ଉମରକୋଟ,୨୮ା୬(ସନ୍ତୋଷ ଶତପଥୀ): ନବରଙ୍ଗପୁର ଜିଲା ରାଇଘର ବ୍ଲକରୁ ଆସିଛି ଏକ ଦୁଃଖଦ ଖବର। କୋଳି ତୋଳିବାକୁ ଯାଇ ମା’-ଝିଅଙ୍କ ଜୀବନ ଚାଲିଯାଇଛି। ଏହି ଘଟଣା ପରେ ଗାଁରେ ଶୋକର ଛାୟା ଖେଳିଯାଇଛି।
ନବରଙ୍ଗପୁର ଜିଲା ରାଇଘର ବ୍ଲକ ମୁଣ୍ଡିବେଡ଼ା ପଞ୍ଚାୟତ ଅନ୍ତର୍ଗତ ନିନାଶପାଣୀ ଗ୍ରାମରେ ଘଟିଛି ଏହି ଅଭାବନୀୟ ଘଟଣା। ମୃତକ ହେଲେ ଦୟମତି ମୁଦୁଲି (୪୫) ଓ ତାଙ୍କ ଝିଅ ଚମ୍ପା (୨୨)।
ସୂଚନା ଅନୁଯାୟୀ, ଉଭୟେ ନିଜ ଜମିରେ ଥିବା ଏକ କୁସୁମ ଗଛରୁ କୁସୁମ କୋଳି ତୋଳିବାକୁ ଯାଇଥିଲେ। ଏହି ସମୟରେ ରବିବାର ଅପରାହ୍ନ ୩ଟା ସମୟରେ ହଠାତ୍ ପାଗ ବଦଳିଯିବା ସହ ବର୍ଷା ଓ ଘଡ଼ଘଡ଼ି ଆରମ୍ଭ ହୋଇଥିଲା। ଠିକ ସେତିକିବେଳେ ବଜ୍ରପାତ ହେବାରୁ ମା’ ଓ ଝିଅ ଗୁରୁତର ହୋଇଥିଲେ। ଘଟଣାସ୍ଥଳରେ ହିଁ ଉଭୟଙ୍କ ମୃତ୍ୟୁ ଘଟିଥିବା ସୂଚନା ମିଳିଛି। ମୃତ ଚମ୍ପା ମୁଦୁଲି ସ୍ଥାନୀୟ ବିଦ୍ୟାଳୟରେ ଶିଶୁ ସେବିକା ଭାବେ କାର୍ଯ୍ୟରତ ଥିଲେ। ଏକାସାଙ୍ଗରେ ମା’ ଓ ଝିଅଙ୍କ ମୃତ୍ୟୁ ଘଟଣା ପରିବାର ସହ ସମଗ୍ର ଗ୍ରାମକୁ ଶୋକାକୁଳ କରିଦେଇଛି। ବର୍ଷା ସମୟରେ ବଜ୍ରପାତର ଆଶଙ୍କା ଥିଲେ ଖୋଲା ସ୍ଥାନ ଓ ଗଛ ତଳେ ନ ରହିବାକୁ ପାଣିପାଗ ବିଭାଗ ବାରମ୍ବାର ପରାମର୍ଶ ଦେଉଛି ତଥାପି ସଚେତନତା ଅଭାବରୁ ଏହିଭଳି ଅଘଟଣ ଘଟୁଛି।
