ନିମାପଡ଼ା,୧।୮(ଡି.ଏନ୍.ଏ.): ନିମାପଡ଼ା ଏନ୍ଏସି ପକ୍ଷରୁ ନବନିର୍ମିତ ମୁକ୍ତସ୍ଥାନ ସୌନ୍ଦର୍ଯ୍ୟକରଣ ପ୍ରକଳ୍ପ ‘ମୋ ନିମାପଡ଼ା, ମୋ ସ୍ବାଭିମାନ’କୁ ମନ୍ତ୍ରୀ ସମୀର ରଞ୍ଜନ ଦାଶ ଲୋକାର୍ପଣ କରିଛନ୍ତି। ଏହି ନୂତନ ପ୍ରକଳ୍ପ ଦ୍ୱାରା ବସଷ୍ଟାଣ୍ଡକୁ ଆସୁଥିବା ଯାତ୍ରୀ ଓ ମୁଖ୍ୟତଃ ସ୍କୁଲ, କଲେଜର ଛାତ୍ରୀଛାତ୍ର, ଯୁବପିଢ଼ି ଆକୃଷ୍ଟ ହେବେ। ଆୟୋଜିତ ସମାରୋହରେ ସମ୍ମାନିତ ଅତିଥି ଭାବେ ଜିଲାପାଳ ସମର୍ଥ ବର୍ମା, ଅତିରିକ୍ତ ଜିଲାପାଳ (ଏଡିଏମ୍) ପ୍ରଦୀପ କୁମାର ସାହୁ, ଜିଲା ପ୍ରକଳ୍ପ(ପିଡି) ଜ୍ୟୋତି ପ୍ରକାଶ ମହାପାତ୍ର, ତହସିଲଦାର ରାମଚନ୍ଦ୍ର ଜେନା, ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଏମ୍.ଶ୍ରୀନିବାସ, ଏନ୍ଏସିର ପୂର୍ବତନ ଅଧ୍ୟକ୍ଷ ସନାତନ ପ୍ରଧାନ, ଜୀବନନାନ୍ଦ ମହାପାତ୍ର, ବ୍ରିଜେନ୍ଦ୍ର ପ୍ରଧାନ, ସନ୍ତୋଷ ଦାଶ, ଅରୁଣ ପ୍ରସାଦ ଦାଶ, ସନ୍ତୋଷ ଓଝା, କୌଶଲ୍ୟା ସାହୁ ପ୍ରମୁଖ ଯୋଗଦେଇଥିଲେ। ଏହି ଅବସରରେ ଗ୍ରାମ୍ୟ ପାନୀୟ ଜଳଯୋଗାଣ ବିଭାଗ ପକ୍ଷରୁ ୧କୋଟି ଟଙ୍କା ବ୍ୟୟରେ ମିଟେଇପୁର ପଞ୍ଚାୟତର ଛିଟିକଣାରେ ନବନିର୍ମିତ ପାଇପଲାଇନ ଜଳଯୋଗାଣ ପ୍ରକଳ୍ପକୁ ମନ୍ତ୍ରୀ ଦାଶ ଉଦ୍ଘାଟନ କରିଥିଲେ। ପରେ ମିଟେଇପୁରର ଭିଲିଶାସନଠାରେ ୮୪ଲକ୍ଷ ଟଙ୍କା ବ୍ୟୟରେ, ମାହାଳରେ ୬୩ଲକ୍ଷ ଟଙ୍କା ବ୍ୟୟରେ ଓ ଡେଣୁଅଁର ନାକଡିହ ଗ୍ରାମରେ ୩କୋଟି ଟଙ୍କା ବ୍ୟୟରେ ୩ଟି ପାଇପ୍ଲାଇନ ନୂତନ ଜଳଯୋଗାଣ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବା ସହ ଏହି ନୂତନ ପ୍ରକଳ୍ପଗୁଡ଼ିକର କାର୍ଯ୍ୟ ଖୁବ୍ଶୀଘ୍ର ଆରମ୍ଭ କରାଯିବ ବୋଲି ମନ୍ତ୍ରୀ କହିଥିଲେ। କାର୍ଯ୍ୟକ୍ରମରେ ଗ୍ରାମ୍ୟ ପାନୀୟ ଜଳଯୋଗାଣ ବିଭାଗର ସହକାରୀ ଯନ୍ତ୍ରୀ ପ୍ରବୀର କୁମାର ବଳ ଉପସ୍ଥିତ ରହି ଉତ୍ସବର ସଂଯୋଜନା କରିଥିଲେ।
