କ.ନୂଆଗାଁ/ବାଲିଗୁଡ଼ା,୧୮।୧୦(କାଳୀ ପ୍ରସାଦ ତ୍ରିପାଠୀ/ସଞ୍ଜୟ କୁମାର ପାଣିଗ୍ରାହୀ): ଜଣେ ମା’ ନିଜର ୪ ବର୍ଷର ଶିଶୁକନ୍ୟାକୁ ହତ୍ୟା କରି ଜଙ୍ଗଲରେ ପୋତିଦେଇଛନ୍ତି। କନ୍ଧମାଳ ଜିଲା ସାରଙ୍ଗଡ ଥାନା ଅନ୍ତର୍ଗତ ଗୁଟିଙ୍ଗିଆ ଗ୍ରାମରେ ଏଭଳି ଏକ ହୃଦୟ ବିଦାରକ ଘଟଣା ଘଟିଛି। ସାରଙ୍ଗଗଡ ପୋଲିସ ମଙ୍ଗଳବାର ମାଟିତଳୁ ଶିଶୁର ମୃତଦେହ ବାହାର କରି ହତ୍ୟାକରୀ ମା’ଙ୍କୁ ଗିରଫ କରିଛି। ସେ ହେଲେ ଗୁଟିଙ୍ଗିଆ ଗ୍ରାମର ରାକେଶ ଦଣ୍ଡିଆଙ୍କ ସ୍ତ୍ରୀ ପଦ୍ମିନୀ। ତାଙ୍କର ମାନସିକ ସ୍ଥିତି ଠିକ୍ ନଥିଲା ବୋଲି ପ୍ରାଥମିକ ତଦନ୍ତ ପରେ ପୋଲିସ କହିଛି।
ଗୁଟିଙ୍ଗିଆ ଗ୍ରାମର ରାକେଶ ଦଣ୍ଡିଆ ୫ ବର୍ଷ ପୂର୍ବେ ସେହି ଗାଁର ପଦ୍ମିନୀ ଦଣ୍ଡିଆଙ୍କୁ ବିବାହ କରିଥିଲେ। ସେମାନଙ୍କ ଏକ ଶିଶୁକନ୍ୟା ଜନ୍ମ ହୋଇଥିଲା। ଝିଅ ସୁରେଖା ସହ ଦମ୍ପତିଙ୍କ ସଂସାର ବେଶ ଖୁସିରେ ଚାଲିଥିଲା। ପରେ କୌଣସି କାରଣରୁ ସ୍ବାମୀ-ସ୍ତ୍ରୀଙ୍କ ମଧ୍ୟରେ ଝଗଡ଼ା ହୋଇଥିଲା। ଏଥିପାଇଁ ପଦ୍ମିନୀ ସ୍ବାମୀଙ୍କୁ ଛାଡ଼ି ୪ ବର୍ଷ ହେବ ଝିଅ ସହିତ ଅଲଗା ରହୁଥିଲେ। ଗତ ଶନିବାର କୌଣସି କାରଣରୁ ପଦ୍ମିନୀ ସୁରେଖାଙ୍କୁ ହତ୍ୟା କରି ଗାଁ ନିକଟସ୍ଥ ବାଡ୍ରିମୁଣ୍ଡା ଜଙ୍ଗଲରେ ପୋତିଦେଇଥିଲେ। ଶନିବାର ନିଜ ନାତୁଣୀ ନିଖୋଜ ହୋଇଥିବା ନେଇ ଅଜା ବିପିନି ବେହେରା ସାରଙ୍ଗଗଡ଼ ଥାନାରେ ଏତଲା ଦେଇଥିଲେ। ପୋଲିସ ଖୋଜାଖୋଜି ଚଳାଇଥିବାବେଳେ ଶିଶୁକନ୍ୟାଙ୍କୁ ମାରି ପୋତାଯାଇଥିବା କୌଣସି ସୂତ୍ରରୁ ଖବରପାଇଥିଲା। ଏହାପରେ ପୋଲିସ ମଙ୍ଗଳବାର ବାଡ୍ରିମୁଣ୍ଡା ଜଙ୍ଗଲରୁ ମାଟିତଳୁ ସୁରେଖାଙ୍କ ମୃତଦେହ ବାହାର କରି ବ୍ୟବଚ୍ଛେଦ ପାଇଁ ପଠେଇଛି। ଏ ନେଇ ପୋଲିସ ନଂ. ୧୨୬/୨୩ରେ ମାମଲା ରୁଜୁ କରିଛି। ଘଟଣାସ୍ଥଳକୁ ସାଇଣ୍ଟିଫିକ ଟିମ୍ ଯାଇ ତଦନ୍ତ ଚଳାଇଛି।
