ପୁରୀ ଅଫିସ, ୧୬ା୫: ପୁରୀ ବେଳାଭୂମିରେ ବହୁ ସଂଖ୍ୟକ ମୃତ ଜେଲିଫିସ୍ ପଡ଼ିରହିଥିବା ମଙ୍ଗଳବାର ଦେଖିବାକୁ ମିଳିଛି। ଏହି ସଂଖ୍ୟା ପ୍ରାୟ ସହସ୍ରାଧିକ ହେବ ବୋଲି ଅନୁମାନ କରାଯାଉଛି। ଏ ନେଇ ପରିବେଶବିତ୍ମାନେ ଚିନ୍ତା ପ୍ରକଟ କରିଥିବାବେଳେ ଜେଲିଫିସ୍ଗୁଡ଼ିକୁ ଦେଖିବା ଲାଗି ସେଠାରେ ଭିଡ଼ ଜମୁଛି। ନିକଟରେ ବଙ୍ଗୋପସାଗରରେ ସୃଷ୍ଟି ହୋଇଥିବା ବାତ୍ୟା ‘ମୋଚା’ ପ୍ରଭାବରୁ ଜେଲିଫିସ୍ଗୁଡ଼ିକ ସମୁଦ୍ରରେ ମରି ଢେଉ ଦ୍ୱାରା ଭାସିଆସି ପୁରୀ ବେଳାଭୂମିରେ ଲାଗିଥିବା ଅନୁମାନ କରାଯାଉଛି। ସେହିପରି ତାପମାତ୍ରା ବୃଦ୍ଧି ଓ ଜଳବାୟୁ ପରିବର୍ତ୍ତନ ଜେଲିଫିସ୍ ମଡକର କାରଣ ହୋଇଥାଇପାରେ ବୋଲି କୁହାଯାଉଛି। ତେବେ ଏପରି ଅଚାନକ ଏତେ ସଂଖ୍ୟାରେ ଜେଲିଫିସ୍ ମରି ବେଳାଭୂମିରେ ଭାସିବାର ପ୍ରକୃତ କାରଣ ଜଣାପଡ଼ିନାହିଁ। ଏହି ଘଟଣା ପରିବେଶବିତ୍ଙ୍କ ସମେତ ପର୍ଯ୍ୟଟକଙ୍କୁ ଚିନ୍ତାରେ ପକାଇଛି। ବିଶେଷକରି ପୁରୀ ସ୍ବର୍ଗଦ୍ୱାର ବେଳାଭୂମିଠାରୁ ମଙ୍ଗଳାନଦୀ ମୁହାଣ ପର୍ଯ୍ୟନ୍ତ ଶହ ଶହ ସଂଖ୍ୟକ ଜେଲିଫିସ୍ ମରି ବେଳାଭୂମିରେ ପଡ଼ିଥିବା ଦେଖିବାକୁ ମିଳିଛି। ଜେଲିଫିସ୍ମାନେ ଗଭୀର ଜଳ ରାଶିରେ ରହନ୍ତି। ଜୁଆର ସମୟରେ ବେଳାଭୂମି ନିକଟକୁ ଚାଲିଆସନ୍ତି। ତେବେ ଏତେ ସଂଖ୍ୟାରେ ଜେଲିଫିସ୍ ମରିବା ପଛରେ ବାତ୍ୟା ପ୍ରଭାବକୁ ଏଡାଇ ଦିଆଯାଇ ନ ପାରେ। କିଛି ଦିନ ହେବ ବେଳାଭୂମିରେ ଜେଲିଫିସ୍ ମରି ପଡୁଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବା ସାଧାରଣରେ ଅଭିଯୋଗ ହେଉଛି। ମୃତ ଜେଲିଫିସଗୁଡ଼ିକ ବେଳାଭୂମିରେ ଲାଗିଥିବାରୁ ସମୁଦ୍ରକୂଳରେ ପର୍ଯ୍ୟଟକଙ୍କ ବୁଲିବାରେ ସମସ୍ୟା ଉପୁଜୁଛି। ସେହିପରି ପର୍ଯ୍ୟଟକମାନେ ସମୁଦ୍ରରେ ସ୍ନାନ କରିବା ବେଳେ ସେମାନଙ୍କ ଦେହରେ ମୃତ ଜେଲିିଫିସ୍ ଲାଗିଯାଉଛି। ଫଳରେ ସେମାନଙ୍କ ଦେହ କୁଣ୍ଡାଇ ହେବା ସହ ଫଳି ଯାଉଛି। ଏଥିଯୋଗୁ ପର୍ଯ୍ୟଟକ ଅସନ୍ତୋଷ ପ୍ରକାଶ କରିଛନ୍ତି। ଅପରପକ୍ଷରେ କେଉଁ କାରଣରୁ ଜେଲିଫିସ୍ଗୁଡ଼ିକ ସମୁଦ୍ର ଭିତରୁ ଆସି ଉପରେ ଭାସୁଛନ୍ତି ଓ ମରିପଡ଼ିଛନ୍ତି ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇପାରିନାହିଁ। ପ୍ରଶାସନ ପକ୍ଷରୁ ତୁରନ୍ତ ପଦକ୍ଷେପ ଗ୍ରହଣ ଲାଗି ପରିବେଶବିତ୍ ଓ ଜନସାଧାରଣ ଦାବି କରିଛନ୍ତି।
