ଶ୍ରୀନଗର, ୨୪।୯ : ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ପିଡିପି ମୁଖ୍ୟ ମେହବୁବା ମୁଫତି ପାକିସ୍ତାନ ପ୍ରଧାନମନ୍ତ୍ରୀ ଶାହାବାଜ ସରିଫଙ୍କ ହଁରେ ହଁ କହୁଥିବାର ଦେଖିବାକୁ ମିଳୁଛି। ଶନିବାର ସେ କହିଛନ୍ତି ଯେ ଯଦି ପାକିସ୍ତାନର ପ୍ରଧାନମନ୍ତ୍ରୀ ଜମ୍ମୁ -କଶ୍ମୀରର ସମସ୍ୟାର ସମାଧାନ ଏବଂ ଦୁଇ ଦେଶ ମଧ୍ୟରେ ସମ୍ପର୍କକୁ ସୁଦୃ ଢ଼ କରିବା ବିଷୟରେ ଆଲୋଚନା କରନ୍ତି, ତେବେ ତାହା କରାଯିବା ଉଚିତ। ଯେପରି ଅଟଳ ବିହାରୀ ବାଜପେୟୀଙ୍କ ସମୟରେ ଦୁଇ ଦେଶ ବସି ଆଲୋଚନା କରିଥିଲେ, ସେହିଭଳି ଯଦି ଉଭୟ ଦେଶ ଜମ୍ମୁ -କଶ୍ମୀରର ସମାଧାନ ଖୋଜିବେ, ତେବେ ଏହା ଦୁଇ ଦେଶ ପାଇଁ ଭଲ ହେବ।
ମେହବୁବା କହିଛନ୍ତି ଯେ ଜମ୍ମୁ-କଶ୍ମୀର ପ୍ରସଙ୍ଗ ଦ୍ୱନ୍ଦ୍ୱରେ ରହିଛି। ଏହି ପ୍ରସଙ୍ଗ ଜଟିଳ ମଧ୍ୟ। ଏହାକୁ ଏକ କାରାଗାରରେ ପରିଣତ କରାଯାଇଛି। ଏନକାଉଣ୍ଟର ଏଠାରେ ସବୁବେଳେ ଘଟୁଛି। ଏହି ସମସ୍ୟାର ସମାଧାନ କରିବା ଆବଶ୍ୟକ। ଅନନ୍ତନାଗରେ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନର ଉତ୍ତର ଦେବାବେଳେ ପିଡିପି ମୁଖ୍ୟ ଏହି କଥା କହିଛନ୍ତି।
ଉଲ୍ଲେଖଯୋଗ୍ୟ, ମିଳିତ ଜାତିସଂଘ ସାଧାରଣ ସଭାରେ ଜମ୍ମୁ-କଶ୍ମୀର ବିଷୟରେ ମିଥ୍ୟା ପ୍ରଚାର କରିଥିବାରୁ ଭାରତ ପୁଣି ପାକିସ୍ତାନକୁ ନିନ୍ଦା କରିଛି। ମିଳିତ ଜାତିସଂଘରେ ଭାରତର ମିଶନର ପ୍ରଥମ ସଚିବ ମିଜିଟୋ ଭିନିଟୋ କହିଛନ୍ତି ଯେ ପାକିସ୍ତାନ ପ୍ରଧାନମନ୍ତ୍ରୀ ଭାରତ ବିରୋଧରେ ମିଥ୍ୟା ଅଭିଯୋଗ ଆଣିବା ଦୁଃଖର ବିଷୟ। ନିଜ ଦେଶରେ ହୋଇଥିବା ଦୁଷ୍କର୍ମକୁ ଲୁଚାଇବା ଏବଂ ଭାରତ ବିରୋଧରେ କାର୍ଯ୍ୟାନୁଷ୍ଠାନକୁ ଯଥାର୍ଥତା ଦେବା ପାଇଁ ସେ ଏହା କରିଥିଲେ।
ଭାରତ ବିରୁଦ୍ଧରେ ମିଥ୍ୟା ଅଭିଯୋଗ କରିବା ପୂର୍ବରୁ ଭାରତୀୟ କୂଟନୀତିଜ୍ଞ ମିଜିଟୋ ଭିନିଟୋ ପାକିସ୍ତାନକୁ ନିଜ ଘର କଥା ବୁଝିବା ପାଇଁ ମନେ ପକାଇ ଦେଇଛନ୍ତି। ଜମ୍ମୁ-କଶ୍ମୀର ଦାବି କରିବା ପରିବର୍ତ୍ତେ ଇସଲାମାବାଦ ସୀମାରେ ଆତଙ୍କବାଦକୁ ବନ୍ଦ କରିବା ଉଚିତ ବୋଲି ସେ କହିଛନ୍ତି। ପାକିସ୍ତାନରେ ଯେତେବେଳେ ସଂଖ୍ୟାଲଘୁ ସମ୍ପ୍ରଦାୟର ହଜାର ହଜାର ଯୁବତୀଙ୍କୁ ଏସଓପି ଭାବରେ ଅପହରଣ କରାଯାଉଛି, ସେତେବେଳେ ଆମେ ଏହି ମାନସିକତା ବିଷୟରେ କ’ଣ ସିଦ୍ଧାନ୍ତ ନେଇପାରିବା ବୋଲି ସେ ପ୍ରଶ୍ନ କରିଛନ୍ତି।
ବାସ୍ତବରେ, ପାକିସ୍ତାନ ପ୍ରଧାନମନ୍ତ୍ରୀ ଶାହାବାଜ ସରିଫ ଶୁକ୍ରବାର କହିଥିଲେ ଯେ ପାକିସ୍ତାନ ଭାରତ ସମେତ ସମସ୍ତ ପଡ଼ୋଶୀ ଦେଶଙ୍କ ସହ ଶାନ୍ତି ଚାହୁଁଛି, କିନ୍ତୁ ଦକ୍ଷିଣ ଏସିଆରେ ସ୍ଥାୟୀ ଶାନ୍ତି ଏବଂ ସ୍ଥିରତା କାଶ୍ମୀର ପ୍ରସଙ୍ଗର ସଠିକ ସମାଧାନ ଉପରେ ନିର୍ଭର କରେ। ଜାତିସଂଘ ସାଧାରଣ ସଭାର ଏକ ଉଚ୍ଚ ସ୍ତରୀୟ ଅଧିବେଶନକୁ ସମ୍ବୋଧିତ କରି ସରିଫ କହିଥିଲେ, ଜମ୍ମୁ-କଶ୍ମୀରର ସ୍ବତନ୍ତ୍ର ସ୍ଥିତିକୁ ବଦଳାଇବା ପାଇଁ ୫ ଅଗଷ୍ଟ ୨୦୧୯ରେ ଭାରତର ବେଆଇନ ତଥା ଏକପାଖିଆ ପଦକ୍ଷେପ ଯୋଗୁ ଶାନ୍ତି ବ୍ୟହତ ହେବା ସହିତ ଏବଂ ଦୁଇଦେଶ ମଧ୍ୟରେ ତିକ୍ତତାକୁ ଆହୁରି ବଢ଼ାଇ ଦେଇଛି।
