ମୁମ୍ବାଇ,୧୬।୨: ଦକ୍ଷିଣ ଆଫ୍ରିକା ଦଳର ଅଧିନାୟକ ତଥା ଆଇପିଏଲ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଦଳର ଗୁରୁତ୍ୱପୂର୍ଣ୍ଣ ସଦସ୍ୟ କୁଇଣ୍ଟନ ଡି’ କକ୍ କ୍ରିକେଟରୁ କିଛି ସପ୍ତାହ ପାଇଁ ଦୂରେଇ ଯାଇଛନ୍ତି। ମାନସିକ ଅସୁସ୍ଥତା କାରଣରୁ ତାଙ୍କୁ ଏଭଳି ନିଷ୍ପତ୍ତି ନେବାକୁ ପଡ଼ିଛି। ଏ ନେଇ ସୂଚନା ଦେଇଛନ୍ତି ଦକ୍ଷିଣ ଆଫ୍ରିକା କ୍ରିକେଟର୍ସ ଆସୋସିଏଶନ (ଏସ୍ଏସିଏ) ମୁଖ୍ୟ ଆଣ୍ଡ୍ରୁ ବ୍ରିଟ୍କେ।
ଡାକ୍ତରଙ୍କ ପରାମଶ୍ର କ୍ରମେ ଡି’ କକ୍ କିଛି ସପ୍ତାହ ପାଇଁ କ୍ରିକେଟରୁ ବ୍ରେକ ନେଇଛନ୍ତି। ଦକ୍ଷିଣ ଆଫ୍ରିକା କ୍ରିକେଟର୍ସ ଆସୋସିଏଶନ ଓ କ୍ରିକେଟ୍ ଦକ୍ଷିଣ ଆଫ୍ରିକା (ସିଏସ୍ଏ) ତାଙ୍କୁ ସମର୍ଥନ କରିବା ଜାରି ରଖିବ ବୋଲି କହିଛନ୍ତି ଏସ୍ଏସିଏ ମୁଖ୍ୟ। ବାୟୋ ବବଲ ନିୟମ ଯୋଗୁ ତାଙ୍କୁ ପରିବାରବର୍ଗଠାରୁ ଦୂରେଇ ରହିବାକୁ ପଡ଼ିଥିଲା। ଗତ ବର୍ଷ ଅଗଷ୍ଟରେ ଆଇପିଏଲ ପାଇଁ ଏବଂ ପରେ ଇଂଲଣ୍ଡ ଓ ଶ୍ରୀଲଙ୍କା ବିପକ୍ଷ ଘରୋଇ ସିରିଜ୍ ନିମନ୍ତେ ତାଙ୍କୁ ବାୟୋ ବବଲରେ ରହିବାକୁ ପଡ଼ିଥିଲା। ସେ ପାକିସ୍ତାନ ବିପକ୍ଷରେ ସିରିଜ୍ ଖେଳିବା ଲାଗି ପାକିସ୍ତାନ ମଧ୍ୟ ଯାଇଥିଲେ। ତେବେ ଆସନ୍ତା ଏପ୍ରିଲ ମାସରେ ହେବାକୁ ଥିବା ଆଇପିଏଲ-୧୪ରେ ସେ ଖେଳିବେ କି ନାହିଁ, ତାହା ସ୍ପଷ୍ଟ କରାଯାଇ ନାହିଁ।
