ନୂଆଦିଲ୍ଲୀ,୬।୧୨ : ବିଲ ଆଣ୍ଡ ମିଲିଣ୍ଡା ଗେଟ୍ସ ଫାଉଣ୍ଡେଶନର ଉପାଧ୍ୟକ୍ଷା ମିଲିଣ୍ଡା ଫ୍ରେଞ୍ଚ ଗେଟ୍ସ ମଙ୍ଗଳବାର ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସାକ୍ଷାତ କରିଛନ୍ତି। ମିଲିଣ୍ଡାଙ୍କୁ ସ୍ବାଗତ କରି ରାଷ୍ଟ୍ରପତି ଗତ ଦୁଇ ଦଶନ୍ଧି ମଧ୍ୟରେ ବିଲ ଆଣ୍ଡ ମିଲିଣ୍ଡା ଗେଟ୍ସ ଫାଉଣ୍ଡେଶନ ଦ୍ୱାରା କରାଯାଇଥିବା କାର୍ଯ୍ୟକୁ ପ୍ରଶଂସା କରିଥିଲେ। ରାଷ୍ଟ୍ରପତି ମୁର୍ମୁ କହିଛନ୍ତି ଯେ କେନ୍ଦ୍ର ସରକାର ଅନେକ ଫ୍ଲାଗଶିପ ପଦକ୍ଷେପ ମାଧ୍ୟମରେ ସ୍ବାସ୍ଥ୍ୟ ଏବଂ ବିକାଶରେ ଗୁରୁତ୍ୱପୂର୍ଣ୍ଣ ନିବେଶ କରୁଛନ୍ତି। ଫାଉଣ୍ଡେଶନ ସହାୟତା ଚାହୁଁଥିବା ସମସ୍ତ ବର୍ଗଙ୍କ ପାଖରେ ପହଞ୍ଚିବାର ଉଦ୍ୟମ କରିବ ବୋଲି ମୁର୍ମୁ ଆଶାପ୍ରକାଶ କରିଛନ୍ତି। ରାଷ୍ଟ୍ରପତି ଦେଶର ସାମଗ୍ରିକ ବିକାଶରେ ମହିଳାଙ୍କ ଭୂମିକା ଉପରେ ଆଲୋକପାତ କରିବା ସହ ଲିଙ୍ଗଗତ ସମାନତା ଏବଂ ମହିଳା ସଶକ୍ତିକରଣ ଦିଗରେ ଉଦ୍ୟମ ଜାରି ରଖିବାକୁ ଫାଉଣ୍ଡେଶନକୁ ଆହ୍ବାନ ଦେଇଛନ୍ତି। ଜନସ୍ବାସ୍ଥ୍ୟ, ସଂକ୍ରାମକ ରୋଗ ନିୟନ୍ତ୍ରଣ, ମ୍ୟାଲେରିଆ ଏବଂ ଯକ୍ଷ୍ମା ରୋକିବାରେ ବିଲ ଆଣ୍ଡ ମିଲିଣ୍ଡା ଗେଟ୍ସ ଫାଉଣ୍ଡେଶନର କାର୍ଯ୍ୟକୁ ରାଷ୍ଟ୍ରପତି ପ୍ରଶଂସା କରିଥିଲେ। ଫାଉଣ୍ଡେଶନକୁ ରକ୍ତହୀନତା ପରି ଅନ୍ୟ ସମସ୍ୟା ଉପରେ ଧ୍ୟାନ ଦେବାକୁ କହିିଥିଲେ। ଯାହାକି ଆଦିବାସୀ ସମ୍ପ୍ରଦାୟକୁ ବିଶେଷ ପ୍ରଭାବିତ କରିଥାଏ। କୃଷି ବିକାଶ କ୍ଷେତ୍ରରେ ଫାଉଣ୍ଡେଶନର କାର୍ଯ୍ୟକୁ ରାଷ୍ଟ୍ରପତି ପ୍ରଶଂସା କରିବା ସହ ଆଦିବାସୀ ଅଞ୍ଚଳରେ ଛୋଟ ଜଙ୍ଗଲ ସୃଷ୍ଟି ସହିତ ସହଯୋଗୀ ମାର୍କେଟିଂ ଲାଗି ପଦକ୍ଷେପ ଆରମ୍ଭ କରିବାକୁ ଫାଉଣ୍ଡେଶନକୁ ଅନୁରୋଧ କରିଛନ୍ତି।
