ବ୍ରହ୍ମପୁର ଅଫିସ,୧୬ା୨: ବ୍ରହ୍ମପୁର ନିମଖଣ୍ଡି ପୋଲିସ ଅପହରଣ କରାଯାଇଥିବା ଜଣେ ନାବାଳିକା ଛାତ୍ରୀଙ୍କୁ ପୁରୀରୁ ଉଦ୍ଧାର କରିଛି। ସେହିପରି ଅପହରଣକାରୀ ଯୁବକଙ୍କୁ ମଧ୍ୟ ସେଠାରୁ କାବୁ କରିଛି। ଅଭିଯୁକ୍ତ ଜଣଙ୍କ ସଦର ଥାନା ଅଞ୍ଚଳର ସୁରଜ ସାହୁ(୨୧)। ଗୁରୁବାର ପୋଲିସ ଉଭୟ ପୀଡ଼ିତା ଓ ଅପହରଣକାରୀଙ୍କ ମେଡିକାଲ ପରୀକ୍ଷା କରିଛି। ମାମଲା ନମ୍ବର ୫୬/୨୩ ରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ପରେ ତାଙ୍କୁ କୋର୍ଟ ନିର୍ଦ୍ଦେଶରେ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଅନ୍ୟପଟେ ଧାରା ୧୬୪ରେ ପୀଡ଼ିତାଙ୍କ ବୟାନ କୋର୍ଟରେ ରେକର୍ଡ କରାଯାଇଛି।
ପ୍ରକାଶ ଯେ, ଜଣେ ନାବାଳିକା ଛାତ୍ରୀଙ୍କୁ ପ୍ରଲୋଭିତ କରି ଗତ ୧୩ ତାରିଖରେ ତାଙ୍କ ଘର ନିକଟରୁ ଅପହରଣ କରାଯାଇଥିଲା। ଏନେଇ ଥାନାରେ ନାବାଳିକାଙ୍କ ବାପା ଅଭିଯୋଗ କରିବା ପରେ ପୋଲିସ ଏକ ମାମଲା ରୁଜୁ କରିଥିଲା। ଘଟଣାର ଅନୁସନ୍ଧାନ କରିବା ସହ ମୋବାଇଲ ଟ୍ରାକିଂରେ ଅପହରଣକାରୀଙ୍କ ଲୋକେସନ ଜାଣିବାକୁ ପାଇଥିଲା। ପୁରୀରେ ଯୁବକ ଜଣଙ୍କ ଉକ୍ତ ନାବାଳିକାଙ୍କୁ ନେଇ ରହୁଥିବା ଜଣାପଡିଥିଲା। ପୋଲିସ ବୁଧବାର ପୁରୀରେ ପହଞ୍ଚି ପ୍ରଥମେ ନାବାଳିକାଙ୍କୁ ଉଦ୍ଧାର କରିଥିଲା। ସେହିପରି ଅପହରଣକାରୀ ଯୁବକ ସୁରଜଙ୍କୁ ମଧ୍ୟ ସେଠାରୁ ଧରିଥିଲା। ସୁରଜ ନାବାଳିକାଙ୍କୁ ଅପହରଣ କରି ପୁରୀ ନେଇଯାଇଥିଲା। ସେଠାରେ ସେ ଏକ ଘର ଭଡ଼ା ନେଇ ତାଙ୍କୁ ବଳାତ୍କାର କରିଥିଲେ ବୋଲି ପୀଡ଼ିତା ଛାତ୍ରୀ ଜଣଙ୍କ ପୋଲିସ ନିକଟରେ ବୟାନ ଦେଇଥିଲେ।
