କବିସୂର୍ଯ୍ୟନଗର,୧୨।୨(ଡି.ଏନ.ଏ.): ଗଞ୍ଜାମ ଜିଲାର ଅଧିଷ୍ଠାତ୍ରୀ ଦେବୀ ମା’ ମହାମାୟୀ। ରାଜ୍ୟର କୋଣଅନୁକୋଣରୁ ଛୁଟି ଆସନ୍ତି ହଜାର ହଜାର ଭକ୍ତ। ବିଶେଷତଃ ଅମାବାସ୍ୟା, ସଂକ୍ରାନ୍ତି, ମଙ୍ଗଳବାର ଓ ଶନିବାର ଆଦି ଦିନରେ ଭିଡ଼ ଜମେ। ମା’ ମହାମାୟୀଙ୍କ ତୋରଣ ମୁଖ୍ୟ ରାସ୍ତାକୁ ମୁହଁକରି ରହିଛି। ଏଠାରୁ ମନ୍ଦିର ପ୍ରାୟ ୨୦୦ମିଟର। ରାସ୍ତାର ଉଭୟ କଡ଼ରେ ମାଳ ମାଳ ଦୋକାନୀ ପସରା ପକାଇ ବେପାର କରନ୍ତି। ଏମାନେ ରାସ୍ତାର ଅଧା ସ୍ଥାନ ମାଡ଼ି ବସୁଛନ୍ତି। ଫଳରେ ଟ୍ରାଫିକ ସମସ୍ୟା ସୃଷ୍ଟି ହେବା ସହ ଦୁର୍ଘଟଣାର ଆଶଙ୍କା ମଧ୍ୟ ଦେଖାଦେଇଛି। ଅନଧିକୃତ ଭାବେ ମାଡ଼ି ବସିଥିବା ବେପାରୀଙ୍କଠାରୁ ଏନଏସି ପ୍ରତିଦିନ ଟିକସ ଆଦାୟ କରୁଛି। କିନ୍ତୁ ତା’ ପ୍ରତି ଦୃଷ୍ଟି ନ ଦେବା ଭକ୍ତଙ୍କ ଭାବାବେଗକୁ ବାଧୁଛି। ଅନ୍ୟପଟେ ମନ୍ଦିର ସମ୍ମୁଖରେ ଅନଧିକୃତ ଭାବେ ମାଳ ମାଳ ଗାଡି ପରିସ୍ଥିତିକୁ ଅଣାୟତ୍ତ କରୁଛି। ଯାହା ଫଳରେ ଭକ୍ତଙ୍କ ଯାତାୟାତରେ ବାଧା ଉପୁଜୁଛି। ସୂଚନା ପ୍ରକାରେ ବେପାରୀ ସ୍ବତଃପ୍ରବୃତ ରାସ୍ତାରୁ ହଟିବାକୁ ଚାହୁଁଥିଲେ ବି ସମସ୍ତ ବେପାରୀଙ୍କ ମଧ୍ୟରେ ସମନ୍ବୟ ରହୁନି। ଅନ୍ୟପଟେ ପ୍ରଶାସନିକ ଅଧିକାରୀ, ଏନଏସି କର୍ତ୍ତୃପକ୍ଷଙ୍କ ଠାରେ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ଏଥିପ୍ରତି ଦୃଷ୍ଟି ନ ଦେବା କ୍ଷୋଭ ଓ ପରିତାପର ବିଷୟ। ମହାମାୟୀ
ମନ୍ଦିରକୁ ପ୍ରବେଶ ଓ ପ୍ରସ୍ଥାନ ରାସ୍ତା ଭିନ୍ନ ହେବା ସହ ରାସ୍ତାକୁ ମାଡ଼ି ବସିଥିବା ବେପାରୀକୁ ତୁରନ୍ତ ଉଠାଯାଉ ବୋଲି ସହରବାସୀ ଦାବି କରିଛନ୍ତି।
