ନନ୍ଦପୁର/ପାଡୁଆ, ୨୨।୩ (ତୁଷାର କାନ୍ତ ମହାନ୍ତି/ଶଙ୍କର ପୂଜାରୀ): କୋରାପୁଟ ଜିଲା ନନ୍ଦପୁର ପୋଲିସ ଉପଖଣ୍ଡ ଥାନା ଅଞ୍ଚଳରେ ଦିନକୁ ଦିନ ଗାଡ଼ି ଚୋରି ସଂଖ୍ୟା ବଢିବାରେ ଲାଗିଛି। ଗତ ରବିବାର ରାତିରେ ନନ୍ଦପୁର ଥାନାରେ ପଞ୍ଜୀକୃତ ଗୋଟିଏ ବୋଲେରୋ ଓ ଗୋଟିଏ ବାଇକ ଚୋରି ଘଟଣାର ପୋଲିସ ଖିଅ ପାଉ ନ ଥିବା ବେଳେ ରବିବାର ବ୍ଲକ ଅଧୀନ ପାଡୁଆ ଥାନା ଅଞ୍ଚଳରେ ପୁନଃ ଗୋଟିଏ ବୋଲେରୋ ଗାଡି ଓ ୨ଟି ବାଇକ ଚୋରି ଘଟଣା ସାମ୍ନାକୁ ଆସିଛି। ପାଡୁଆ ପୋଲିସ ଗାଡି ମାଲିକଙ୍କ ଏତଲା ଆଧାରରେ ତଦନ୍ତ ଆରମ୍ଭ କରିଥିବା ଥାନାଧିକାରୀ ଅଶୋକ ବିଶୋଇ ସୂଚନା ଦେଇଛନ୍ତି। ଯାହା ନନ୍ଦପୁର ପୋଲିସ ଉପଖଣ୍ଡ ଅଧୀନ ୩ ଥାନା ନନ୍ଦପୁର, ପାଡୁଆ ଓ ମାଛକୁଣ୍ଡ ପୋଲିସର ଚିନ୍ତା ବଢ଼ାଇଛି। ସପ୍ତାହକ ମଧ୍ୟରେ ଦୁଇ ଥାନାରେ ଏଭଳି ଗାଡ଼ି ଚୋଧି ଘଟଣା କୋରାପୁଟ ପୋଲିସକୁ ଚୋରମାନଙ୍କ ଖୋଲା ଚ୍ୟାଲେଞ୍ଜ ବୋଲି ସାଧାରଣରେ ଚର୍ଚ୍ଚା ହେଉଛି।
ସୂଚନାନୁଯାୟୀ, ପାଡୁଆ ବଡ ଦେବତା ଛକରେ ଢ଼ାବା (ହୋଟେଲ) ଖୋଲିଥିବା ଦାର୍ଲିପୁଟ ନିବାସୀ ଭେଙ୍କେଟି ଖରାଙ୍କ ଓଆର୦୫ ଏଡବବ୍ଲ୍ୟୁ ୧୯୨୧ ନମ୍ବର୍ ବିଶିଷ୍ଟ ବୋଲେରୋ ଗାଡ଼ି, ପାଡୁଆ ନିବାସୀ ଆଇ ନାଗେଶ୍ୱର ରାଓ ଓ ଏସ ରାଜୁଙ୍କ ଓଡି୨୪ ବି ୯୬୬୩ (ହିରୋ) ଓଡି ୧୦ଜି ୮୧୯୨ (ଆପାଚି) ବାଇକ ଗତକାଲି (ଶନିବାର) ରାତିରେ ଗୁରୁତ୍ୱମାନେ ସେମାନଙ୍କ ଘର ସମ୍ମୁଖରୁ ଚୋରି କରି ନେଇଥିବା ଅଭିଯୋଗ କରିଛନ୍ତି। ପାଡୁଆ ପୋଲିସ ଘଟଣାର ତଦନ୍ତ କରୁଥିବା ଥାନାଧିକାରୀ ବିଶୋଇ ସୂଚନା ଦେଇଛନ୍ତି। କିନ୍ତୁ ୮ ଦିନ ମଧ୍ୟରେ ନନ୍ଦପୁର ପୋଲିସ ଉପଖଣ୍ଡ ଅଞ୍ଚଳରେ ଏଭଳି ୨ଟି ବୋଲେରୋ ଓ ୩ ବାଇକ ଚୋରି ଘଟଣା ଚର୍ଚ୍ଚାର ବିଷୟ ପାଲଟିଛି। ବୈଷୟିକ ଜ୍ଞାନ କୌଶଳ ସମ୍ପନ୍ନ ଆଜିର ପୋଲିସ ତ୍ୱରିତ ପଦକ୍ଷେପ ନେଇ ଚୋରଙ୍କୁ ଠାବ କରି ଅଞ୍ଚଳରୁ ଚୋରଭୟ ଦୂର କରନ୍ତୁ ବୋଲି ବୁଦ୍ଧିଜୀବୀ ମତପ୍ରକାଶ କରିଛନ୍ତି।
