ବଲାଙ୍ଗୀର ଅଫିସ,୧୩।୧୧: ବଲାଙ୍ଗୀର ଜିଲା ପୁଇଁତଲା ଥାନା ବିଲେଇସର୍ଡା ଗ୍ରାମର ଜଣେ ଯୁବକ ନାଗସାପ ଧରିବା ପରେ ନଖକଟାରେ ସାପ ଦାନ୍ତ ଭାଙ୍ଗିବା ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ସମ୍ପୃକ୍ତ ଯୁବକ
ହେଲେ ଗ୍ରାମର ବୀର ବିଶ୍ୱାଳ(୩୫)। ବିଭିନ୍ନ ସ୍ଥାନରୁ ବିଷଧର ସାପ ବିଶେଷକରି ନାଗସାପ ଧରିବା ପରେ ଏକ ନଖକଟା ଯନ୍ତ୍ରରେ ସମ୍ପୃକ୍ତ ସାପର ବିଷଦାନ୍ତ ଭାଙ୍ଗିଦେଉଥିଲେ। ଏହି ଭିଡିଓ ଭାଇରାଲ ହେବା ପରେ ବଲାଙ୍ଗୀର ସ୍ନେକ୍ ହେଲ୍ପଲାଇନ୍ ପକ୍ଷରୁ ସ୍ଥାନୀୟ ବନ ବିଭାଗ ରେଞ୍ଜ ଅଫିସରେ ଅଭିଯୋଗ କରାଯାଇଛି। ସାପକୁ ନିର୍ଯାତନା ଦେଉଥିବା ଏବଂ ଏହାର ଭିଡିଓ କରି ଭାଇରାଲ କରୁଥିବା
ସମ୍ପୃକ୍ତ ଯୁବକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଭିଯୋଗ କରାଯାଇଛି। ସ୍ନେକ୍ ହେଲପଲାଇନ୍ ପକ୍ଷରୁ ଅନୋଜ
ମିଶ୍ର କହିଛନ୍ତି ଯେ, ସାପକୁ ଏଭଳି ନିର୍ଯାତନା ଦେବା ଆଇନସଙ୍ଗତ ନୁହେଁ। ଏନେଇ ବଲାଙ୍ଗୀର ବନବିଭାଗ ରେଞ୍ଜ ଅଫିସର କେଶବ କିଶୋର ନାୟକଙ୍କୁ
ପଚାରିବାରୁ ଅଭିଯୋଗ ଏବଂ ଭାଇରାଲ ଭିଡିଓ ପାଇବା ପରେ ବିଭାଗ ଟିମ୍ ତୁରନ୍ତ ବିଲେଇସର୍ଡା ଯାଇ ସମ୍ପୃକ୍ତ ଅଭିଯୁକ୍ତଙ୍କ ଘରେ ଚଢ଼ାଉ କରିଥିଲା। ତେବେ ଅଭିଯୁକ୍ତ କୁଆଡେ ପଳାଇ ଯାଇଥିବାରୁ ତାଙ୍କୁ ଧରାଯାଇ ପାରିନାହିଁ ବୋଲି ସେ କହିଛନ୍ତି। ଆଇନ ଅନୁଯାୟୀ ସମ୍ପୃକ୍ତ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ସେ ସୂଚନା ଦେଇଛନ୍ତି।
