ବାରିପଦା ଅଫିସ, ୨୫ା୬: ମୟୂରଭଞ୍ଜ ଜିଲା ଯଶିପୁର ବ୍ଲକ ଅଧୀନ ବରେହିପାଣି, ଗୁଡ଼ୁଗୁଡ଼ିଆ ଓ ଧଳବଣୀ ପଞ୍ଚାୟତରେ ଏମ୍ଜିଏନ୍ଆର୍ଇଜିଏସ୍ ଅର୍ଥ ହଡ଼ପ ଘଟଣାରେ ୧୦ ସରକାରୀ ଅଧିକାରୀ ଓ ୩ ସରପଞ୍ଚଙ୍କ ନାମରେ ମାମଲା ରୁଜୁ ପାଇଁ ଜିଲାପାଳ ବିନୀତ ଭରଦ୍ୱାଜ ନିର୍ଦ୍ଦେଶ ଦେଇଛନ୍ତି। ଚିଠି ନଂ. ୬୦୦୯/୧୭ା୬ା୨୦୨୦ରେ ସ୍ଥାନୀୟ ବିଡିଓଙ୍କୁ ଏତଲା ଦେବା ପାଇଁ ଜିଲାପାଳ ଏହି ନିର୍ଦ୍ଦେଶ ଦେଇଛନ୍ତି।
ସୂଚନା ଅନୁଯାୟୀ, ବରେହିପାଣି, ଗୁଡ଼ୁଗୁଡ଼ିଆ ଓ ଧଳବଣୀ ପଞ୍ଚାୟତରେ ଏମ୍ଜିଏନ୍ଆର୍ଇଜିଏସ୍ ରାସ୍ତା କାମ ନ କରି ଅର୍ଥ ହଡ଼ପ କରାଯାଇଥିବା ଅଭିଯୋଗ ହୋଇଥିଲା। ଏନେଇ ପିଡି ଡିଆର୍ଡିଏଙ୍କୁ ତଦନ୍ତ କରି ରିପୋର୍ଟ ଦେବାକୁ ଜିଲାପାଳ ନିର୍ଦ୍ଦେଶ ଦେଇଥିଲେ। ତଦନ୍ତ ରିପୋର୍ଟ ମିଳିବା ପରେ ଜିଲାପାଳ ଭରଦ୍ୱାଜ ବରେହିପାଣି ପଞ୍ଚାୟତ ସରପଞ୍ଚ ଜୁଝେର ବାଙ୍ଗସିଂ, ଗୁଡ଼ୁଗୁଡ଼ିଆ ସରପଞ୍ଚ ମାଲାରାମ ହୋ ଏବଂ ଧଳବଣୀ ସରପଞ୍ଚ ସବିତା ନାଏକଙ୍କ ସମେତ ଯଶିପୁର ବ୍ଲକ ଏସିପି(ଆସିଷ୍ଟାଣ୍ଟ କମ୍ପ୍ୟୁଟର ପ୍ରୋଗ୍ରାମର) ଜିତେନ୍ଦ୍ର ମହାନ୍ତ, କନିଷ୍ଠ ଯନ୍ତ୍ରୀ ଦିବ୍ୟଲୋଚନ ନାଏକ, ବରେହିପାଣି ପଞ୍ଚାୟତର ପୂର୍ବତନ ପିଇଓ(ପଞ୍ଚାୟତ ନିର୍ବାହୀ ଅଧିକାରୀ) ବେଣୁଧର ନାୟକ, ଗୁଡ଼ୁଗୁଡ଼ିଆ ପଞ୍ଚାୟତ ପିଇଓ ସନ୍ତୋଷ କୁମାର ଦାଶ, ଧଳବଣି ପଞ୍ଚାୟତ ପିଇଓ ମଙ୍ଗିଲାଲ ହୋ, ବରେହିପାଣି ଜିଆର୍ଏସ୍ ରବୀନ୍ଦ୍ର ନାଥ ଚାକି, ଧଳବଣି ଜିଆର୍ଏସ୍ ଦେବାଶିଷ ମାରାଣ୍ଡି, ଗୁଡ଼ୁଗୁଡିଆ ଜିଆର୍ଏସ୍ ସଞ୍ଜୀବ କୁମାର ଡରାଇ, ବ୍ଲକ ଏମ୍ଜିଏନ୍ଆର୍ଇଜିଏସ ଆସିଷ୍ଟାଣ୍ଟ ଗୁରୁଚରଣ ଦାସ ଏବଂ ଶଶୀଭୂଷଣ ନାୟକଙ୍କ ନାମରେ ମାମଲା ରୁଜୁ କରିବାକୁ ନିର୍ଦ୍ଦେଶ ଦେଇଛନ୍ତି।
