ଭୁବନେଶ୍ୱର, ୧୩।୩(ବ୍ୟୁରୋ): ଭୁବନେଶ୍ୱର କମିଶନରେଟ ପୋଲିସର ବିଭିନ୍ନ ଥାନାରେ ଖତ ଖାଉଛି ଜବତ ଗାଡ଼ି। ୧୦ ହଜାରରୁ ଊର୍ଦ୍ଧ୍ୱ ବାଇକ, କାର, ଟ୍ରକ ଆଦି ଖରାବର୍ଷା ଖାଇ ନଷ୍ଟ ହେଉଥିବାରୁ ଏହା ହାଇକୋର୍ଟଙ୍କ ନିର୍ଦ୍ଦେଶର ଖୋଲା ଉଲ୍ଲଂଘନ ହେଉଛି। ମଞ୍ଚେଶ୍ୱର ଥାନାରେ ୧୦ବର୍ଷ ହେଲା ଜବତ ଗାଡ଼ି ପଡିରହିଛି। ଥାନା ପଛପଟେ ପ୍ରାୟ ୧ହଜାର ବାଇକ, କାର, ବସ, ଟ୍ରକ, ସାଇକେଲ ଗଦାହୋଇ ରହିଛି। ଅଧିକାଂଶ କଳଙ୍କି ଲାଗି ଯାଇଥିବାବେଳେ ଆଉ କିଛି ମାଟିରେ ମିଶିଗଲାଣି।
ଏୟାରଫିଲ୍ଡ, ଖଣ୍ଡଗିରି, ଶହୀଦନଗର ଥାନାରେ ସମାନ ଦୃଶ୍ୟ ଦେଖିବାକୁ ମିଳୁଛି। ଯଦି କେହି ଯାନ ମାଲିକ ବା ବୀମା କମ୍ପାନୀ ଦାବି ନ କରନ୍ତି, ତାହାକୁ ମାଜିଷ୍ଟ୍ରେଟଙ୍କ ଅନୁମତି ନେଇ ନିଲାମ କରାଯିବା କଥା। କିନ୍ତୁ ତାହା କରାଯାଉନାହିଁ। ଫଳରେ ଏହି ଗାଡିଗୁଡିକ କେବଳ ନଷ୍ଟ ହେଉନାହିଁ ବରଂ ଥାନାର ବୃହତ୍ ଅଂଶ ମାଡିବସିବା ସହ ସୌନ୍ଦର୍ଯ୍ୟ ହରାଉଛି।
ଏ ସମ୍ପର୍କରେ ଡିସିପି ଉମାଶଙ୍କର ଦାଶ କହିଛନ୍ତି, ମାସକ ମଧ୍ୟରେ ବିଭିନ୍ନ ଥାନାର ଜବତ ଗାଡିଗୁଡିକ ନିଲାମ ପ୍ରକ୍ରିୟା ଆରମ୍ଭ ହେବ। ମାସେ ହେଲାଣି ଜବତ ଗାଡଗୁଡିକର ଡାଟାବେସ ପ୍ରସ୍ତୁତ କରୁଛୁ। ଏହି ଦାୟିତ୍ୱରେ ଜଣେ ଅତିରିକ୍ତ ଡିସିପି କାର୍ଯ୍ୟ କରୁଛନ୍ତି। କେଉଁ ଗାଡିର ମାଲିକାନା ରହିଛି, କେଉଁ ଚୋରି ଗାଡି ଜବତ ହୋଇଛି, ଦୁର୍ଘଟଣାଗ୍ରସ୍ତ ଗାଡ଼ି ଆଦିର ତଥ୍ୟ ସଂଗ୍ରହ କରାଯାଉଛି। ଫେବୃୟାରୀ ସୁଦ୍ଧା ଏହା ଶେଷ ହେବା କଥା। କିନ୍ତୁ କେତେକ କାରଣରୁ ଏବେସୁଦ୍ଧା ୨ଟି ଥାନାରେ ଗାଡି ତାଲିକା ପ୍ରସ୍ତୁତ ହୋଇଛି। ତାଲିକା ପ୍ରସ୍ତୁତି ସରିବା ପରେ ପ୍ରଥମେ ସର୍ବସାଧାରଣ ନୋଟିସ ପ୍ରକାଶ ପାଇବ। ପରେ ପୋଲିସ କମିଶନରଙ୍କ ନିର୍ଦ୍ଦେଶକ୍ରମେ ନିଲାମ ହେବ। ପ୍ରାଥମିକ ପର୍ଯ୍ୟାୟରେ ଗୋଟିଏ ଥାନାର ଜବତ ଗାଡିଗୁଡିକର ନିଲାମ ହେବ। କ୍ରମାନ୍ବୟରେ ସମସ୍ତ ଥାନାର ଜବତ ଗାଡି ନିଲାମ ହେବ ବୋଲି ଡିସିପି ଦାଶ ସୂଚନା ଦେଇଛନ୍ତି।
ହାଇକୋର୍ଟଙ୍କ ନିର୍ଦ୍ଦେଶ କ’ଣ ରହିଛି
ଜବତ ଗାଡିଗୁଡିକ ଦୀର୍ଘ ସମୟଧରି ଥାନାରେ ରଖାଯିବା ଉଚିତ ନୁହେଁ ବୋଲି ହାଇକୋର୍ଟଙ୍କ ନିର୍ଦ୍ଦେଶ ରହିଛି। ଉପଯୁକ୍ତ ବଣ୍ଡ୍ ଗ୍ୟାରେଣ୍ଟି କିମ୍ବା ସୁରକ୍ଷା ନେବାପରେ ମାଜିଷ୍ଟ୍ରେଟଙ୍କ ମାଧ୍ୟମରେ ସେଗୁଡିକ ମାଲିକଙ୍କ ନିକଟକୁ ଫେରସ୍ତ କରାଯାଇପାରିବ। ଯେଉଁ ଗାଡିଗୁଡିକ ନେବାକୁ ମାଲିକ ଦାବି କରନ୍ତି ନାହିଁ, ବୀମା କମ୍ପାନୀକୁ ସେହି ଗାଡିର ମାଲିକାନା ନେବାକୁ କୋର୍ଟ ଅନୁମତି ଦେଇପାରିବେ। ସେହିପରି ଯେଉଁ ଗାଡିଗୁଡିକର ମାଲିକ ବା ବୀମା କମ୍ପାନୀଙ୍କ ଦାବି ନ ଥାଏ, ସେହି ଗାଡିଗୁଡିକ କୋର୍ଟଙ୍କ ଦ୍ୱାରା ନିଲାମ କରିବାକୁ ନିର୍ଦ୍ଦେଶ ଦିଆଯାଇପାରିବ। ଚୋରି ଗାଡି ହେଉ ଅବା କୌଣସି କାରଣରୁ ଗାଡି ଜବତ ହେଲେ, ତାହାର ଯତ୍ନ ନିଆଯାଏ ନାହିଁ। ଫଳରେ ଖରା, ବର୍ଷା ଓ ବାହ୍ୟ ବିପଦ ସଂସ୍ପର୍ଶରେ ଆସି ଗାଡିଗୁଡ଼ିକ ନଷ୍ଟ ହୋଇଥାଏ। ତେଣୁ ଜବତ ଗାଡିକୁ ମୁକ୍ତ କରିବାକୁ ଏ ସଂକ୍ରାନ୍ତ ଏକ ମାମଲାର ଶୁଣାଣି କରି ହାଇକୋର୍ଟ ଉପରୋକ୍ତ ନିର୍ଦ୍ଦେଶ ଦେଇଥିଲେ।
