ନନ୍ଦପୁର,୧୩ା୩ (ଡି.ଏନ.ଏ.):ରାଜ୍ୟ ସରକାର ଶିକ୍ଷାର ବିକାଶ ଲାଗି ବିଭିନ୍ନ ଯୋଜନା କାର୍ଯ୍ୟକାରୀ କରୁଛନ୍ତି। ଏ ଦିଗରେ ବହୁ ଅର୍ଥ ବ୍ୟୟ କରୁଛନ୍ତି। ୫-ଟିରେ ବିଦ୍ୟାଳୟଗୁଡିକର ଆଧୁନିକୀକରଣ କରି ଶ୍ରେଣୀଗୃହ, ବିଜ୍ଞାନାଗାର ପ୍ରତିଷ୍ଠା କରି ଛାତ୍ରୀଛାତ୍ରଙ୍କୁ ଅଧ୍ୟୟନ କ୍ଷେତ୍ରରେ ଉତ୍ସାହିତ କରୁଛନ୍ତି। ଗୁଣବତ୍ତା ଶିକ୍ଷା ଲାଗି ଲକ୍ଷାଧିକ ଟଙ୍କାର ବୈଦ୍ୟୁତିକ ସାମଗ୍ରୀ କିଣି ବିଦ୍ୟାଳୟ ଗୁଡିକୁ ଯୋଗାଇ ଦେଉଛନ୍ତି। ଅଥଚ ଏହି ବୈଦ୍ୟୁତିକ ସାମଗ୍ରୀଗୁଡ଼ିକର ବ୍ୟବହାର ପାଇଁ ଥିବା ମୁଖ୍ୟ ଆବଶ୍ୟକତା ବିଦ୍ୟୁତ୍ ସଂଯୋଗ କରିବାକୁ ସରକାର ଭୁଲି ଯାଇଛନ୍ତି। କୋରାପୁଟ ଜିଲା ନନ୍ଦପୁର ବ୍ଲକରେ ଥିବା ୨୧ଟି ଉଚ୍ଚ ବିଦ୍ୟାଳୟ ମଧ୍ୟରୁ ୧୩ଟି ବିଦ୍ୟାଳୟକୁ ଅଦ୍ୟାବଧି ବିଦ୍ୟୁତ୍ ସଂଯୋଗ ହୋଇନାହିଁ।
ଖବରରୁ ଜଣାପଡିଛି, ନନ୍ଦପୁର ବ୍ଲକର ୨୩ ପଞ୍ଚାୟତରେ ପ୍ରାଥମିକ ଶିକ୍ଷାଠାରୁ ଦଶମଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କ ଅଧ୍ୟୟନ ନିମନ୍ତେ ୧୯୫ଟି ବିଦ୍ୟାଳୟ ରହିଛି। ୧୮ଟି ବିଦ୍ୟାଳୟ ମଙ୍ଗଳ ବିଭାଗ ଅଧୀନରେ ଓ ବଳକା ବିଦ୍ୟାଳୟ ସ୍କୁଲ ଓ ଗଣ ଶିକ୍ଷା ବିଭାଗ ଅଧୀନରେ ରହିଛି। ଦୁଇ ବିଭାଗ ଅଧୀନରେ ମୋଟ ୨୧ଟି ଉଚ୍ଚ ବିଦ୍ୟାଳୟ, ୨୪ ଉଚ୍ଚ ପ୍ରାଥମିକ ଓ ୧୫୦ଟି ପ୍ରାଥମିକ ବିଦ୍ୟାଳୟ ରହିଛି। ଏହି ବିଦ୍ୟାଳୟଗୁଡିକରେ ୧୪ ହଜାରରୁ ଊଦ୍ଧର୍ବ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ବର୍ତ୍ତମାନ ସରକାରଙ୍କ ୫-ଟି ଅଧୀନ ମୋ ସ୍କୁଲ ଯୋଜନାରେ ସମସ୍ତ ଉଚ୍ଚ ବିଦ୍ୟାଳୟକୁ ରୂପାନ୍ତରିତ କରି ବିଦ୍ୟାଳୟଗୁଡ଼ିକର ଆଧୁନିକୀକରଣ କରାଯାଉଛି। ମାତ୍ର ସେଥିରୁ ସ୍କୁଲ ଓ ଗଣଶିକ୍ଷା ବିଭାଗ ଅଧୀନରେ ଥିବା ୧୩ଟି ବିଦ୍ୟାଳୟ ହିକିମପୁଟ, ଅତଣ୍ଡା, ଖମରା, ଗୋଲୁର, ପରଜା ବଡପଡ଼ା, ବାଲଡ଼ା, କସନ୍ଦି, ରାଇସିଂ (ପେଟାଲ), ବିଜୁ ପଟ୍ଟନାୟକ ହାଇସ୍କୁଲ କୁଲାରସିଂ, କୁରୁମାପୁଟ, ରୁଜୁବା, ସେମେଳା, ହାତୀବାରି ବିଦ୍ୟାଳୟକୁ ଅଦ୍ୟାବଧି ବିଦ୍ୟୁତ୍ ସଂଯୋଗ କରାଯାଇ ନ ଥିବା ଜଣାପଡିଛି। ବିଦ୍ୟୁତ୍ ସଂଯୋଗ ନ ଥାଇ ବିଦ୍ୟାଳୟଗୁଡ଼ିକ ନିମନ୍ତେ କିଣାଯାଇଥିବା ଲକ୍ଷାଧିକ ଟଙ୍କାର ବୈଦ୍ୟୁତିକ ସରଞ୍ଜାମ କିଛି କାମରେ ନ ଲାଗି ପଡିରହି ନଷ୍ଟ ହେଉଛି। ଫଳରେ ଛାତ୍ରୀଛାତ୍ରମାନେ ଗୁଣବତ୍ତା ଶିକ୍ଷା ପାଇବାରେ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ସମ୍ପର୍କରେ ନନ୍ଦପୁର ବିଡିଓ ସୁଜିତ ମିଶ୍ର, ଡିପିଇପି ଯନ୍ତ୍ରୀ ଉମାକାନ୍ତ ମହାନ୍ତି, ବ୍ଲକ ଶିକ୍ଷାଧିକାରୀ ଦଇତାରୀ ଦାସଙ୍କୁ ପଚାରିବାରୁ ସେମାନେ କହିଲେ, ସମ୍ପୃକ୍ତ ବିଦ୍ୟାଳୟଗୁଡ଼ିକର ବାସ୍ତବ ସ୍ଥିତି ଅନୁଧ୍ୟାନ କରି ବିଦ୍ୟୁତ ସଂଯୋଗ ସହ ଅନ୍ୟ ସମସ୍ୟାଗୁଡ଼ିକ ଜିଲା ପ୍ରଶାସନ ଓ ରାଜ୍ୟ ସରକାରଙ୍କ ଶିକ୍ଷା ବିଭାଗକୁ ଅବଗତ କରାଯାଇଛି। ଏନେଇ ଅର୍ଥ ବ୍ୟୟ ବରାଦ ହେଲେ ସମସ୍ୟାର ସମାଧାନ ହୋଇପାରିବ ବେଲି ସେମାନେ କହିଛନ୍ତି। ଏ ଦିଗରେ ରାଜ୍ୟ ସରକାର ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ବୁଦ୍ଧିଜୀବୀ ମହଲରୁ ଦାବି ହେଉଛି।
