ନୂଆଦିଲ୍ଲୀ,୨୫।୭: ସେପ୍ଟେମ୍ବର ୧୯ରୁ ଖେଳାଯିବାକୁ ଥିବା ଆଇପିଏଲ୍-୧୪’ର ବଳକା ମ୍ୟାଚ୍ର କାର୍ଯ୍ୟସୂଚୀ ରବିବାର ପ୍ରକାଶ ପାଇଛି। ବଳକା ଥିବା ୩୧ ମ୍ୟାଚ୍ର ପ୍ରଥମ ମୁକାବିଲାରେ ପରସ୍ପରକୁ ଭେଟିବେ ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଓ ୩ ଥର ଚାମ୍ପିୟନ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)। ଗତ ମେ’ରେ ବିଭିନ୍ନ ଦଳର ବାୟୋ ବବଲରେ ଖେଳାଳି କରୋନା ସଂକ୍ରମିତ ହେବା ପରେ ଆଇପିଏଲକୁ ସ୍ଥଗିତ କରି ଦିଆଯାଇଥିଲା।
କାର୍ଯ୍ୟସୂଚୀ ଅନୁଯାୟୀ, ଦୁବାଇ ଇଣ୍ଟରନ୍ୟାଶନାଲ ଷ୍ଟାଡିୟମରେ ପ୍ରଥମ କ୍ୱାଲିଫାୟର ଓ ଫାଇନାଲ ସହ ୧୩ଟି ମ୍ୟାଚ୍ ଖେଳାଯିବ। ସେହିଭଳି ଶାରାଜାରେ ଏଲିମିନେଟର ଓ ଦ୍ୱିତୀୟ କ୍ୱାଲିଫାୟର ସମେତ ୧୦ ମ୍ୟାଚ୍ ଅନୁଷ୍ଠିତ ହେବ। ବଳକା ୮ଟି ମୁକାବିଲା ଖେଳାଯିବ ଆବୁଧାବିରେ। ୭ଟି ଡବଲ ହେଡର ମ୍ୟାଚ୍ ମଧ୍ୟରୁ ପ୍ରଥମଟି ସେପ୍ଟେମ୍ବର ୨୫ ତାରିଖରେ ଖେଳାଯିବ ବୋଲି କାର୍ଯ୍ୟସୂଚୀରେ ଦର୍ଶାଯାଇଛି। ଗତ ବର୍ଷ ଭଳି ଅପରାହ୍ନ ମ୍ୟାଚ୍ ସାଢ଼େ ୩ଟା ଓ ସନ୍ଧ୍ୟା ମ୍ୟାଚ୍ ୭ଟା ୩୦ରୁ ଆରମ୍ଭ ହେବ। ପ୍ରତ୍ୟେକ ଦଳ ଅତିକମ୍ରେ ଗୋଟିଏ ଲେଖାଏ ଅପରାହ୍ନ ମ୍ୟାଚ୍ ଖେଳିବେ। ବର୍ତ୍ତମାନ ପଏଣ୍ଟ ଟେବୁଲ ଶୀର୍ଷରେ ଥିବା ଦିଲ୍ଲୀ କ୍ୟାପିଟାଲ୍ସ ସର୍ବାଧିକ ୩ଟି ଅପରାହ୍ନ ମ୍ୟାଚ୍ ଖେଳିବାକୁ ଥିବାବେଳେ ସିଏସ୍କେ, କେକେଆର, ଏମ୍ଆଇ ଓ ପିବିକେଏସ୍ ଅପରାହ୍ନରେ ୨ ଲେଖାଏ ମ୍ୟାଚ୍ ଖେଳିବେ।
ଲିଗ୍ ପର୍ଯ୍ୟାୟ ଅକ୍ଟୋବର ୮ରେ ଡବଲ ହେଡର ସହ ଶେଷ ହେବ। ଏହାର ଦୁଇ ଦିନ ପରେ ଆରମ୍ଭ ହେବ ପ୍ଲେଅଫ୍ସ। ପୂର୍ବ ଘୋଷଣା ଅନୁଯାୟୀ ଫାଇନାଲ ମ୍ୟାଚ୍ ଖେଳାଯିବ ୧୫ରେ।
