ବୋକାରୋ, ୩୦।୭: ଷ୍ଟିଲ୍ ସିଟି ଭାବେ ପରିଚିତ ଝାଡ଼ଖଣ୍ଡର ବୋକାରୋ ସହରରେ ଏକ ଦୁଃଖଦ ଘଟଣା ଘଟିଯାଇଛି। କରୋନା ସନ୍ଦିଗ୍ଧ ପୁଅର ମୃତ୍ୟୁ ଖବର ଶୁଣିବା ପରେ ଏହାକୁ ଗ୍ରହଣ କରି ନ ପାରି ମା’ ମଧ୍ୟ ଆଖି ବୁଜି ଦେଇଛନ୍ତି। ୧୨ ଘଣ୍ଟା ଅନ୍ତରରେ ଉଭୟ ପୁଅ ଓ ସ୍ତ୍ରୀଙ୍କୁ ହରାଇ ପରିବାର ମୁଖ୍ୟ ଅସହାୟ ହୋଇପଡ଼ିଛନ୍ତି। ଏହି ଘଟଣାଟି ବେରୋମା ସବ୍ଡିଭିଜନ ଉପରଘାଟ ଅଞ୍ଚଳରେ ଘଟିଛି। ଏଠାରେ ବ୍ୟବସାୟ କରୁଥିବା ନରେଶ ପ୍ରସାଦ ଭର୍ନଓ୍ବାଲ, ସ୍ତ୍ରୀ ଜ୍ୟୋତି ଓ ପୁଅ ପ୍ରିୟାଂଶୁଙ୍କ ସହ ରୁହନ୍ତି। ପ୍ରଥମ ସ୍ତ୍ରୀ’ଙ୍କ ମୃତ୍ୟୁବରଣ ପରେ ନରେଶ ଜ୍ୟୋତିଙ୍କୁ ଦ୍ୱିତୀୟ ବିବାହ କରିଥିଲେ। ପ୍ରଥମ ସ୍ତ୍ରୀଙ୍କ ଏକ ପୁଅ ନୀଲ କୁମାର ମଧ୍ୟ ତାଙ୍କ ପାଖରେ ରୁହେ। କିନ୍ତୁ ଗତ ଜୁଲାଇ ୨୭ରେ ପ୍ରିୟାଂଶୁଙ୍କ ସ୍ବାସ୍ଥ୍ୟବସ୍ଥା ଖରାପ ହୋଇଥିଲା। ଏହାପରେ ତାଙ୍କୁ ଜାଲାନସ୍ଥିତ ଏକ ହସ୍ପିଟାଲରେ ଚିକିତ୍ସା ଲାଗି ଭର୍ତ୍ତି କରାଯାଇଥିଲା। କିନ୍ତୁ ଏହା ପରଦିନ ସକାଳେ ପ୍ରିୟାଂଶୁ ଆଖି ବୁଜି ଦେଇଥିଲେ। ଯେହେତୁ ପ୍ରିୟାଂଶୁଙ୍କ କରୋନା ଟେଷ୍ଟ ରିପୋର୍ଟ ଆସି ନ ଥିଲା, ତେଣୁ ମେଡିକାଲ ପକ୍ଷରୁ ନ ଛୁଇଁ ଅନ୍ତିମ ସଂସ୍କାର କରିବା ପାଇଁ କୁହାଯାଇଥିଲା। ଏହାପରେ ପରିବାର ଲୋକେ ଗ୍ରାମକୁ ଆସି ସ୍ଥାନୀୟ ଏକ ନାଳ ନିକଟରେ ପ୍ରିୟାଂଶୁଙ୍କୁ ପୋତି ଦେଇଥିଲେ। ପୁଅକୁ ହରାଇବା ଘଟଣାକୁ କିନ୍ତୁ ମା’ ଜ୍ୟୋତି ସହଜେ ଗ୍ରହଣ କରିପାରି ନ ଥିଲେ। ସେ ଖାଇବା ପିଇବା ଛାଡ଼ି ଦେଇଥିଲେ। ଫଳରେ ତାଙ୍କ ଦେହ ମଧ୍ୟ ସେହିଦିନ ଗୁରୁତର ହୋଇଯାଇଥିଲା। ଶେଷରେ ତାଙ୍କୁ ମଧ୍ୟ ହସ୍ପିଟାଲରେ ଭର୍ତ୍ତି କରାଯାଇଥିଲା। କିନ୍ତୁ ବୁଧବାର ଦିନ ସେ ଶେଷ ନିଶ୍ୱାସ ତ୍ୟାଗ କରିଥିଲେ। ଏହାପରେ ଯେଉଁ ସ୍ଥାନରେ ପୁଅର ଅନ୍ତିମ ସଂସ୍କାର ହୋଇଥିଲା ସେହିଠାରେ ଜ୍ୟୋତିଙ୍କ ମଧ୍ୟ ଶବଦାହ କରାଯାଇଥିଲା। ଏହି ଘଟଣା ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।
