ସୋରଡ଼ା, ୫ା୫ (ଡି.ଏନ୍.ଏ.): ୨୦୨୪ ନିର୍ବାଚନକୁ ଆଉ ମାତ୍ର ବର୍ଷେରୁ କମ୍ ସମୟ ଥିବା ବେଳେ ୨୦୧୯ର ମାନସିକ ପୂରଣ କରିଛନ୍ତି ଗଞ୍ଜାମ ଜିଲା ସୋରଡ଼ା ବିଧାୟକ ପୂର୍ଣ୍ଣଚନ୍ଦ୍ର ସ୍ବାଇଁ। ଆନ୍ଧ୍ରପ୍ରଦେଶର ସୀମାଞ୍ଚଳମ୍ ମନ୍ଦିର ଯାଇ ମାନସିକ ପୂର୍ବକ ୧୫୦୦୦ ନଡ଼ିଆ ଭାଙ୍ଗିଛନ୍ତି।
ପ୍ରକାଶ ଯୋଗ୍ୟ, ସୋରଡାରୁ ତିନିଥର ବିଜୁ ଜନତା ଦଳରୁ ପ୍ରାର୍ଥୀ ହୋଇ ବିଧାୟକ ହୋଇଥିବା ସ୍ବାଇଁ ପ୍ରଥମେ ୨୦୦୯ ନିର୍ବାଚନରେ ୪୦୧୧ ଭୋଟ ବ୍ୟବଧାନରେ ଜିତିଥିଲେ। ସେତେବେଳେ ସେ ସେଠାରେ ୪୧୦୦ ନଡିଆ ଭାଙ୍ଗିଥିଲେ । ପୁନର୍ବାର ୨୦୧୪ରେ ୧୬୦୦୦ ବ୍ୟବଧାନରେ ନିର୍ବାଚନ ଜିତିବା ପରେ ଅନୁରୂପ ନଡିଆ ଭାଙ୍ଗିଥିଲେ । ସେହିପରି ୨୦୧୯ ନିର୍ବାଚନରେ ୧୩,୯୯୬ ଭୋଟରେ ଜିତିଥିଲେ। ସେତେବେଳେ ୧୫୦୦୦ ନଡିଆ ଭାଙ୍ଗିବା ପାଇଁ ମାନସିକ ରଖିଥିଲେ। ତେବେ କୋଭିଡ କଟକଣା, ବାପାଙ୍କ ଦେହାନ୍ତ ଓ ଶ୍ରାଦ୍ଧବାର୍ଷିକୀ ଶେଷ ହେବା ପରେ ନୃସିଂହ ଚତୁର୍ଦ୍ଦଶୀରେ କାର୍ଯ୍ୟ ସମ୍ପନ୍ନ ପାଇଁ ସ୍ଥିର କରିଥିଲେ। ପୂର୍ବ ପ୍ରସ୍ତୁତି କ୍ରମେ ବୁଧବାର ସୋରଡ଼ା ନିର୍ବାଚନ ମଣ୍ଡଳୀର ବେଲଗୁଣ୍ଠା ଏନ୍ଏସି ଓ ବ୍ଲକ, ସୋରଡ଼ା ଏନ୍ଏସି ଓ ବ୍ଲକର ମୋଟ ୪୪ ପଞ୍ଚାୟତ ଓ ୨ ଟି ଏନ୍ଏସିରୁ ୧୦୦ରୁ ଊର୍ଦ୍ଧ୍ୱ ଗାଡ଼ିରେ ୬୦୦ରୁ ଅଧିକ ସମର୍ଥକ ସୋରଡ଼ାରେ ଏକତ୍ରିତ ହୋଇଥିଲେ। ବୁଧବାର ସମସ୍ତ ଗାଡି ସୀମାଞ୍ଚଳମ ଅଭିମୁଖେ ଯାତ୍ରା କରି ସେଠାରେ ଗୁରୁବାର ଭୋର ସମୟରେ ପହଞ୍ଚତ୍ଥିଲେ। ସାମୂହିକ ଭାବେ ଠାକୁର ଦର୍ଶନ କରିଥିଲେ। ଆନ୍ଧ୍ରପ୍ରଦେଶର ବିଭିନ୍ନ ଅଞ୍ଚଳରୁ ୧୫ ହଜାର ନଡ଼ିଆ କିଣାଯାଇଥିଲା। ସକାଳ ୮ଟାରେ ପ୍ରଥମେ ବିଧାୟକ ନଡିଆ ଭଙ୍ଗା ଆରମ୍ଭ କରିଥିଲେ । ପରେ ସମସ୍ତେ ମିଶି ଭାଙ୍ଗିଥିଲେ। ସେଠାରେ ଏମ୍ପି ପ୍ରମିଳା ବିଶୋୟୀ ଉପସ୍ଥିତ ଥିଲେ। ସୋରଡ଼ା ନିର୍ବାଚନ ମଣ୍ଡଳୀର ବେଲଗୁଣ୍ଠା ବ୍ଲକ ଅଧ୍ୟକ୍ଷ ପ୍ରଶାନ୍ତ ନାୟକ, ଏନ୍ଏସି ଅଧ୍ୟକ୍ଷ ଫିରୋଜ ସେଠୀ, ଜିଲା ପରିଷଦ ସଭ୍ୟ ବିଦ୍ୟା ବିଶୋୟୀ, ସୋରଡା ଏନ୍ଏସି ଅଧ୍ୟକ୍ଷ ଶିବ ଶଙ୍କର ପଣ୍ଡା, ଜିଲା ପରିଷଦ ରାଜେଶ ସାହୁ, ପ୍ରଫୁଲ୍ଲ ମହାଙ୍କୁଡ, ରାମ ଶବର, ସରପଞ୍ଚ ତ୍ରିଲୋଚନ ସାହୁ, ସମସ୍ତ କାଉନସିଲର, ଉପାଧ୍ୟକ୍ଷ, ସମିତିସଭ୍ୟ, ଦଳୀୟ ସଭାପତି ପ୍ରମୁଖ ସାମିଲ ହୋଇଥିଲେ।
