ବ୍ରହ୍ମପୁର ଅଫିସ,୧୭ା୧୧: କୁକୁଡ଼ାଖଣ୍ଡି ବ୍ଲକ ଅନନ୍ତେଇ ଗ୍ରାମର ପୂର୍ବତନ ସରପଞ୍ଚ ପ୍ରଦୀପ ବିଷୋୟୀ ହତ୍ୟା ଘଟଣାର ମୁଖ୍ୟ ଷଡ଼ଯନ୍ତ୍ରକାରୀ ଦୁଇ ଭାଇଙ୍କୁ ବଡବଜାର ପୋଲିସ ଗିରଫ କରିଛି। ସେମାନେ ହେଲେ ଦିଗପହଣ୍ଡି ଥାନା ଅଧୀନ ବନ୍ଥପଲ୍ଲୀ ଗ୍ରାମର ବଳି ଚରଣ ପାଢ଼ୀ ଓ ତାଙ୍କ ଭାଇ ଶ୍ୟାମ ଚରଣ ପାଢ଼ୀ ବୋଲି ଟାଉନ୍ ଏସଡିପିଓ ବିଷ୍ଣୁପ୍ରସାଦ ପତି ସୂଚନା ଦେଇଛନ୍ତି। ଏହି ୨ ଜଣ ପ୍ରଦୀପଙ୍କୁ ହତ୍ୟା କରିବା ପାଇଁ ପ୍ରାୟ ୧ମାସ ପୂର୍ବରୁ ଷଡ଼ଯନ୍ତ୍ର କରିଥିଲେ। ଏଥିପାଇଁ ସେମାନେ ଅନ୍ୟ ଦୁଇଭାଇ ଜୟସେନ ସ୍ବାଇଁ ଓ ମିଥୁନ ସ୍ବାଇଁଙ୍କୁ ନିୟୋଜିତ କରିଥିବା ପୋଲିସ ପ୍ରମାଣ ପାଇଛି। ବଡ଼ବଜାର ଥାନା ପୋଲିସ ଏକ ମାମଲା(ନଂ୨୨୭/୨୧)ରେ ଅଭିଯୁକ୍ତ ବଳି ଓ ଶ୍ୟାମଙ୍କୁ ଗିରଫ ପରେ ବୁଧବାର କୋର୍ଟ ଚାଲାଣ କରିଛି।
ବ୍ରହ୍ମପୁର ଗେଟବଜାରରେ ରହୁଥିବା ଅନନ୍ତେଇ ଗ୍ରାମର ପୂର୍ବତନ ସରପଞ୍ଚ ପ୍ରଦୀପ ଗତ ୫ ତାରିଖ ସକାଳେ ତାଙ୍କ ସ୍କୁଟି ଧରି ଘରୁ ବାହାରିଥିଲେ। ସେ ଅନନ୍ତେଇ ଗ୍ରାମରେ ଥିବା ତାଙ୍କ ଫାର୍ମକୁ ଯାଉଥିଲେ। ସୁକୁଣ୍ଡା ପାଣି ଫ୍ୟାକ୍ଟ୍ରି ନିକଟ ରାସ୍ତା କଡରେ ସେ ପରିଶ୍ରା କରୁଥିବା ବେଳେ କେତେକ ଦୁର୍ବୃତ୍ତ ତାଙ୍କୁ ନିର୍ମମ ଭାବେ ହତ୍ୟା କରିଥିଲେ। ବଡ଼ବଜାର ଥାନା ପୋଲିସ ଏହି ଘଟଣାରେ ପ୍ରଦୀପଙ୍କ ପତ୍ନୀ ଗୀତାଞ୍ଜଳି ବିଷୋୟୀଙ୍କ ଅଭିଯୋଗ କ୍ରମେ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ପୂର୍ବ ଶତ୍ରୁତାକୁ କେନ୍ଦ୍ର କରି ପ୍ରଦୀପଙ୍କୁ ହତ୍ୟା କରାଯାଇଥିବା ଜଣାପଡ଼ିଥିଲା। ଏହି ଘଟଣାରେ ପୋଲିସ ଜଣେ ନାବାଳକ ସମେତ ୫ଜଣଙ୍କୁ ଗତ ୧୪ତାରିଖରେ କାବୁ କରିଥିଲା। ସେମାନେ ହେଲେ ବନ୍ଥପଲ୍ଲୀ ଗ୍ରାମର ଜୟସେନ ସ୍ବାଇଁ, ଭାଇ ମିଥୁନ, ଗଙ୍ଗା ସ୍ବାଇଁ ଓରଫ୍ ସାଗର, ନନ୍ଦନ ବେହେରା, କାହ୍ନୁ ବିଷୋୟୀ ଓରଫ୍ ଋଷି। ହତ୍ୟାକାଣ୍ଡରେ ସମ୍ପୃକ୍ତ ଆଉ କେତେଜଣଙ୍କୁ ଧରିବା ନେଇ ତଦନ୍ତରେ ଜଣାପଡ଼ିଥିଲା। ଏଣୁ ସେମାନଙ୍କ ସମ୍ପର୍କରେ ଅଧିକ ତଥ୍ୟ ହାସଲ କରିବା ପାଇଁ ପୋଲିସ ଜୟସେନ ଓ ମିଥୁନକୁ ମଙ୍ଗଳବାର ରିମାଣ୍ଡରେ ନେଇ ଜେରା କରିଥିଲା। ଜେରା ବେଳେ ଉଭୟେ ବଳି ଓ ଶ୍ୟାମର ନାମ ନେଇଥିଲେ। ତଦନ୍ତ ପରେ ବଳି ଓ ଶ୍ୟାମ ହତ୍ୟାକାଣ୍ଡର ଯୋଜନା କରିଥିଲେ ବୋଲି ପୋଲିସ ଜାଣିବାକୁ ପାଇଥିଲା। ଏ ଦିଗରେ ପୋଲିସକୁ ମଧ୍ୟ ଆବଶ୍ୟକ ପ୍ରମାଣ ଓ ଫୋନ୍ କଲ୍ ରେକର୍ଡ଼ ହସ୍ତଗତ ହୋଇଥିଲା। ସେପଟେ ଶ୍ୟାମ ଘଟଣା ପରେ ଫେରାର୍ ରହିଥିବାରୁ ପୋଲିସକୁ ଅଧିକ ସନ୍ଦେହ ହୋଇଥିଲା। ପୋଲିସ ଫୋନ୍ ଟ୍ରାକିଂ କରି ଶ୍ୟାମକୁ ରାୟଗଡାରୁ ଗିରଫ କରିଥିଲା। ସୂଚନା ଅନୁଯାୟୀ ୨୦୧୨ରେ ବଳି ଓ ଶ୍ୟାମଙ୍କ ଅନ ଜଣେ ବଡ଼ଭାଇ ରାମଚନ୍ଦ୍ର ପାଢ଼ୀଙ୍କୁ ହତ୍ୟା କରାଯାଇଥିଲା। ଏହି ମାମଲାର ପ୍ରତିଶୋଧ ନେବା ପାଇଁ ପ୍ରଦୀପଙ୍କୁ ହତ୍ୟା କରାଯାଇଥିବା ନେଇ ପୋଲିସ ତଦନ୍ତରେ ଜଣାପଡ଼ିଛି।
