ବର୍ତ୍ତମାନ ସମୟରେ ମେଦବହୁଳତା ଏକ ବଡ ସମସ୍ୟା ହୋଇ ଦେଖାଦେଇଛି । ଏହାର କାରଣ ଆମ ଜୀବନଶୈଳି ବୋଲି କୁହାଯାଉଛି । ଅନେକ ଲୋକଙ୍କର ଏବେ ଅଭ୍ୟାସରେ ପଡି ଗଲାଣି ବିଳମ୍ବରେ ଖାଇବା ବିଳମ୍ବରେ ଶୋଇବା ଓ ଶୀଘ୍ର ନ ଉଠି ବିଳମ୍ବରେ ଉଠିବା । କିନ୍ତୁ ଏହା ଯେ ଶରୀର ପାଇଁ କ୍ଷତିକାରଣ ଏହା ଜାଣିବା ପରେ ବି ଆମେ ଏହାକୁ ଅବହେଳା କରି ଚାଲିଛୁ । ଆଉ କେତେକ ଲୋକ ନିଜ ଶରୀରର ଓଜନ କମାଇବା ଲାଗି ସକାଳୁ ବ୍ୟାୟାମ କରୁଥିବା ବେଳେ ଖାଦ୍ୟ ପାନୀୟ ପ୍ରତି ମଧ୍ୟ ସାମାନ୍ୟ ସଚେତନ ଥିବା ଦେଖାଯାଏ । ଏହାପରେ ବି ଅନେକ ଦିନ ଧରି ସେମାନଙ୍କ ଓଜନ ନ କମିବା ଚିନ୍ତାର କାରଣ ପାଲଟି ଯାଏ । ନିକଟରେ କରାଯାଇଥିବା ଏକ ଷ୍ଟଡିରୁ ଜଣାପଡିଛି କି ଯେଉଁମାନେ ନିୟମିତ ବ୍ୟାୟାମ କରୁଛନ୍ତି ହେଲେ ସେମାନଙ୍କ ଶରୀରର ଓଜନ କମ୍ ହେଉନାହିଁ ଏହା ପଛରେ ଆହୁରି କିଛି କାରଣ ରହିଛି । ଯାହା ସେମାନେ ଜାଣି ପାରୁ ନାହାନ୍ତି । ଉକ୍ତ ଷ୍ଟଡି ଅନୁଯାୟୀ, ଯେଉଁମାନେ ନିୟମିତ ଭାବେ ବିଛଣା ନ ସଫା କରି ଶୋଇ ଥାନ୍ତି ସେମାନେ ଅନ୍ୟମାନଙ୍କ ଅପେକ୍ଷା ଅଳସୁଆ ହୋଇଥିବାରୁ ସେମାନଙ୍କ ଶରୀରର ଓଜନ ବୃଦ୍ଧି ଘଟିଥାଏ । କାରଣ ବିଛଣା ସଫା ସୁତୁରା ରହିଲେ ଭଲ ନିଦ ହୋଇଥାଏ । ଆଉ ଅପରିଷ୍କାର ବିଛଣାରେ ନିଦ ଭଲ ନ ହେବା ଫଳରେ ନାନା ଶାରୀରିକ ସମସ୍ୟା ଦେଖାଦିଏ ।
ଯେଉଁମାନେ ଦିନର ଆରମ୍ଭ ଚା’ ବା କଫିରୁ କରିଥାଆନ୍ତି ସେମାନଙ୍କର ମେଦ ବୃଦ୍ଧି ହୋଇଥାଏ ବୋଲି ବିଶେଷଜ୍ଞମାନେ କହିଛନ୍ତି । କାରଣ ସକାଳେ ଖାଲି ପେଟରେ କୌଣସି ଖାଦ୍ୟ ଖାଇବା ପୂର୍ବରୁ ଯଦି ଚା’ ବା କଫି ପିଆଯାଏ ତେବେ ଏହା ଶରୀର ଉପରେ କୁପ୍ରଭାବ ପକାଇଥାଏ । ଆହୁରି ମଧ୍ୟ ମେଦବୃଦ୍ଧିରେ ସହାୟକ ହୋଇଥାଏ । ତେଣୁ ଡାକ୍ତରମାନେ ପରାମର୍ଶ ଦିଅନ୍ତି ଓଜନ କମ୍ କରିବାକୁ ଚାହୁଁଥିବା ଲୋକେ ଏହି ଭୁଲ ନ କରି ବରଂ ସକାଳର ଆରମ୍ଭ ଉଷୁମ ପାଣିରୁ କଲେ ଲାଭ ମିଳିଥାଏ ।
