ୱାଶିଂଟନ,୧୩ ।୨: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶାସନ କ୍ଷମତା ହଟାଇବା ପରେ ଏବେ ପତ୍ନୀ ମେଲାନିଆ ଟ୍ରମ୍ପଙ୍କ ସହ ତାଙ୍କର ସମ୍ପର୍କ କୁଆଡେ ଭଲ ନ ଥିବା ଆଲୋଚନା ହେଉଛି । ଫ୍ଲୋରିଡା ଯିବା ପରେ ମେଲାନିଆ ଅଧିକାଂଶ ସମୟ ସ୍ପାରେ କାଟୁଥିବା କୁହାଯାଉଛି । ଆହୁରି ମଧ୍ୟ ଆଲୋଚନା ହେଉଛି କି ଉଭୟ ଅଲଗା ହେବାକୁ ଚାହୁଁଛନ୍ତି । ଇତିମଧ୍ୟରେ ମେଲାନିଆ ତାଙ୍କ ସୋସିଆଲ ମିଡିଆ ଆକାଉଣ୍ଟ ଇନଷ୍ଟାଗ୍ରାମରୁ ସମସ୍ତ ପୋଷ୍ଟ ହଟାଇ ଦେଇଥିବା ଜଣାପଡିଛି । ହ୍ୱାଇଟ ହାଉସରୁ ଯିବା ପରେ ମେଲାନିଆ ଟ୍ରମ୍ପ ରହସ୍ୟମୟ ଭାବେ ଜନତାଙ୍କଠାରୁ ଦୂରେଇ ରହୁଛନ୍ତି । ଶେଷଥର ପାଇଁ ତାଙ୍କୁ ୨୦ ଜାନୁୟାରୀରେ ଦେଖିବାକୁ ମିଳିଥିଲା । ଜନତାଙ୍କଠାରୁ ଦୂରେଇ ରହିବା ଓ ଇନଷ୍ଟାଗ୍ରାମ ପୋଷ୍ଟ ହଟାଇବା ପରେ ଆଲୋଚନା ହେଉଛି କି ନିଶ୍ଚିତ ଭାବେ ମେଲାନିଆ କୌଣସି ଚିନ୍ତା ମଧ୍ୟରେ ରହିଛନ୍ତି । ଡୋନାଲ୍ଡ ଟ୍ରମ୍ପ ଏବେ ଗଲ୍ଫ ଖେଳି ସମୟ କାଟୁଥିବା ବେଳେ ସୁପର ପାଉଲ ପାର୍ଟିରେ ସେ ମେଲାନିଆଙ୍କ ସହ ଆସି ନ ଥିଲେ । ଏହାକୁ ଦେଖି ଆଲୋଚନା ହେଉଛି କି ହୁଏତ ଉଭୟ ଅଲଗା ହୋଇପାରନ୍ତି । କିନ୍ତୁ ଏହାକୁ ସମ୍ପୂର୍ଣ୍ଣ ଭାବେ ଖଣ୍ଡନ କରିଛନ୍ତି ମେଲାନିଆ । ସୂଚନାଯୋଗ୍ୟ, ୧୯୯୮ରେ ଯେତେବେଳେ ଡୋନାଲ୍ଡ ଟ୍ରମ୍ପଙ୍କୁ ୫୨ ବର୍ଷ ଓ ମେଲାନିଆଙ୍କୁ ୨୮ ବର୍ଷ ବୟସ ହୋଇଥିଲା ସେତେବେଳେ ଉଭୟ ନ୍ୟୁୟର୍କ ଫ୍ୟାଶନ ୱିକ୍ରେ ଦେଖା ହୋଇଥିଲେ । ସେହିଠାରୁୁ ଆରମ୍ଭ ହୋଇଥିଲା ଉଭୟଙ୍କ ପ୍ରେମ କାହାଣୀ । ୨୦୦୪ରେ ଟ୍ରମ୍ପ ମେଲାନିଆଙ୍କୁ ୧.୫ ମିଲିୟନ ଡଲାରର ଏକ ହୀରା ମୁଦି ଦେଇ ବିବାହ କରିବାକୁ ପ୍ରପୋଜ କରିଥିବା ବେଳେ ୨୨ ଜାନୁୟାରୀ ୨୦୦୫ରେ ଏମାନେ ବିବାହ କରିଥିଲେ ।
