ସିଆଟେଲ,୨୭।୮ : କମ୍ପ୍ୟୁଟରରେ ଛୋଟ ପିଲା ଏବଂ କିଶୋରମାନେ ଅଧିକ ସମୟ ବିତାଇବା ଦ୍ୱାରା ଏବେ ସଙ୍କଟ ଜନକ ସ୍ଥିତି ସୃଷ୍ଟି ହୋଇଛି। ଆମେରିକାର ସିଆଟେଲ ଶିଶୁ ହସପିଟାଲର ମୁଖ୍ୟ ଚିକିତ୍ସକ ତଥା ସ୍ଲିପିଙ୍ଗ ସେଣ୍ଟରର ମୁଖ୍ୟ ଶିଶୁ ଚିକିତ୍ସକ ମେଡା ଲିନ ଚେନଙ୍କ ଅନୁଯାୟୀ, ମୋବାଇଲ ମାନିଆ ଯୋଗୁ ଶିଶୁ ଏବଂ କିଶୋରମାନେ ଅନିଦ୍ରାର ଶିକାର ହେଉଛନ୍ତି। ସେ କହିଛନ୍ତି, ଏହି ସମସ୍ୟା କେବଳ ସୀମିତ ନୁହେଁ, ଏହି କାରଣରୁ କିଶୋରମାନଙ୍କ ମାନସିକ ବିକାରର ଶିକାର ହେବାର ସମ୍ଭାବନା ମଧ୍ୟ ବଢ଼ିବାରେ ଲାଗିଛି ।
ମେଡା ଲିନ ଚେନ କହିଛନ୍ତି ୧୦ ରୁ ୧୨ ବର୍ଷ ବୟସ୍କଙ୍କ ପାଇଁ ଅଧିକ ମୋବାଇଲ ସ୍କ୍ରିନ କୁ ଚାହିଁବା କେତେ କ୍ଷତିକାରକ ତାହା ଜାଣିବା ପାଇଁ ଅଧିକ ଅନୁସନ୍ଧାନ ଚାଲିଛି। ଏକ ଅନୁସନ୍ଧାନକୁ ଦର୍ଶାଇ ସେ କହିଛନ୍ତି ଆମେରିକାର ୪୨ ପ୍ରତିଶତ କିଶୋର ପର୍ଯ୍ୟାପ୍ତ ପରିମାଣର ନିଦ ପାଇ ନ ଥିବାରୁ ମାନସିକ ସ୍ବାସ୍ଥ୍ୟ ସମସ୍ୟାରେ ପୀଡିତ ଅଛନ୍ତି। କେବଳ ଆମେରିକାରେ ନୁହେଁ, ସମଗ୍ର ବିଶ୍ୱରେ ଏହା ହେଉଛି। ସାରା ବିଶ୍ୱରେ ଛଅରୁ ୧୮ ବର୍ଷ ବୟସର୧୨୦ ହଜାରରୁ ଅଧିକ ଯୁବବର୍ଗଙ୍କର ଏକ ଅଧ୍ୟୟନ ସୋସିଆଲ ମିଡିଆରେ ଅନିଦ୍ରା ହେବାର ଏକ ପ୍ରମୁଖ କାରଣ ବୋଲି ଜଣାପଡିଛି। ବିଶେଷଜ୍ଞମାନଙ୍କ ଅନୁସାରେ ଟିକଟୋକ, ଇନଷ୍ଟା ପୋଷ୍ଟ ଏବଂ ରିଲ୍ସ ଏହି ସମସ୍ୟାକୁ ବଢ଼ାଇ ଦେଇଛି। ପିଲାମାନେ ରିଲ୍ସ ଏବଂ ପୋଷ୍ଟଗୁଡିକ ଦ୍ୱାରା ଏତେ ପ୍ରଭାବିତ ହୁଅନ୍ତି ଯେ ସେମାନେ ସେମାନଙ୍କର ପ୍ରତ୍ୟେକ ପଦକ୍ଷେପ ସହିତ ଅପଡେଟ ହେବାକୁ ଚାହିଁଥାନ୍ତି।
ମନକୁ ସୁସ୍ଥ ରଖିବା ପାଇଁ ଭଲ ଏବଂ ସୁସ୍ଥ ନିଦଠାରୁ ଭଲ କିଛି ନାହିଁ, ବିଶେଷକରି ପିଲାମାନଙ୍କ କ୍ଷେତ୍ରରେ, ଏହା ଅଧିକ ଗୁରୁତ୍ୱପୂର୍ଣ୍ଣ ହୋଇଯଥାଏ। ଅନେକ ଚିକିତ୍ସକ ଏବଂ ବୈଜ୍ଞାନିକ ସଂଗଠନ ପରାମର୍ଶ ଦେଇଛନ୍ତି ଶିଶୁ ଏବଂ କିଶୋରମାନେ ରାତିରେ ଆଠରୁ ୧୦ଘଣ୍ଟା ଶୋଇବା ଆବଶ୍ୟକ କରନ୍ତି। ତଥାପି, ପରିସଂଖ୍ୟାନ ଦର୍ଶାଉଛି ପାଞ୍ଚଟି ହାଇସ୍କୁଲର ଛାତ୍ରଙ୍କ ମଧ୍ୟରୁ କେବଳ ଜଣେ ତାହା କରନ୍ତି।
