କ୍ୱିଭ,୧୬ ।୪: ରୁଷିଆ-ୟୁକ୍ରେନ୍ ଯୁଦ୍ଧକୁ ୫୨ ଦିନ ହେଲାଣି । ଏହାରି ଭିତରେ ରୁଷିଆ ସେନା ୟୁକ୍ରେନର ପ୍ରାୟ ସମସ୍ତ ବଡ ବଡ ସହରକୁ ଧ୍ୱଂସ କରିଦେଇଛନ୍ତି । ଏଥିରେ ୟୁକ୍ରେନର ରାଜଧାନୀ କ୍ୱିଭ ବି ସାମିଲ ଅଛି । କ୍ୱିଭରେ ରୁଷିଆ ସେନା ବେଶ କିଛିଦିନ ଧରି ଆକ୍ରମଣ କରି ଚାଲିଥିଲେ । ଏବେ ରୁଷିଆ ସେନା କ୍ୱିଭ ଛାଡି ଆସିବା ପରେ ସେଠାରେ ୯୦୦ରୁ ଅଧିକ ସାଧାରଣ ନାଗରିକଙ୍କ ମୃତଦେହ ଉଦ୍ଧାର କରାଯାଇଛି । ସେଠାକାର ପୋଲିସ ମୁଖ୍ୟ ଗଣମାଧ୍ୟମକୁ ଏହି ସୂଚନା ଦେଇଛନ୍ତି । ସେ କହିଛନ୍ତି ଏସବୁ ମୃତଦେହ ସଡ଼କ ଉପରେ ଖୋଲା ଛାଡି ଦିଆଯାଇଥିଲା ନଚେତ୍ ଅସ୍ଥାୟୀ ଭାବେ କବର ଦିଆଯାଇଥିଲା । ଏମାନଙ୍କ ମଧ୍ୟରୁ ୯୫ ପ୍ରତିଶତଙ୍କର ଗୁଳି ବାଜି ମୃତ୍ୟୁ ହୋଇଥିବା କୁହାଯାଉଛି । ସେ ଆହୁରି ମଧ୍ୟ କହିଛନ୍ତି ପ୍ରତିଦିନ ଅଳିଆ ଗଦା ଭିତରୁ ଓ ସାମୁହିକ କବରସ୍ଥାନରୁ ମୃତଦେହ ମିଳୁଛି । ତେବେ ବୁଚାରେ ସବୁଠାରୁ ଅଧିକ ଲୋକଙ୍କର ମୃତ୍ୟୁ ହୋଇଥିବା ବେଳେ ଏବେ ସେଠାରୁ ୩୫୦ରୁ ଅଧିକ ମୃତଦେହ ମିଳିଛି ।
