ଲଣ୍ଡନ,୨୪।୧: ୱେଷ୍ଟଇଣ୍ଡିଜ ବିପକ୍ଷ ତିନି ମ୍ୟାଚ ବିଶିଷ୍ଟ ଟି -୨୦ ସିରିଜ ପାଇଁ କ୍ରିକେଟ ଅଷ୍ଟ୍ରେଲିଆ ୧୪ ଜଣିଆ ଟିମ ଘୋଷଣା କରିଛି। ଦଳର ଅଧିନାୟକ ଭାବେ ଅଲରାଉଣ୍ଡର ମିଚେଲ ମାର୍ଶଙ୍କୁ ନିଯୁକ୍ତ କରାଯାଇଛି। ଅଷ୍ଟ୍ରେଲିଆର ନିୟମିତ ଅଧିନାୟକ ପ୍ୟାଟ କମିନ୍ସଙ୍କ ବ୍ୟତୀତ ମିଚେଲ ଷ୍ଟାର୍କ ଏବଂ ଷ୍ଟିଭ ସ୍ମିଥ ଟି -୨୦ ସିରିଜର ଅଂଶ ହେବେ ନାହିଁ। କାର୍ଯ୍ୟ ଭାର ମ୍ୟାନେଜ୍ କରିବା ପାଇଁ ଏହି ଖେଳାଳିମାନଙ୍କୁ ବିଶ୍ରାମ ଦେବାକୁ କ୍ରିକେଟ ଅଷ୍ଟ୍ରେଲିଆ ନିଷ୍ପତ୍ତି ନେଇଛି। ତେବେ ଷ୍ଟାର ଅଲରାଉଣ୍ଡର ଗ୍ଲେନ ମ୍ୟାକ୍ସୱେଲ ଟି-୨୦ ସିରିଜ ପାଇଁ ଦଳକୁ ଫେରିଛନ୍ତି।
ତେବେ ଚଳିତ ବର୍ଷର ଟି -୨୦ ବିଶ୍ୱକପ୍ରେ ଦଳର ଦାୟିତ୍ୱ କିଏ ନେବ ତାହା କ୍ରିକେଟ ଅଷ୍ଟ୍ରେଲିଆ ଏ ପର୍ଯ୍ୟନ୍ତ ସ୍ପଷ୍ଟ କରି ନାହିଁ। ହେଲେ ମାର୍ଶ କମାଣ୍ଡ ପାଇବା ପରେ ଏବେ ଅନୁମାନ କରାଯାଇପାରେ ଯେ ସେ ବିଶ୍ୱକପ୍ ପାଇଁ ଅଧିନାୟକତ୍ୱ ସମ୍ଭାଳିପାରନ୍ତି। ଗତ ବର୍ଷ ମାଥ୍ୟୁ ୱେଡ ଭାରତ ବିପକ୍ଷ ଟି -୨୦ ସିରିଜରେ ଅଷ୍ଟ୍ରେଲିଆ ଦଳକୁ ଆଗେଇ ନେଇଥିବାର ନଜର ଆସିଥିଲେ।
