଏ ଗୋଲ ଦେଇଥିଲେ। ପ୍ରତିଯୋଗିତାରେ ଓଡ଼ିଶାର ଏହା କ୍ରମାଗତ ଦ୍ୱିତୀୟ ବିଜୟ। ବୁଧବାର ପ୍ରଥମ ମ୍ୟାଚରେ ଦଳ ମଧ୍ୟପ୍ରଦେଶ ହକି ଏକାଡେମୀକୁ ୫-୦ ଗୋଲରେ ପରାସ୍ତ କରିଥିଲା। ଦ୍ୱିତୀୟ ଦିବସରେ ଅନ୍ୟ ଦଳଗୁଡ଼ିକ ମଧ୍ୟରେ ଅଲିମ୍ପିଆନ ବିବେକ ସିଂ ହକି ଏକାଡେମୀ ୧୧-୦ରେ ତାମିଲନାଡ଼ୁ ହକି ଏକାଡେମୀ, ମୁମ୍ବାଇ ସ୍କୁଲ୍ସ ସ୍ପୋଟର୍ସ ଆସୋସିଏଶନ ୭-୦ ଗୋଲରେ ଧ୍ୟାନ ଚାନ୍ଦ ହକି ଏକାଡେମୀ ଏବଂ ସାଇ ଏକାଡେମୀ ୫-୦ ଗୋଲରେ ରାଉଣ୍ଡଗ୍ଲାସ ପଞ୍ଜାବ ହକି କ୍ଲବ ଏକାଡେମୀକୁ ହରାଇ ଦେଇଛି। ଜୁନିୟର ବିଭାଗରେ ଧ୍ୟାନଚାନ୍ଦ ହକି ଏକାଡେମୀ ୯-୧ ଗୋଲରେ ରାଜା କରନ ହକି ଏକାଡେମୀ, ଖାଲସା ହକି ଏକାଡେମୀ ଅମୃତସର ୯-୩ ଗୋଲରେ ସାଲ୍ୟୁଟ ହକି ଏକାଡେମୀ, ଘୁମାନହୀରା ରାଇଜର୍ସ ଏକାଡେମୀ ୪-୦ ଗୋଲରେ ରାଉଣ୍ଡଗ୍ଲାସ ପଞ୍ଜାବ ହକି କ୍ଲବ ଏକାଡେମୀ ଏବଂ ସାଇ ଏକାଡେମୀ ୬-୦ ଗୋଲରେ ଜୟଭାରତ ହକି ଏକାଡେମୀକୁ ପରାସ୍ତ କରିଛି।
