ବାରଙ୍ଗ,୫ା୧(ଡି.ଏନ୍.ଏ.): ପ୍ରାଣୀ ଉଦ୍ୟାନ ନନ୍ଦନକାନନ ଓ ବଟାନିକାଲ ଗାର୍ଡେନ ମଙ୍ଗଳବାର ଠାରୁ ପୁଣି ପର୍ଯ୍ୟଟକଙ୍କ ପାଇଁ ଖୋଲାଯାଇଛି। ପର୍ଯ୍ୟଟକମାନେ ପ୍ରାଣୀ ଉଦ୍ୟାନର ବାଘ, ସିଂହ, ଭାଲୁ ଓ ତୃଣଭୋଜି ପ୍ରାଣୀଙ୍କୁ ଦେଖିବାର ମଜା ଉଠାଇଥିଲେ। ବଟାନିକାଲ ଗାର୍ଡେନରେ ବିଭିନ୍ନ କିସମର ଗଛଲତା, ଉଦ୍ୟାନ ବୁଲି ଦେଖିବା ସହିତ ପିଲାମାନଙ୍କୁ ଶିଶୁ ଉଦ୍ୟାନରେ ଦୋଳି ଖେଳାଇଥିଲେ। ତେବେ ବଣଭୋଜି ବନ୍ଦ ଥିବାରୁ ଉଦ୍ୟାନକୁ ଅଧିକ ସଂଖ୍ୟାରେ ପର୍ଯ୍ୟଟକ ଆସି ନ ଥିବା ଦେଖିବାକୁ ମିଳିଥିଲା। ତେବେ ଉଭୟ ଉଦ୍ୟାନରେ ଓମିକ୍ରନ ପାଇଁ ସାମାଜିକ ଦୂରତ୍ୱ ସହ ସାନିଟାଇଜ, ଥର୍ମାଲ ସ୍କ୍ରିନିଂ କରାଯାଇ ପର୍ଯ୍ୟଟକଙ୍କୁ ପ୍ରବେଶ ପାଇଁ ଅନୁମତି ପ୍ରଦାନ କରାଯାଇଥିଲା। ମାସ୍କ ପିନ୍ଧିବା ବାଧ୍ୟତାମୂଳକ ରହିଥିଲା। ନନ୍ଦନକାନନରେ ୧୧ ହଜାର ୧୨ଜଣ ପର୍ଯ୍ୟଟକ ଓ ରାଜ୍ୟ ଉଭିଦ ଉଦ୍ୟାନରେ ୨୯୯ଜଣ ପର୍ଯ୍ୟଟକ ଆସିଥିବା ନନ୍ଦନକାନନର ସହକାରୀ ବନ ସଂରକ୍ଷକ ଶରତ ଚନ୍ଦ୍ର ବେହେରା କହିଛନ୍ତି। ପ୍ରକାଶ ଯେ, ନୂଆବର୍ଷରେ ନନ୍ଦନକାନନ ଭିଡ଼ ହେବା ଆଶଙ୍କା କରି ପର୍ଯ୍ୟଟକଙ୍କ ହିତ ଦୃଷ୍ଟିରୁ ୫ଦିନ ପାଇଁ ନନ୍ଦନକାନନ ଓ ବଟାନିକାଲ ଗାର୍ଡେନକୁ କର୍ତ୍ତୃପକ୍ଷ ବନ୍ଦ ରଖିଥିଲେ।
