ବରଗଡ଼ ଅଫିସ୍,୨୨ା୩: ଅଣଜଳସେଚିତ ଅଞ୍ଚଳର ଜମିକୁ ପାଣି ମଡ଼ାଇ ଚାଷ କରିବା ଲକ୍ଷ୍ୟରେ ରାଜ୍ୟ ସରକାର ରିହାତିରେ ଗଭୀର ନଳକୂପ ଖନନ ଯୋଜନା ହାତକୁ ନେଇଛନ୍ତି। ମାତ୍ର ଉଠାଜଳସେଚନ ବିଭାଗର ଅପାରଗତା ଯୋଗୁ ଏହି ଯୋଜନା ବାଟବଣା ହୋଇପଡ଼ିଛି। ଚାଷୀମାନେ ଆବଶ୍ୟକମତେ ଅଗ୍ରିମ ଜମା କରିବା ସତ୍ତ୍ବେ ସେମାନଙ୍କ ଜମିରେ ଗଭୀର ନଳକୂପ ଖନନ କରାଯାଇନାହିଁ। ବରଗଡ଼ ଜିଲା ବିଜେପୁର ଥାନା ଲାଉମୁଣ୍ଡା ପଞ୍ଚାୟତ ଚେରଙ୍ଗାମୁଣ୍ଡା ଗ୍ରାମର ଚାଷୀମାନେ ଏଭଳି ସମସ୍ୟାର ସମ୍ମୁଖୀନ ହୋଇଛନ୍ତି। ସେମାନଙ୍କ ଆବେଦନ ଅନୁସାରେ ଗଭୀର ନଳକୂପ ଖୋଲିବାକୁ ଦାବି କରି ଚାଷୀମାନେ ବରଗଡ଼ ଜିଲାପାଳଙ୍କୁ ଫେରାଦ ହୋଇଛନ୍ତି। ଜିଲାପାଳ ମୋନିଷା ବାନାର୍ଜୀଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳ ମିର୍ଦ୍ଧା ଟପ୍ପୋଙ୍କୁ ସେମାନେ ସ୍ମାରକପତ୍ର ପ୍ରଦାନ କରିଥିଲେ। ଚେରଙ୍ଗାମୁଣ୍ଡା ଗ୍ରାମର ଚାଷୀମାନେ ଗଭୀର ନଳକୂପ ଖନନ ପାଇଁ ସେମାନେ ୨୦୧୯ରୁ ଆବେଦନ କରିଥିଲେ। ଆବେଦନ ସମୟରେ ସେମାନେ ଅଗ୍ରିମ ଦେୟ ମଧ୍ୟ ଉଠାଜଳସେଚନ ବିଭାଗରେ ଜମା କରିଥିଲେ। କିନ୍ତୁ ଏପର୍ଯ୍ୟନ୍ତ ସେମାନଙ୍କ ଜମିରେ ଗଭୀର ନଳକୂପ ଖନନ କରାଯାଇନାହିଁ। ଫଳରେ ଯେଉଁ ଆଶା ନେଇ ଗଭୀର ନଳକୂପ ଆଶାରେ ଅଗ୍ରିମ ଦେୟ ଜମା କରିଥିଲେ, ସେହି ଆଶା ଧୂଳିସାତ୍ ହୋଇ ଯାଇଥିବା ଚାଷୀମାନେ କହିଛନ୍ତି। ସେମାନଙ୍କ ଜମିରେ ଗଭୀର ନଳକୂପ ଖନନ ଦିଗରେ ବିହିତ ପଦକ୍ଷେପ ନେବାକୁ ହୃଷିକେଶ ଭୋଇ, ପ୍ରଫୁଲ୍ଲ ପଟେଲ, ଗଣନାଥ ସାହୁ ପ୍ରମୁଖଙ୍କ ନେତୃତ୍ୱରେ ଆସିଥିବା ଚାଷୀମାନେ ଜିଲାପାଳଙ୍କୁ ନିବେଦନ କରିଛନ୍ତି।
