Advertisement

ସଞ୍ଜ ନଇଁଲେ ମାଫିଆ ସକ୍ରିୟ

ଅନୁଗୋଳ ଅଫିସ, ୧୦।୧: ପ୍ରାୟ ବର୍ଷେ ହେଲାଣି କରୋନା ମୁକାବିଲାରେ ପ୍ରଶାସନ ବ୍ୟସ୍ତ ରହିଛି। ଏହାର ସୁଯୋଗ ନେଇ ଅନୁଗୋଳ ଜିଲାରେ ସକ୍ରିୟ ହୋଇପଡ଼ିଛନ୍ତି ଲଘୁ ଖଣିଜ ପଦାର୍ଥ ମାଫିଆ। ସଞ୍ଜ ନଇଁଲେ ଅନାବାଦୀ, ଗୋଚର ଜମିରୁ ମାଟି ତାଡ଼ି ଟ୍ରକ୍‌, ଟିପ୍ପର ଓ ଟ୍ରାକ୍ଟର ଯୋଗେ ଚୋରା ଚାଲାଣ କରୁଛନ୍ତି। ବିଭିନ୍ନ ନଦୀରୁ ବାଲି, ପାହାଡ଼ିଆ ସ୍ଥାନରୁ ମୋରମ ଓ ମାଙ୍କଡ଼ା ପଥର ଜିଲାର ବିଭିନ୍ନ ସ୍ଥାନ ସହ ଜିଲା ବାହାରକୁ ପଠାଉଛନ୍ତି। ବିଶେଷକରି ବିଳମ୍ବିତ ରାତିରେ ବଅଁରପାଳ ଓ ବଡ଼କେରା ଦେଇ ଏସବୁର ଚୋରା ଚାଲାଣ କରି ମାଫିଆମାନେ ଲକ୍ଷ ଲକ୍ଷ ଟଙ୍କାର ଲାଭାଂଶ ପକେଟରେ ଭରୁଥିବା ବେଳେ ସରକାରଙ୍କୁ ଏ ବାବଦ ରାଜସ୍ବ ମିଳୁନାହିଁ। ତେବେ ବିଳମ୍ବ ହେଲେ ମଧ୍ୟ ଜିଲା ପ୍ରଶାସନ ଏ ଦିଗରେ ଜୋରଦାର କାର୍ଯ୍ୟାନୁଷ୍ଠାନ ଆରମ୍ଭ କରିଛି। ଘନ ଘନ ଯାଞ୍ଚ, ଚଢ଼ାଉ କରି ମାଫିଆମାନଙ୍କ ବିରୋଧରେ ମାମଲା ରୁଜୁ କରାଯାଉଛି। ଇତିମଧ୍ୟରେ ୩୫ଟି ଗାଡ଼ି ଧରାଯାଇ ପାଖାପାଖି ୧୫ ଲକ୍ଷରୁ ଅଧିକ ଟଙ୍କାର ଜରିମାନା ଆଦାୟ କରାଯାଇଛି।
ଖଣି ଖାଦାନ ଭରା ଅନୁଗୋଳ ଜିଲାରେ ଲଘୁ ଖଣିଜ ପଦାର୍ଥର ବିପୁଳ ଭଣ୍ଡାର ରହିଛି। ଏସବୁ ମଧ୍ୟରୁ ଅନେକ ଖଣିଜର ନିଲାମ ଦିଆଯାଇ ନାହିଁ। ଫଳରେ ଉକ୍ତ ସ୍ଥାନକୁ ଟାର୍ଗେଟ୍‌ କରୁଛନ୍ତି ମାଫିଆମାନେ। ସେମାନେ ରାତିରେ ମେଶିନ ଲଗାଇ ମାଟି, ମୋରମ ଆଦି ତାଡ଼ି ଚାଲାଣ କରୁଛନ୍ତି। ଏପରି କି ଚାଲିଥିବା ସରକାରୀ ନିର୍ମାଣ ସ୍ଥାନକୁ ଏସବୁ ପଠାଇ ଲକ୍ଷ ଲକ୍ଷ ଟଙ୍କାର ମୁନାଫା କମାଉଛନ୍ତି। ଏଭଳି କାର୍ଯ୍ୟରେ ସହଯୋଗ କରି କେତେଜଣ ସରକାରୀ କର୍ମଚାରୀ ମଧ୍ୟ ଅର୍ଥ ହଡପ୍‌ କରୁଛନ୍ତି। ସେମାନେ ମାଫିଆମାନଙ୍କୁ ସମସ୍ତ ସୂଚନା ପ୍ରଦାନ କରୁଛନ୍ତି। ଫଳରେ ଚଢ଼ାଉ ପୂର୍ବରୁ ଚୋରା ଚାଲାଣକାରୀମାନେ ଖସିଯିବାର ବାଟ ପାଇଯାଉଛନ୍ତି। ଏ ନେଇ ବାରମ୍ବାର ଅଭିଯୋଗ ଆସିବା ପରେ ଜିଲା ପ୍ରଶାସନ ପକ୍ଷରୁ ସ୍ପେଶାଲ ଡ୍ରାଇଭ୍‌ ଆରମ୍ଭ କରାଯାଇଛି। ଗତ ଡିସେମ୍ବର ୧୦ ତାରିଖରେ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁଙ୍କ ଅଧ୍ୟକ୍ଷତାରେ ଏ ନେଇ ବୈଠକ ବସିଥିଲା। ଲଘୁ ଖଣିଜର ଚୋରା କାରବାର ରୋକିବାକୁ ଜିଲାପାଳ ତାଗିଦ୍‌ କରିବା ପରେ ପ୍ରତ୍ୟେକ ଉପଖଣ୍ଡରେ ଉପଜିଲାପାଳଙ୍କ ତତ୍ତ୍ୱାବଧାନରେ ବିବିଧ ଶୃଙ୍ଖଳା ଟିମ୍‌ ଗଠନ କରାଯାଇ ଚଢ଼ାଉ ଆରମ୍ଭ କରାଯାଇଛି। ଏହି ଟିମ୍‌ରେ ରାଜସ୍ବ ବିଭାଗର ବରିଷ୍ଠ ଅଧିକାରୀଙ୍କ ସହ ଆଡିସନାଲ ତହସିଲଦାର ଓ ରାଜସ୍ବ କର୍ମଚାରୀଙ୍କୁ ସାମିଲ କରାଯାଇଛି। ସ୍ଥାନୀୟ ପୋଲିସ ପକ୍ଷରୁ ଆବଶ୍ୟକ ସହଯୋଗ କରାଯାଉଛି। ଫଳରେ ଡିସେମ୍ବର ୧୫ରୁ କେବଳ ଅନୁଗୋଳ ଉପଖଣ୍ଡରୁ ଚୋରା ଚାଲାଣ ବେଳେ ୩୫ଟି ଗାଡ଼ି ଏହି ଟିମ୍‌ ହାତରେ ଧରାପଡ଼ିଛି। ସେଥିରୁ ପାଖାପାଖି ୧୫ ଲକ୍ଷ ଟଙ୍କାର ଜରିମାନା ଆଦାୟ କରାଯାଇଥିବା ସୂଚନା ମିଳିଛି। ଗତ ୩ ଦିନ ମଧ୍ୟରେ ସାଢ଼େ ୩ ଲକ୍ଷ ଟଙ୍କା ଜରିମାନା ଆଦାୟ ହୋଇଛି। ସେହିପରି କୋଇଲା ମାଫିଆମାନଙ୍କ ଉପରେ ମଧ୍ୟ ପ୍ରଶାସନ, ପୋଲିସ ନଜର ରଖିଛି। ଅତର୍କିତ ଚଢ଼ାଉ କରି ଏମାନଙ୍କୁ ଧରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।
ସରକାରଙ୍କ ନିର୍ଦ୍ଦେଶ ପାଳନ କରାଯାଉଛି
ଲଘୁ ଖଣିଜର ବେଆଇନ ଚାଲାଣ ଅପରାଧ। ଏପରି କାର୍ଯ୍ୟରେ ଜଡ଼ିତ ବ୍ୟକ୍ତିମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ସରକାରଙ୍କ ପକ୍ଷରୁ ନିର୍ଦ୍ଦେଶ ରହିଛି। ତେଣୁ ଜିଲାର ବିଭିନ୍ନ ସ୍ଥାନରେ ବିବିଧ ଶୃଙ୍ଖଳା ଟିମ୍‌ ଗଢ଼ାଯାଇ ଚଢ଼ାଉ କରାଯାଉଛି। ଆଗକୁ ଏପରି ଚଢ଼ାଉ ଜାରି ରହିବ। ମାଫିଆଙ୍କ ବିରୋଧରେ ମାମଲା ରୁଜୁ ସହ ଜରିମାନା ଆଦାୟ କରାଯିବ।
-ବାସୁଦେବ ଶତପଥୀ, ଅନୁଗୋଳ ଉପଜିଲାପାଳ
ମାଫିଆଙ୍କୁ ପ୍ରଶ୍ରୟ ଦିଆଯିବ ନାହିଁ
ଚୋରାରେ ଚାଲାଣ ହେଉଥିବା ଲଘୁ ଖଣିଜ ପଦାର୍ଥ ଉପରେ ପୋଲିସ ନଜର ରଖିଛି। ବିଭିନ୍ନ ସମୟରେ ଗାଡ଼ି ଯାଞ୍ଚ କରାଯାଉଛି। ଧରାପଡ଼ୁଥିବା ଗାଡ଼ିକୁ ତୁରନ୍ତ ସ୍ଥାନୀୟ ତହସିଲଦାରଙ୍କୁ ହସ୍ତାନ୍ତର କରାଯାଉଛି। ତହସିଲଦାରଙ୍କ ଅଭିଯୋଗ କ୍ରମେ ମାମଲା ରୁଜୁ କରାଯାଉଛି। ବଡ଼କେରା ଦେଇ କୋଇଲା ଚୋରା ଚାଲାଣ ଅଭିଯୋଗର ଅନୁସନ୍ଧାନ କରାଯିବ।
-ଅଶ୍ୱିନୀ ସାହୁ, ଏସ୍‌ଡିପିଓ, ଅନୁଗୋଳ
ସ୍ଥାୟୀ ପ୍ରତିକାର କରାଯିବା ଦରକାର
ଲଘୁ ଖଣିଜ ପଦାର୍ଥ ସମ୍ପର୍କିତ ରୟାଲିଟି ପ୍ରଦାନରେ ଅନେକ ସମୟରେ ସମସ୍ୟା ରହୁଛି। କେତେକ ସ୍ଥାନରେ ଏହା ଦିଆଯାଉଥିଲେ ମଧ୍ୟ କେତେଜଣ ସରକାରୀ ଅଧିକାରୀ ଏହାକୁ ଅନ୍ୟ ଉଦ୍ଦେଶ୍ୟରେ ବ୍ୟବହାର କରୁଛନ୍ତି। ପୂର୍ବରୁ ବିଭିନ୍ନ ସଙ୍ଗଠନ ପକ୍ଷରୁ ରାଜ୍ୟ ସରକାରଙ୍କୁ ଅବଗତ କରାଯାଇଛି। ସ୍ଥାୟୀ ପ୍ରତିକାର କରାଗଲେ ଗାଡ଼ି ମାଲିକଙ୍କ ସହ ଜନସାଧାରଣଙ୍କ ପାଇଁ ଭଲ ହେବ।
-ବିଭୂତି ଦାସ, ସଭାପତି, ଅନୁଗୋଳ ଜିଲା ଟ୍ରକ୍‌ ମାଲିକ ସଂଘ
ଚୋରା ଚାଲାଣକାରୀ ସାବାଡ୍‌ ହେବେ
ପ୍ରଶାସନ ପକ୍ଷରୁ କରାଯାଉଥିବା ଚଢ଼ାଉ ନିଶ୍ଚିତ ସ୍ବାଗତଯୋଗ୍ୟ। ତେବେ ବହୁ ପୂର୍ବରୁ ଏପରି କରାଯିବା ଆବଶ୍ୟକ ଥିଲା। ପ୍ରଶାସନ ଢିଲାପଣର ଫାଇଦା ମାଫିଆମାନେ ଉଠାଉଥିଲେ। ଏବେ ଧରପଗଡ଼ ଜୋରଦାର କରାଯାଉଥିବାରୁ ଚୋରା ଚାଲାଣକାରୀ ସାବାଡ଼ ହେବେ।
-ପ୍ରଦୀପ ଦେବତା, ଆଇନଜୀବୀ, ଅନୁଗୋଳ


Enter your email to get our daily news in your inbox.

All Right Reserved By Dharitri.Com

କାର୍ଯ୍ୟକ୍ଷମ ହେଉନି ବାଣିଜ୍ୟକର କାର୍ଯ୍ୟାଳୟ

ତାଳଚେର, ୧୪ା୨ (ନି.ପ୍ର.) ତାଳଚେରଠାରେ ରାଜ୍ୟ ସରକାରଙ୍କ ବାଣିଜ୍ୟକର ଅଧିକାରୀଙ୍କ କାର୍ଯ୍ୟାଳୟ ଅଛି। କର୍ମଚାରୀ ମଧ୍ୟ ଅଛନ୍ତି। କିନ୍ତୁ ଏହାକୁ କାର୍ଯ୍ୟକ୍ଷମ କରାଯାଉ ନାହିଁ। ଗତ...

କାଳବୈଶାଖୀ: ବ୍ୟାପକ କ୍ଷୟକ୍ଷତି

କଣିହାଁ, ୭ା୬(ଡି.ଏନ.ଏ.)- କଣିହାଁ ବ୍ଲକ ଅଞ୍ଚଳରେ କାଳବୈଶାଖୀ ତାଣ୍ଡବ ଥମିବାର ନାଁ ଧରୁନି। କିଛିଦିନ ହେଲା ଲଗାତର ଝଡବର୍ଷା ଯୋଗୁ ବହୁ କ୍ଷୟକ୍ଷତି ଘଟୁଛି। ଗୁରୁବାର...

ଦୁର୍ଘଟଣାରେ ନାଲ୍‌କୋ କର୍ମଚାରୀ ଗୁରୁତର

ବଅଁରପାଳ,୧୩।୭(ଡି.ଏନ୍‌.ଏ.): ଅନୁଗୋଳ ଜିଲା ନାଲ୍‌କୋ ସେଲ୍‌ଟର ପ୍ଲାଣ୍ଟ ପରିସର ପଟଲାଇନ କ୍ୟାଣ୍ଟିନ୍‌ ସମ୍ମୁଖରେ ଶନିବାର ମଧ୍ୟାହ୍ନରେ ଏକ ମେଟାଲ୍‌ ବୋଝେଇ ଟ୍ରେଲର (ଏମ୍‌ଟିଟି) ଧକ୍କାରେ ଜଣେ...

ଶହୀଦ୍‌ଙ୍କ ମା’ବାପାଙ୍କୁ ସମ୍ବର୍ଦ୍ଧନା

ବଇଣ୍ଡା,୨୯।୫(ଡି.ଏନ.ଏ.): ଦେଶ ପାଇଁ ଜୀବନ ଦେଇ ଶହୀଦ୍‌ ହୋଇଥିବା ଅନୁଗୋଳ ଜିଲା କିଶୋରନଗର ବ୍ଲକ ଅଙ୍ଗପଡା ଗ୍ରାମର ଦେବାଶିଷ ସେଠୀଙ୍କ ମାତା ପିତାଙ୍କୁ ରାଜ୍ୟ ପୋଲିସ...

ଦାବିପତ୍ର ଦେଲେ ଡାକ୍ତର, କର୍ମଚାରୀ

ତାଳଚେର,୧୫ା୮(ନି.ପ୍ର.) ତାଳଚେର ଉପଖଣ୍ଡ ଡାକ୍ତରଖାନାରେ ଡାକ୍ତର ଓ ନର୍ସଙ୍କୁ ମାଡ଼ ମାରିଥିବା ଅଭିଯୁକ୍ତଙ୍କୁ ଗିରଫ କରାଯିବା, ଡାକ୍ତରଖାନା ପରିସରରେ ପୋଲିସ ଆଉଟପୋଷ୍ଟ ଖୋଲାଯିବା ଦାବିରେ ବୁଧବାର ତାଳଚେର...

‘ଜାତୀୟସ୍ତରୀୟ ପାଇଁ ଶ୍ରେଷ୍ଠ ପ୍ରଦର୍ଶନ କର’

ଅନୁଗୋଳ ଅଫିସ୍‌, ୨୪ା୧ ଅନୁଗୋଳ ଫରେଷ୍ଟ ରେଞ୍ଜର କଲେଜରେ ରାଜ୍ୟସ୍ତରୀୟ ବନ ବିଭାଗ ସ୍ପୋଟର୍‌ସ ମିଟ୍‌ ଗୁରୁବାର ଉଦ୍‌ଘାଟିତ ହୋଇଯାଇଛି। ଏଥିରେ ରାଜ୍ୟର ୮ଟି ସର୍କଲର...

୨୯ ବର୍ଷ ହେଲା ଚାଲିଛି ମାନସିକ ପୂରଣ

ବଇଣ୍ଡା,୨୪।୧୧: ଟିଏ ପଟେ ବୁଡ଼ି ଯାଉଥିବା କଳା, ସଂସ୍କୃତିକୁ ଉଜ୍ଜୀବିତ କରିବାକୁ ପ୍ରୟାସ ତ ଅନ୍ୟପଟେ ଧାର୍ମିକ ଭାବନା ବା ମାନସିକ ପୂରଣ ପାଇଁ ଚାଲିଛି...

ଶ୍ରାବଣ ଶେଷ ସୋମବାର: ଛେଣ୍ଡିପଦାର ସମସ୍ତ ଶୈବପୀଠରେ ଶ୍ରଦ୍ଧାଳୁଙ୍କ ଭିଡ଼

ଛେଣ୍ଡିପଦା,୧୨।୮(ଡିଏନଏ): ଅନୁଗୋଳ ଜିଲାର ଛେଣ୍ଡିପଦା ବ୍ଲକ ଅଞ୍ଚଳରେ ଥିବା ସମସ୍ତ ଶୈବପୀଠ ତଥା ଶିବ ମନ୍ଦିରରେ ପବିତ୍ର ଶ୍ରାବଣ ମାସର ଶେଷ ସୋମବାର ଅବସରରେ ଶ୍ରଦ୍ଧାଳୁଙ୍କ...

Advertisement
Archives

Model This Week