କୋରେଇ,୧୭ା୨(ଡି.ଏନ.ଏ.): ଯାଜପୁର ଜିଲା କୋରେଇ ବ୍ଲକ୍ ଅଧୀନ ବିଭିନ୍ନ ପଞ୍ଚାୟତରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ ଦୁର୍ନୀତି ବଢ଼ିବାରେ ଲାଗିଛି। କେଉଁଠି ମେଶିନରେ କାମ ହେଉଛି ତ ଆଉ କେଉଁଠି କେବଳ ଫଳକ ଲଗାଇ ଆବଣ୍ଟିତ ଅର୍ଥରାଶି ହରିଲୁଟ୍ ହେଉଛି। ବ୍ଲକ୍ କାର୍ଯ୍ୟାଳୟ ଦାୟିତ୍ୱରେ ଥିବା ବିଭାଗୀୟ କର୍ମଚାରୀ ଓ ଠିକାଦାର ମିଳିତ ଭାବେ ଏହି ଦୁର୍ନୀତି କରି ଚାଲିଛନ୍ତି। ଠିକାଦାରମାନେ ବ୍ଲକ କାର୍ଯ୍ୟାଳୟରେ ୧୦ବର୍ଷ ହେବ ଦାୟିତ୍ୱରେ ଥିବା ଏମ୍ଜିଏନ୍ଆର୍ଇଜିଏସ୍ ସହାୟକ, କେତେଜଣ ଅସାଧୁ କନିଷ୍ଠ ଯନ୍ତ୍ରୀ(ଜେଇ), ଗ୍ରାମ ରୋଜଗାର ସେବକ (ଜିଆରଏସ୍) ଏବଂ ପଞ୍ଚାୟତ ନିର୍ବାହୀ ଯନ୍ତ୍ରୀ (ଭିଏଲଡବ୍ଲ୍ୟୁ)ଙ୍କୁ ହାତ କରି ଏପରି ଦୁର୍ନୀତି କରୁଥିବା ଅଭିଯୋଗ ହୋଇଛି।
ଏଠାରେ ଅସନଝର ପଞ୍ଚାୟତ ରାମକୃଷ୍ଣପୁର ଖେଳପଡ଼ିଆ ଉନ୍ନତିକରଣ କାମକୁ ଉଦାହରଣ ଭାବେ ନିଆଯାଇଛି। ଏହି ଖେଳପଡିଆ ଉନ୍ନତି ନିମନ୍ତେ ଏମ୍ଜିଏନ୍ଆର୍ ଇଜିଏସ୍ ପାଣ୍ଠିରୁ ୫ଲକ୍ଷ ଟଙ୍କା ବ୍ୟୟବରାଦ କରାଯାଇଛି। ଯାହାର କୋର୍ଡ ନଂ.୨୪୨୦୦୦୮୦୧୦/ଏଲଡ଼ି/ ୧୦୭୩୪୬୮୪ ରହିଥିବା ବେଳେ କାର୍ଯ୍ୟ ଆରମ୍ଭ ଓ ଶେଷ ତାରିଖ ସମ୍ପର୍କରେ ଫଳକରେ କୌଣସି ସୂଚନା ଦିଆଯାଇନାହିଁ। ବିଡମ୍ବନାର ବିଷୟ ଠିକାଦାର ପଡ଼ିଆର ଅଗ୍ରଗତି ନିମନ୍ତେ କୌଣସି ପଦକ୍ଷେପ ନେଇ ନାହାନ୍ତି। କେବଳ ଗୋଟିଏ ସୂଚନା ଫଳକ ଲଗାଇ କନିଷ୍ଠ ଯନ୍ତ୍ରୀଙ୍କ ସହଯୋଗରେ ଆବଣ୍ଟିତ ଅର୍ଥରାଶି ହରିଲୁଟ୍ କରିବାକୁ ମସୁଧା କରିଛନ୍ତି। ଏହି କ୍ରମରେ ୬ଟି ଜାଲ୍ ମଷ୍ଟରରୋଲ୍ ପ୍ରସ୍ତୁତ କରି ରାମକୃଷ୍ଣପୁର ଗ୍ରାମର ଅଶ୍ୱିନୀ କୁମାର ଜେନା, ଗୀତାଞ୍ଜଳି ଜେନା, ମନୋରମା ଜେନା, ଲକ୍ଷ୍ମୀଧର ସ୍ବାଇଁ, ଭଗବତୀ ସ୍ବାଇଁ, ପଦ୍ମିନୀ ଓଝା, ମନୋରମା ମହାରଣା, ରମାକାନ୍ତ ଘଡ଼େଇଙ୍କ ନାମରେ ୪୮ଦିନର କାର୍ଯ୍ୟଦିବସ ଦର୍ଶାଇ ମୋଟ୍ ୧୫୯୮୪ ଟଙ୍କାର ବିଲ୍ କରାଯାଇଛି। କାମ ଚାଲୁଥିବା ଦର୍ଶାଇ ଅନ୍ୟ ବିଲ୍ ମଧ୍ୟ କରାଯାଉଛି। ଏହି କାମର ବାସ୍ତବ ସ୍ଥିତି କିନ୍ତୁ ସମ୍ପୂର୍ଣ୍ଣ ଭିନ୍ନ ରହିଥିବା ଦେଖିବାକୁ ମିଳିଛି। ଗୋଟିଏ ସୂଚନା ଫଳକକୁ ଛାଡିଦେଲେ ଏହି ଖେଳ ପଡ଼ିଆରେ କୌଣସି ଉନ୍ନତି ହୋଇ ନ ଥିବା ଜଣାପଡିଛି। କନିଷ୍ଠ ଯନ୍ତ୍ରୀ କେଉଁ ଆଧାରରେ ବିଲ୍ ପ୍ରଦାନ କରୁଛନ୍ତି ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି। ବ୍ଲକ୍ ଉନ୍ନୟନ ଅଧିକାରୀଙ୍କ ଅଗୋଚରରେ କେତେଜଣ ଦୁର୍ନୀତିଖୋର ଅଫିସର ଏପରି କରି ମୋଟା ଅଙ୍କର ମୁନାଫା ନେଉଥିବା ଚର୍ଚ୍ଚା ହେଉଛି। ସେହିପରି ଗୌରପୁର ପଞ୍ଚାୟତରେ ମଧ୍ୟ ଠିକାଦାର ଓ ଅଧିକାରୀଙ୍କ ମିଳିତ ଉଦ୍ୟମରେ ଫଳକ ଲଗାଇ ଏକାଧିକ ଉନ୍ନୟନ କାର୍ଯ୍ୟ ସମ୍ପୂର୍ଣ୍ଣ ନ ହୋଇ ଅର୍ଥ ହରିଲୁଟ୍ ହୋଇଛି।ଏ ବିଷୟରେ କନିଷ୍ଠ ଯନ୍ତ୍ରୀ ହେମଲତା ପ୍ରଧାନଙ୍କ ମତାମତ ନେବାକୁ ତାଙ୍କୁ ଏକାଧିକ ଥର ଯୋଗାଯୋଗ କରାଯାଇଥିଲା। ହେଲେ ସେ ଫୋନ୍ କଲ୍ ଗ୍ରହଣ କରି ନ ଥିଲେ।
