କୋକସରା,୧୭ା୧୨(ଡି.ଏନ୍.ଏ.): କଳାହାଣ୍ଡି ଜିଲା ଧର୍ମଗଡ଼ ବିଧାୟକ ମୋଷଧି ବାଗଙ୍କୁ ଭେଟି ଧର୍ମଗଡ଼ ଉପଖଣ୍ଡ ୩ ବ୍ଲକର ଅଙ୍ଗନଓ୍ବାଡ଼ି ଓ ପାଚିକା କର୍ମୀ ଦାବିପତ୍ର ପ୍ରଦାନ କରିଛନ୍ତି। ରାଜ୍ୟରେ ଆଜିକୁ ୨୭ ଦିନ ହେବ ଭାରତୀୟ ମଜଦୁର ସଂଘ ସଂଲଗ୍ନ ଅଲ୍ ଓଡ଼ିଶା ଅଙ୍ଗନଓ୍ବାଡ଼ି ଓ ପାଚିକା କର୍ମୀମାନେ ୮ ଦଫା ସମ୍ବଳିତ ଦାବି ନେଇ ରାଜ୍ୟର ୩୧୬ ବ୍ଲକରେ ଥିବା ସମନ୍ବିତ ଶିଶୁ ବିକାଶ ପ୍ରକଳ୍ପ କାର୍ଯ୍ୟାଳୟ ସମ୍ମୁଖରେ ପ୍ରତିବାଦ ଧାରଣା ଓ ଆନ୍ଦୋଳନ ଜାରି ରଖିଛନ୍ତି। ଆଜି ଧର୍ମଗଡ଼ ଉପଖଣ୍ଡର କୋକସରା କଲମପୁର ଓ ଧର୍ମଗଡ଼ ବ୍ଲକରେ କାର୍ଯ୍ୟରତ ଶହ ଶହ ଅଙ୍ଗନଓ୍ବାଡ଼ି ଓ ପାଚିକା କର୍ମୀ ଏକତ୍ରିତ ହୋଇ କୋକସରାଠାରେ ଧର୍ମଗଡ଼ ବିଧାୟକଙ୍କୁ ଭେଟି ସମସ୍ୟା ଜଣାଇବା ସହ ୮ ଦଫା ଦାବିପତ୍ର ପ୍ରଦାନ କରିଛନ୍ତି। ଅଙ୍ଗନଓ୍ବାଡ଼ିଙ୍କ ଆନ୍ଦୋଳନ ଫଳରେ ତିନି ବ୍ଲକର ସମସ୍ତ ପ୍ରାକ୍ ବିଦ୍ୟାଳୟ, ଶିଶୁ, କିଶୋରୀ ବାଳିକା, ଗର୍ଭବତୀ ମହିଳାଙ୍କ ପାଇଁ ରହିଥିବା ଯୋଜନା ଠପ୍ ରହିଛି। ଆଜି କୋକସରା ବ୍ଲକ ସମନ୍ବିତ ଶିଶୁ ବିକାଶ ପ୍ରକଳ୍ପ କାର୍ଯ୍ୟାଳୟରୁ ଏକ ଶୋଭାଯାତ୍ରାରେ ବାହାରି କୋକସରା ବିଜେଡି କାର୍ଯ୍ୟାଳୟକୁ ଆସି ରାଜ୍ୟ ସରକାରଙ୍କ ଦୋମୁହାଁ ନୀତିର ପ୍ରତିବାଦ କରିଥିଲେ। ଦାବିପତ୍ର ପ୍ରଦାନ ସମୟରେ ଅଙ୍ଗନଓ୍ବାଡ଼ି କର୍ମୀ ଯସ୍ମିନ ପାତ୍ର, ସଞ୍ଜୀବନି ପାତ୍ର, ନିର ମହାନନ୍ଦ, ଦମୟନ୍ତୀ ବେଶ୍ରା, ଲଳିତା ନାଏକ, ସୌଦାମିନୀ ବେହେରା, ପାର୍ବତୀ ଜାଲ, ଇନ୍ଦୁମତୀ ବେଶ୍ରା, ପୁଷ୍ପାଞ୍ଜଳି ଶବର, ଜୟନ୍ତୀ ଶବର, ପବିତ୍ରୀ ପଣ୍ଡାଙ୍କ ସମେତ ୩ ବ୍ଲକର ଶତାଧିକ ମହିଳା କର୍ମୀ ଉପସ୍ଥିତ ଥିଲେ। ଦାବି ପୂରଣ ନ ହେଲେ ଭୟାବହ ଆନ୍ଦୋଳନ କରିବାକୁ ସେମାନେ ଚେତାବନୀ ଦେଇଛନ୍ତି।
