ଜୟପୁର,୨୯ା୪ (ନି.ପ୍ର.)- ଦୀର୍ଘ ୨ ବର୍ଷର ବ୍ୟବଧାନ ପରେ ଗୋଟିଏ ବିଦ୍ୟାଳୟରେ ପରୀକ୍ଷା ଦେଲେ ଦଶମ ଶ୍ରେଣୀ ଛାତ୍ରୀଛାତ୍ର । ଜୟପୁରରେ ମା’ ଓ ପୁଅ ମାଟ୍ରିକ ପରୀକ୍ଷା ଦେବା ପରି ଖବର ସ୍ଥାନୀୟ ଅଞ୍ଚଳରେ ଆଲୋଚନାର ବିଷୟ ହୋଇଛି। ମା’ ଜ୍ୟୋସ୍ନାରାଣୀ ପାଢ଼ୀ (୩୬) ଜୟପୁର ସରକାରୀ ଉଚ୍ଚ ବିଦ୍ୟାଳୟରେ ପରୀକ୍ଷା ଦେଉଥିବା ବେଳେ ପୁଅ ଆଲୋକନାଥ ପାତ୍ର ପୂଜାରିପୁଟ ହାଇସ୍କୁଲରେ ପରୀକ୍ଷା ଦେଉଛନ୍ତି। ଜ୍ୟୋତ୍ସ୍ନାଙ୍କ ଘର ଜୟପୁର ବ୍ଲକ ଅନ୍ତର୍ଗତ ଜୟନ୍ତିଗିରି ପଞ୍ଚାୟତର ପୂଜାରିପୁଟ ଗ୍ରାମରେ। ଏନେଇ ଜ୍ୟୋତ୍ସ୍ନା କୁହନ୍ତି, ଆଜିର ପରୀକ୍ଷା ତାଙ୍କର ଭଲ ହୋଇଛି। ରାତିରେ ଘରକାମ ସରିଲା ପରେ ସେ ପାଠ ପଢୁଥିଲେ। ଏଥିପାଇଁ ସ୍ବାମୀ ତ୍ରିନାଥ ପ୍ରସାଦ ପାତ୍ରଙ୍କ ସହ ପରିବାର ଲୋକେ ସମସ୍ତେ ସହଯୋଗ କରୁଥିଲେ। ପାଠପଢାରେ ବୟସ କେବେ ବାଧକ ହୁଏ ନାହିଁ। ଯେଉଁମାନେ ବିଭିନ୍ନ କାରଣରୁ ମାଟ୍ରିକ ପାସ୍ କରିପାରିନାହାନ୍ତି ସେମାନେ ପରୀକ୍ଷା ଦେବାକୁ ସେ ପରାମର୍ଶ ଦେଇଛନ୍ତି।
