ନୀଳଗିରି, ୧୯।୮(ସ୍ବ.ପ୍ର):ସ୍ବାମୀଙ୍କ ପାଖରେ ରହୁଥିବା ବଡ଼ଝିଅକୁ ସାଙ୍ଗରେ ଆଣିବାକୁ ଉଦ୍ୟମ କରି ଜଣେ ମହିଳା, ତାଙ୍କ ବାପା, ଭଉଣୀ ଓ ଭାଇଙ୍କୁ ହଟହଟା ହେବାକୁ ପଡ଼ିଛି। ଝିଅକୁ ସାଙ୍ଗରେ ନେଇ ଯାଉଥିବା ସମ୍ପର୍କରେ ପରିବାର ଏବଂ ସମ୍ପର୍କୀୟ ଲୋକେ ଜାଣିପାରି ସେମାନଙ୍କୁ ଅଟକାଇବା ସହ ମାରପିଟ କରିଥିଲେ। ପରେ ନୀଳଗିରି ଥାନାରେ ଉଭୟପକ୍ଷ ଅଭିଯୋଗ କରିଥିଲେ। ଉଭୟଙ୍କ ମଧ୍ୟରେ ଆପୋଷ ସମାଧାନ ପରେ ମହିଳା ଜଣକ ଖାଲି ହାତରେ ଫେରିଥିଲେ। ୧୦ବର୍ଷ ପୂର୍ବେ ବାଲେଶ୍ୱର ଜିଲା ନୀଳଗିରି ବ୍ଲକ ମିତ୍ରପୁର ଅଞ୍ଚଳର ଭାଗବତ ରାଉତ ଭୁବନେଶ୍ୱର ଖଣ୍ଡଗିରି ଅଞ୍ଚଳର ସୁସଙ୍ଗୀତା ମଙ୍ଗରାଜଙ୍କୁ ପ୍ରେମ ବିବାହ କରିଥିଲେ। ବିବାହର ମାତ୍ର ୩ରୁ ୪ବର୍ଷ ସ୍ତ୍ରୀସ୍ବାମୀଙ୍କ ମଧ୍ୟରେ ସୁସମ୍ପର୍କ ରହିଥିଲା। ସେମାନଙ୍କ ଦୁଇଟି କନ୍ୟା ଜନ୍ମ ହୋଇଥିଲେ। ପରେ ଉଭୟଙ୍କ ମଧ୍ୟରେ ମତାନ୍ତର ହେବା ପରେ ସୁସଙ୍ଗୀତା ସାନ ଝିଅ ସହ ବାପ ଘର ଖଣ୍ଡଗିରିରେ ରହୁଥିଲେ। ଭାଗବତଙ୍କ ପାଖରେ ବଡ଼ଝିଅ ରହୁଥିବାବେଳେ ସେ ଏବେ ୭ମ ଶ୍ରେଣୀରେ ପଢୁଛନ୍ତି। ହେଲେ ମା’ ସୁସଙ୍ଗୀତା ବଡ଼ ଝିଅକୁ କିପରି ନିଜ ପାଖକୁ ଆଣିବେ ସେନେଇ ଶ୍ୱଶୁର ଘର ନିକଟ ଜଣେ ମଧ୍ୟସ୍ଥଙ୍କ ଯୋଗାଯୋଗରେ ରହୁଥିଲେ। ଗୁରୁବାର ଜନ୍ମାଷ୍ଟମୀ ଥିବାରୁ ସ୍କୁଲ ଛୁଟି ଥିଲା। ବଡ଼ ଝିଅ ସାଇକେଲ ଯୋଗେ ଟ୍ୟୁଶନ ଯାଉଥିବା ବେଳେ ଯୋଜନାବଦ୍ଧ ଭାବେ ସୁସଙ୍ଗୀତା ସମ୍ପର୍କୀୟଙ୍କ ସହ ଏକ କାର୍ ଯୋଗେ ମିତ୍ରପୁରରେ ପହଞ୍ଚତ୍ଥିଲେ। ମଧ୍ୟସ୍ଥ ଜଣକ ଝିଅକୁ ଆଣି ସୁସଙ୍ଗୀତାଙ୍କୁ ଦେଇଥିଲେ। ଝିଅକୁ ସାଙ୍ଗରେ ନେଇଯାଉଥିବା ସ୍ବାମୀ ଭାଗବତ ଜାଣିବାକୁ ପାଇ ତୁରନ୍ତ ବନ୍ଧୁବାନ୍ଧବଙ୍କୁ ଧରି କଣ୍ଟାବଣିଆଠାରେ କାର୍ ଅଟକାଇ ଝିଅକୁ ଉଦ୍ଧାର କରିଥିଲେ। ଘଟଣା ପ୍ରଚାରିତ ହେବା ପରେ ଘଟଣାସ୍ଥଳ ଲୋକାରଣ୍ୟ ହୋଇପଡ଼ିଥିଲା। ଉପସ୍ଥିତ ଲୋକେ ସୁସଙ୍ଗୀତା, ତାଙ୍କ ବାପା ସୁବାସ ଚନ୍ଦ୍ର ଓ ଭଉଣୀ ଭାଇଙ୍କୁ ମାରପିଟ୍ କରିଥିବା ଦେଖିବାକୁ ମିଳିଥିଲା।
