ଗୋପାଳପୁର,୨୬ା୧୧(ନବୀନ ରାଜ ଆଚାରୀ): ଗଞ୍ଜାମ ଜିଲା ୧୬ ନଂ ଜାତୀୟ ରାଜପଥ କଡ଼ରେ ପରିବହନ ବିଭାଗର ଜଣେ କନିଷ୍ଠ ଏମଭିଆଇ ଓ କେତେ ଜଣ ଯୁବକ ଯାଞ୍ଚ ଆଳରେ ଚାନ୍ଦା ଆଦାୟ କରିବା ସେମାନଙ୍କ ପାଇଁ ମହଙ୍ଗା ପଡିଛି। ଗୋଳନ୍ଥରା ପୋଲିସ ଏମ୍ଭିଆଇ ଓ ୩ ଜଣ ଯୁବକଙ୍କୁ ଅଟକ ରଖି ତଦନ୍ତ ଜାରି ରଖିଛି। ଅନ୍ୟପକ୍ଷରେ ସୋମବାର ରାତିରେ ଏସ୍ପି ଡା. ସର୍ବଣା ବିବେକ ଏମ୍ ସମ୍ପୃକ୍ତ ୪ ଜଣଙ୍କୁ ଜେରା କରିଛନ୍ତି।
ଖବରରୁ ପ୍ରକାଶ, ଗୋଳନ୍ଥରା ଥାନା ଅଧୀନରେ ଗିରିସୋଲାଠାରୁ ଭାଲିଆଗଡ଼ ମଧ୍ୟରେ ଜିଲାର ଆଞ୍ଚଳିକ ପରିବହନ କାର୍ଯ୍ୟାଳୟର କନିଷ୍ଠ ଏମ୍ଭିଆଇ ଓ ସ୍ଥାନୀୟ ଯୁବକମାନେ ମିଳିତ ହୋଇ ୧୬ ନଂ. ଜାତୀୟ ରାଜପଥର ଯାତାୟାତ କରୁଥିବା ଟ୍ରକ, ଟ୍ରେଲର ଓ ଅନ୍ୟ ଓଭର ଲୋଡିଂ ଗାଡିଗୁଡିକ ଯାଞ୍ଚ କରି ଜରିମାନା କରି ରସିଦ କାଟି ଗାଡି ଛାଡିବା କିମ୍ବା ଜବତ କରିବା ନିୟମ ଥିବା ବେଳେ ଏହା ନ କରି ଯାଞ୍ଚ ଆଳରେ ଗାଡ଼ିଗୁଡିକରୁ ଜୋରକରି ଟଙ୍କା ଆଦାୟ କରୁଥିବା ନେଇ ଗତ ୫ ଦିନ ତଳେ ସାମାଜିକ ଗଣମାଧ୍ୟମରେ ଏକ ଭିଡ଼ିଓ ଭାଇରଲ ହୋଇଥିଲା।
ଏ ସମ୍ପର୍କରେ ବ୍ରହ୍ମପୁର ଏସ୍ପି ଡା. ସର୍ବଣା ବିବେକ ଏମ୍ ଜାଣିବା ପରେ ଘଟଣାକୁ ଗୁରୁତର ସହ ନେଇ ଅନୁସନ୍ଧାନ ଆରମ୍ଭ କରିଥିଲେ। ରବିବାର ଗିରିସୋଲାଠାରୁ ସୋରଳ ରୋଡ଼ ମଧ୍ୟରେ ପରିବହନ ବିଭାଗର ଅଧିକାରୀ ଓ କେତେ ଜଣ ଯୁବକ ଗାଡିଗୁଡ଼ିକୁ ଯାଞ୍ଚ କରି ଟଙ୍କା ଆଦାୟ କରୁଥିବା ନେଇ ପୋଲିସ ସୂଚନା ପାଇଥିଲା। ପୋଲିସର ଏକ ସ୍ବତନ୍ତ୍ର ଟିମ୍ ସେଠାକୁ ଯାଇ ଅନୁସନ୍ଧାନ କରିବା ପରେ ସେମାନଙ୍କୁ କାବୁ କରିଥିଲା। ସେମାନଙ୍କ ମଧ୍ୟରେ ଜଣେ କନିଷ୍ଠ ଏମ୍ଭିଆଇ, ଏବଂ ୩ଜଣ ଯୁବକ ଅଛନ୍ତି। ସମସ୍ତଙ୍କୁ ପୋଲିସ ଗୋଳନ୍ଥରା ଥାନାରେ ଅଟକ ରଖି ପଚରାଉଚରା ଜାରି ରଖିଛି। ରବିବାର ରାତିରେ ବ୍ରହ୍ମପୁର ଏସ୍ପି ଥାନାରେ ପହଞ୍ଚି ଏମଭିଆଇ ଓ ଯୁବକମାନଙ୍କୁ ପୃଥକ ପୃଥକ ଭାବେ ପଚରାଉଚରା କରିଥିଲେ। ଏହି ଘଟଣାରେ ଆଉ କେଉଁ କେଉଁ ଅଧିକାରୀମାନଙ୍କ ସମ୍ପୃକ୍ତି ରହିଛି ଓ କିଏ ମାଷ୍ଟର ମାଇଣ୍ଡ ରହିଛି ପୋଲିସ ତାହାର ଖୋଳତାଡ କରୁଛି।
ଖବର ଲେଖା ହେବା ସୁଦ୍ଧା ଥାନାରେ କୋଣସି ମାମଲା ରୁଜୁ ହୋଇନାହିଁ। ସୂଚନାଯୋଗ୍ୟ, ଗତ କିଛି ବର୍ଷ ହେଲା ୧୬ ନଂ ଜାତୀୟ ରାଜପଥ ଗିରିସୋଲା ଠାରୁ ଜଗନ୍ନାଥପୁର ମଧ୍ୟରେ ରାସ୍ତାରେ ପରିବହନ ବିଭାଗର ଅଧିକାରୀମାନେ ସ୍ଥାନୀୟ ଯୁବକଙ୍କୁ ଧରି ଗାଡିଗୁଡ଼ିକୁ ଯାଞ୍ଚ ଆଳରେ ଜୋର ଜବରଦସ୍ତ ଟଙ୍କା ମାଗିଥାନ୍ତି। କେହି ନ ଦେଲେ ଚାଳକମାନଙ୍କଠାରୁ କାଗଜପତ୍ର ନେଇ ତାଙ୍କ ହଇରାଣ କରିଥାନ୍ତି। ଏନେଇ ଅନେକ ଥର ପରିବହନ ବିଭାଗ ଉଚ୍ଚ ଅଧିକାରୀଙ୍କ ନିକଟରେ ଅଭିଯୋଗ ହେଲେ ମଧ୍ୟ କୋଣସି ପ୍ରକାରେ କାର୍ଯ୍ୟାନୁଷ୍ଠାନ ହୋଇନାହିଁ।
