ଭୁବନେଶ୍ୱର,୧୦।୬(ବ୍ୟୁରୋ): ପାରିବାରିକ କଳହକୁ ନେଇ ରାଜଧାନୀରେ ଗୋଟିଏ ପରେ ଗୋଟିଏ ଅଭାବନୀୟ ଘଟଣା ଘଟିବାରେ ଲାଗିଛି । କେଉଁଠି ବାପା ପୁଅକୁ ହତ୍ୟା କରୁଛି ତ ପୁଣି କେଉଁଠି ସ୍ବାମୀ ସ୍ତ୍ରୀକୁ , ଆଉ କେଉଁଠି ଭାଇ ଭାଇକୁ ହତ୍ୟା କରୁଛି। ଘରୋଇ କଳହରୁ ରାଗ ଏତେମାତ୍ରାରେ ବଢ଼ିଯାଉଛି ଯେ, ସବୁ ପ୍ରକାର ସମ୍ପର୍କ ତୁଚ୍ଛ ହୋଇଯାଉଛି। ଏଭଳି ଏକ ଘଟଣାକ୍ରମରେ ଭରତପୁର ଥାନା ଅନ୍ତର୍ଗତ ଘାଟିକିଆ ଗ୍ରାମରେ ଜଣେ ବ୍ୟକ୍ତି ୪ଦିନର ଶିଶୁ କନ୍ୟା କଥା ଚିନ୍ତା ନ କରି ସ୍ତ୍ରୀଙ୍କୁ ଧାରୁଆ ଛୁରିରେ ଅତି ନିର୍ମମ ଭାବେ ହତ୍ୟା କରିଛନ୍ତି। ଏପରି କି ୬ବର୍ଷର ଶିଶୁ କନ୍ୟାର ଗଳା କାଟି ହତ୍ୟା ଉଦ୍ୟମ କରିଛନ୍ତି। ହତ୍ୟାକାଣ୍ଡର ପ୍ରକୃତ କାରଣ ଜଣାପଡ଼ି ନ ଥିବାବେଳେ ନିଶା ପାଇଁ ହତ୍ୟା କରିଥିବା ପୋଲିସ ସନ୍ଦେହ କରୁଛି। ଅଭିଯୁକ୍ତ ସଞ୍ଜିତ ଦାସଙ୍କୁ କାବୁ କରି ବିଭିନ୍ନ ଦିଗକୁ ନେଇ ପଚରାଉଚରା କରୁଛି ପୋଲିସ ।
ନିଶା ଉଜାଡ଼ିଦେଲା ପରିବାର
ବର୍ତ୍ତମାନ ଘଟୁଥିବା ବିଭିନ୍ନ ଆପରାଧିକ କାର୍ଯ୍ୟକଳାପର ପ୍ରମୁଖ କାରଣ ହେଉଛି ନିଶା ସେବନ। ଯାହାର ଜ୍ୱଳନ୍ତ ଉଦାହରଣ ରାଜଧାନୀ ଭୁବନେଶ୍ୱର ଘାଟିିକିଆ ଅଞ୍ଚଳରେ ଦେଖିବାକୁ ମିଳିଛି। ନିଶାକୁ ଜୀବନର ସବୁ କିଛି ଭାବି ନିଜ ହସ ଖୁସିର ପରିବାରକୁ କ୍ଷଣିକରେ ସର୍ବନାଶ କରିଦେଇଛି । ସ୍ତ୍ରୀଙ୍କୁ ଛୁରିରେ ତଣ୍ଟି କାଟି ହତ୍ୟା କରିବା ପରେ ନିଜର ୬ ବର୍ଷର ଝିଅକୁ ମଧ୍ୟ ମାରିବାକୁ ଉଦ୍ୟମ କରିଛନ୍ତି ଅଭିଯୁକ୍ତ ସଞ୍ଜିତ ଦାସ।
ଜମିଦାର ପରିବାରରେ ରକ୍ତର ଛିଟା
ସ୍ତ୍ରୀ ହତ୍ୟାକାରୀ ସଞ୍ଜିତ ଏକ ଜମିଦାର ପରିବାରର। ପରିବାରରେ ଧନସମ୍ପତ୍ତିରେ ଅଭାବ ନ ଥିବାରୁ ସଞ୍ଜିତ ଟଙ୍କାର ଦୁରୁପୋଯୋଗ କରିଆସୁଥିଲେ। ଘରେ ଥିବା ଟଙ୍କା କିମ୍ବା ଗହଣାକୁ ବିକ୍ରି କରି ନିଶା ସେବନରେ ଉଡ଼ାଇ ଥିଲେ। ନିଶା ଖାଉଥିବାରୁ ପରିବାର ଲୋକେ ତାଙ୍କ ହାତରେ କେବେବି ଟଙ୍କା ଦେଉ ନ ଥିଲେ । ଫଳରେ ସଞ୍ଜିତ ପ୍ରତିଶୋଧ ପରାୟଣ ହେବା ସହ ପ୍ରାୟ ସମୟରେ ସ୍ତ୍ରୀ ସରସ୍ବତୀଙ୍କୁ ମାରଧର କରୁଥିଲେ। ଏପରିକି ସରସ୍ବତୀ ସ୍ଥାନୀୟ ଏକ ଘରୋଇ ହସ୍ପିଟାଲରେ ସିନିୟର ନର୍ସ ଭାବେ ଚାକିରି କରି ଯାହା ଟଙ୍କା ରୋଜଗାର କରୁଥିଲେ ଉକ୍ତ ଟଙ୍କା ମଧ୍ୟ ନିଶାରେ ଉଡାଇ ଦେଉଥିଲେ ସଞ୍ଜିତ। ବୁଧବାର ବିଳମ୍ବିତ ରାତିରେ କୌଣସି କାରଣଙ୍କୁ ଉଭୟଙ୍କ ମଧ୍ୟରେ ଝଗଡ଼ା ଲାଗିଥିଲା। ଏଥିରେ ଉତ୍କ୍ଷିପ୍ତ ହୋଇ ସଞ୍ଜିତ ସ୍ତ୍ରୀ ସରସ୍ବତୀଙ୍କୁ ଅତି ନିମର୍ମ ଭାବେ ହତ୍ୟା କରିଥିଲେ, ଯାହାକି ଜମିଦାର ପରିବାରରେ ରକ୍ତର ଛିଟା ଲାଗିଛି ବୋଲି ଗ୍ରାମବାସୀଙ୍କ ମୁହଁରୁ ଶୁଣିବାକୁ ମିଳୁଛି।
ହତ୍ୟାକାଣ୍ଡ ଭିଆଇବା ପରେ ବଖାଣିଲେ
ପାରିବାରିକ କଳହକୁ ନେଇ ଘର ଭିତରେ ନିଜ ସ୍ତ୍ରୀକୁ ହତ୍ୟା କରିବା ପରେ ୬ ବର୍ଷର ଝିଅର ତଣ୍ଟି ମଧ୍ୟ କାଟି ଦେଇ ଫେରାର ନହୋଇ ଘଟଣା ବିଷୟରେ ନିଜ ମା’କୁ ନିର୍ଭୟରେ କହିଲେ ଯା ଘର ଭିତରେ ବୋହୂକୁ ମାରି ଦେଇଛି। ଆଉ ନାତୁଣୀର ତଣ୍ଟି କାଟି ଦେଇଛି। ମରିନି ବରଂ ବଞ୍ଚିଛି । ତେବେ ପୁଅ ମୁହଁରୁ ଏଭଳି କଥା ଶୁଣି ଧୈର୍ଯ୍ୟହରା ହୋଇଯାଇଥିଲେ ମା କନକଲତା ଦାସ।
