ମେଲବୋର୍ନ, ୨୯।୧୨: ଅସମାପ୍ତ ଦଶମ ଉଇକେଟ ଯୋଡ଼ିରେ ନାଥାନ ଲିୟନ ଓ ସ୍କଟ ବୋଲାଣ୍ଡଙ୍କ ଅର୍ଦ୍ଧଶତକୀୟ ଭାଗୀଦାରି ବଳରେ ଅଷ୍ଟ୍ରେଲିଆ ମେଲବୋର୍ନ କ୍ରିକେଟ ଟେଷ୍ଟରେ ଭାରତ ବିପକ୍ଷରେ ଓଭରଅଲ୍ ୩୩୩ ରନରେ ଅଗ୍ରଣୀ ହାସଲ କରିଛି।
ରବିବାର ୪ର୍ଥ ଦିବସ ଖେଳ ଶେଷ ବେଳକୁ ଅଷ୍ଟ୍ରେଲିଆ ଦ୍ୱିତୀୟ ଇନିଂସରେ ୯ ଉଇକେଟ ହରାଇ ୨୨୮ ରନ କରିଛି। ୧୭୩ ରନରେ ୯ମ ଉଇକେଟର ପତନ ହୋଇଥିଲେ ହେଁ ଲିୟନ ଓ ବୋଲାଣ୍ଡ ୫୫ ରନ ଯୋଗକରି ଭାରତୀୟ ବୋଲରଙ୍କୁ ନିରାଶ କରିଛନ୍ତି।
ଲିୟନ ୪୧ ଓ ବୋଲାଣ୍ଡ ୧୦ ରନରେ ଅପରାଜିତ ରହିଛନ୍ତି। ଟପ୍ ଓ ମିଡିଲ ଅର୍ଡରରେ କେବଳ ମାର୍ନସ ଲାବୁସେନ (୭୦ ରନ)ଙ୍କୁ ଛାଡ଼ିଦେଲେ ଅନ୍ୟ ସମସ୍ତ ବ୍ୟାଟର ବିଫଳ ହୋଇଥିବାବେଳେ ଶେଷ ଉଇକେଟ ଭାଗୀଦାରି ଅଷ୍ଟ୍ରେଲିଆକୁ ଭଲ ସ୍ଥିତିରେ ରଖିଛି। ସୋମବାର ମ୍ୟାଚର ଅନ୍ତିମ ଦିବସ।
