ମହାରାଷ୍ଟ୍ରର ଏକ ଆକର୍ଷଣୀୟ ମନ୍ସୁନ୍ ଡେଷ୍ଟିନେଶନ ହେଉଛି କର୍ଜତ। ସବୁଜ ସୁନ୍ଦର ପରିବେଶ ସାଙ୍ଗକୁ ନଦୀ, ଝରଣାର ସୌନ୍ଦର୍ଯ୍ୟ ପାଇଁ ଏହା ବେଶ୍ ଲୋକପ୍ରିୟତା ହାସଲ କରିପାରିଛି। ରିମ୍ଝିମ୍ ବର୍ଷାରେ ଭିଜିଭିଜି ଏଠାକାର ପାହାଡ଼, ପର୍ବତକୁ ବୁଲି ଦେଖିବାରେ ମିଳିଥାଏ ଏକ ଅପୂର୍ବ ଆନନ୍ଦ। କେବଳ ସେତିକି ନୁହେଁ ଏଠାକାର ନିକଟତମ ଅଞ୍ଚଳରେ ଅନେକ ଆଧ୍ୟାତ୍ମିକ ପର୍ଯ୍ୟଟନସ୍ଥଳୀ ବି ଦେଖିବାକୁ ମିଳିଥାଏ…
କ’ଣ ଦେଖିବେ
କୋଥଲିଗଡ଼ ଦୁର୍ଗ: ଏହା କର୍ଜତ ଅଞ୍ଚଳର ସବୁଠାରୁ ଖାସ୍ ଟ୍ରେକିଂ ପଏଣ୍ଟ ଭାବେ ଜଣାଶୁଣା। ବହୁ ପୁରାତନ ଏହି ଦୁର୍ଗ ଉପରକୁ ଗଲେ ଚତୁଃପାର୍ଶ୍ୱର ଆକର୍ଷଣୀୟ ଦୃଶ୍ୟକୁ ମନଭରି ଉପଭୋଗ କରିହୁଏ। ସ୍ଥାନୀୟ ଲୋକଙ୍କ ମତାନୁସାରେ, ଏହା କେବଳ ଏକ ଦୁର୍ଗ ନୁହେଁ, ଅଧିକନ୍ତୁ ଏହା ଏକ ଲାଇଟ୍ ହାଉସ୍ର ଅନୁଭବ ବି ଦେଇଥାଏ।
ଉହ୍ଲାସ ଉପତ୍ୟକା: ଏହି ଉପତ୍ୟକା ନିଜର ଆକର୍ଷଣୀୟ ଝରଣା ପାଇଁ ବେଶ୍ ପରିଚିତ। ବିଶେଷକରି ବର୍ଷାଦିନେ ଉକ୍ତ ଝରଣାର ଆକର୍ଷଣ ଖୁବ୍ ବଢ଼ିଯାଏ। ଟ୍ରେକିଂ ପରି ଦୁଃସାହସିକ କ୍ରୀଡ଼ା ପାଇଁ ଏଠାରେ ସୁବିଧା ମଧ୍ୟ ରହିଛି। ସେଥିପାଇଁ ପ୍ରକୃତିପ୍ରେମୀଙ୍କଠାରୁ ଆରମ୍ଭ କରି ଦୁଃସାହସିକ ପର୍ଯ୍ୟଟନରେ ରୁଚି ରଖୁଥିବା ପର୍ଯ୍ୟଟକଙ୍କ ନିମନ୍ତେ ଏହା ଏକ ଆଦର୍ଶ ସ୍ଥଳୀ ଭାବେ ମଧ୍ୟ ନାଁ କରିପାରିଛି।
କୋଣ୍ଡାନା ଗୁମ୍ଫା: ମହାରାଷ୍ଟ୍ରର ଅନ୍ୟତମ ଲୋକପ୍ରିୟ ପର୍ଯ୍ୟଟନସ୍ଥଳୀ ଭାବେ ଏହାର ବେଶ୍ ନାଁ ରହିଛି। କର୍ଜତ ବୁଲି ଆସୁଥିବା ଲୋକେ ଚାହିଁଲେ ଏଠାକୁ ମଧ୍ୟ ବୁଲି ଯାଇପାରିବେ। ଏହି ଗୁମ୍ଫା ରୋମାଞ୍ଚକ ଅନୁଭବ ଦେଇଥାଏ। ସେହିପରି ଉକ୍ତ ଗୁମ୍ଫାର ବାସ୍ତୁକଳା ବି ଖୁବ୍ ଆକର୍ଷଣୀୟ ଲାଗିଥାଏ। କୁହାଯାଏ, ବୌଦ୍ଧଧର୍ମ ସହିତ ଏହି ଗୁମ୍ଫାର ଅନେକ ସମ୍ପର୍କ ରହିଛି। କାରଣ ଏଠାରେ ଏବେ ବି ଅନେକ ବୌଦ୍ଧସ୍ତୂପ ଥିବାର ଦେଖିବାକୁ ମିଳିଥାଏ।
କୋଣ୍ଡେଶ୍ୱର ମନ୍ଦିର:ଏହି ମନ୍ଦିରରେ ଦେବଦେବ ମହାଦେବଙ୍କୁ ପୂଜା କରାଯାଇଥାଏ। ପ୍ରାକୃତିକ ପରିବେଶ ମଧ୍ୟରେ ଅବସ୍ଥିତ ଏହି ମନ୍ଦିରକୁ ଗଲେ ଖୁବ୍ ଶାନ୍ତି ମିଳିଥାଏ। କର୍ଜତ ବୁଲି ଆସୁଥିବା ପର୍ଯ୍ୟଟକ ଏଠାକୁ ବି ଯାଇପାରିବେ।
କେବେ ଯିବେ
କର୍ଜତକୁ ବୁଲି ଆସିବା ପାଇଁ ବର୍ଷାଦିନ ହେଉଛି ସବୁଠୁ ଭଲ ସମୟ। କାରଣ ଏହିଦିନେ ଏଠାକାର ନଦୀ, ଝରଣା, ପାହାଡ, ପର୍ବତର ସୌନ୍ଦର୍ଯ୍ୟ ଅଧିକ ଆକର୍ଷଣୀୟ ଲାଗିଥାଏ। କିନ୍ତୁ ଏହିସବୁ ସ୍ଥାନକୁ ଯିବାକୁ ହେଲେ ଖୁବ୍ ସତର୍କତା ଅବଲମ୍ବନ କରିବାକୁ ହୋଇଥାଏ। କାରଣ ବର୍ଷା ଯୋଗୁ ରାସ୍ତାଘାଟରେ ଗୋଡ଼ ଖସିଯିବାର ସମ୍ଭାବନା ରହିଛି। ବିପଦ ଥିବାର ଜାଣି ମଧ୍ୟ ପର୍ଯ୍ୟଟକ ବର୍ଷାଦିନେ ହିଁ ଏଠାକୁ ଅଧିକ ସଂଖ୍ୟାରେ ବୁଲି ଆସିଥାନ୍ତି।
କେମିତି ଯିବେ
ସଡ଼କପଥ ତଥା ରେଳପଥରେ ଏଠାକୁ ଯିବାର ସୁବିଧା ରହିଛି। ମୁମ୍ବାଇ ହେଉଛି ଏହାର ନିକଟତମ ତଥା ମୁଖ୍ୟ ରେଳଷ୍ଟେଶନ। ସେହିପରି ମୁମ୍ବାଇର ଛତ୍ରପତି ଶିବାଜୀ ଅନ୍ତର୍ଜାତୀୟ ବିମାନବନ୍ଦର ହେଉଛି କର୍ଜତର ନିକଟତମ ବିମାନବନ୍ଦର।
ଦୁଃସାହସିକ ପର୍ଯ୍ୟଟନର ମଜା
ଦୁଃସାହସିକ କ୍ରୀଡ଼ା ପାଇଁ କର୍ଜତରେ ଅନେକ ସୁବିଧା ରହିଛି। ଖାସ୍ କରି ଟ୍ରେକିଂ, ମାଉଣ୍ଟେନିଂ, ହାଇକିଂ ଏବଂ ଓ୍ବାଟର୍ ରାଫ୍ଟିଂ ଏଠାରେ ସୁବିଧାରେ କରି ହୋଇଥାଏ। ହେଲେ ବର୍ଷାଦିନେ ଏହି କ୍ରୀଡ଼ା ପାଇଁ ଟିକେ ସତର୍କତା ଅବଲମ୍ବନ କରିବାକୁ ପଡିଥାଏ।
କ’ଣ କିଣିବେ
ବିଭିନ୍ନ ହସ୍ତଶିଳ୍ପ ସାମଗ୍ରୀ ବେଶ ସୁଲଭ ମୂଲ୍ୟରେ ଏଠାରୁ କିଣିପାରିବେ, ଯାହାକୁ କର୍ଜତରେ ବସବାସ କରୁଥିବା ଗ୍ରାମବାସୀ ନିଜେ ତିଆରି କରିଥାନ୍ତି ବୋଲି ସୂଚନା ରହିଛି।
