ଥୁଆମୂଳ ରାମପୁର, ୬ା୨ (ଦୁର୍ଗା କୀର୍ତ୍ତି): ଖଣି ବିଭାଗ ଥୁଆମୂଳ ରାମପୁର ଅଞ୍ଚଳରେ ଚଢ଼ାଉ କରି ୩ ବାଲି ବୋଝେଇ ହାଇୱା ଜବତ କରିଛି। କଳାହାଣ୍ଡି ଖଣି ଉପନିର୍ଦ୍ଦେଶକ ବିଶ୍ୱନାଥ ସୋରେନଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏକ ସ୍ବତନ୍ତ୍ର ଟିମ ବ୍ଲକର ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ଏହି ସମୟରେ ବେଆଇନ ଭାବେ ବାଲି ପରିବହନ କରୁଥିବା ୩ଟି ହାଇୱା (ଓଡ଼ି୦୮ଏସ୦୦୩୪, ଓଡ଼ି୦୮ଏନ୦୦୩୪ ଓ ଓଡ଼ି୦୮ଏମ୦୦୩୪) କୁ ଅଧିକାରୀମାନେ ଜବତ କରି ଥୁଆମୂଳ ରାମପୁର ଥାନା ଜିମା ଦେଇଛନ୍ତି। କନିଷ୍ଠ ଖଣି ଅଧିକାରୀ ଦିନବନ୍ଧୁ କିଶାନ, ରାଜୀବ କାଲୋ, କୃଷ୍ଣ ବାଗେ ଏବଂ ଅନିଲ କୁମାର ପ୍ରଧାନଙ୍କ ନେତୃତ୍ୱରେ ଗଠିତ ଟିମ ଚଢାଉରେ ସାମିଲ ହୋଇଥିଲା। ସୂଚନାଯୋଗ୍ୟ, ପୂର୍ବରୁ ବାଲି ଓ ପଥର କ୍ୱାରି ତହସିଲ ଅଧୀନରେ ଥିବା ବେଳେ ବର୍ତ୍ତମାନ ଏହା ଖଣି ବିଭାଗ ଅଧୀନକୁ ଆସିଛି। ଜବତ ଗାଡ଼ିଗୁଡ଼ିକ ଉପରେ କେତେ ଜରିମାନା କରାଯିବ ସେ ନେଇ ଖଣି ଉପନିର୍ଦ୍ଦେଶକ ଚୂଡ଼ାନ୍ତ ନିଷ୍ପତ୍ତି ନେବେ ବୋଲି ବିଭାଗ ପକ୍ଷରୁ କୁହାଯାଇଛି। ଏହି ଚଢାଉ ପରେ ବାଲି ଓ ପଥର ମାଫିଆଙ୍କ ମଧ୍ୟରେ ଛନକା ପଶିଛି।
Dharitri – Odisha’s No.1 Odia Daily
